ಸೌತ್‌ ಫಿಲ್ಮ್‌ಫೇರ್‌ ಪ್ರಶಸ್ತಿ ; ಅತ್ಯುತ್ತಮ ಸಿನಿಮಾ 'ತಿಥಿ'

*ಶರಣು ಹುಲ್ಲೂರು, ಹೈದರಾಬಾದ್‌

ಪ್ರತಿಷ್ಠಿತ 2017ನೇ ಸಾಲಿನ ದಕ್ಷಿಣ ಭಾರತದ 64ನೇ ಜಿಯೋ ಫಿಲ್ಮ್‌ಫೇರ್‌ ಪ್ರಶಸ್ತಿಗೆ ಹಿರಿಯ ನಟ ಅನಂತ್‌ ನಾಗ್‌ ಮತ್ತು 'ಯೂಟರ್ನ್‌' ಖ್ಯಾತಿಯ ನಟಿ ಶ್ರದ್ಧಾ ಶ್ರೀನಾಥ್‌ ಪಾತ್ರರಾದರು. ಹೈದರಾಬಾದ್‌ನಲ್ಲಿ ಶನಿವಾರ (ಜೂ.17) ಸಂಜೆ ಖಾಸಗಿ ಹೋಟೆಲ್‌ನಲ್ಲಿ ನಡೆದ ವರ್ಣ ರಂಜಿತ ಸಮಾರಂಭದಲ್ಲಿ ಸೌತ್‌ ಫಿಲ್ಮ್‌ಫೇರ್‌ ಪ್ರಶಸ್ತಿಗಳನ್ನು ಪ್ರದಾನ ಮಾಡಲಾಯಿತು.

ಕನ್ನಡ, ತೆಲುಗು ತಮಿಳು ಮತ್ತು ಮಲೆಯಾಳಂ ಸಿನಿಮಾ ರಂಗದ ದಿಗ್ಗಜರ ಸಮಾಗಮ ಕಾರ‍್ಯಕ್ರಮಕ್ಕೆ ಸಾಕ್ಷಿಯಾಗಿತ್ತು. 'ಗೋಧಿ ಬಣ್ಣ ಸಾಧಾರಣ ಮೈಕಟ್ಟು' ಚಿತ್ರದ ಅಭಿನಯಕ್ಕಾಗಿ ಅನಂತ್‌ ನಾಗ್‌ ಅತ್ಯುತ್ತಮ ನಟ, 'ಯೂ ಟರ್ನ್‌' ಚಿತ್ರದ ನಟನೆಗಾಗಿ ಶ್ರದ್ಧಾ ಶ್ರೀನಾಥ್‌ಗೆ ಅತ್ಯುತ್ತಮ ನಟಿ ಪ್ರಶಸ್ತಿಗೆ ಭಾಜನರಾದರು.

ಅಂತಾರಾಷ್ಟ್ರೀಯ ಮಟ್ಟದಲ್ಲಿ ಸದ್ದು ಮಾಡಿರುವ ರಾಮ್‌ ರೆಡ್ಡಿ ನಿರ್ದೇಶನದ 'ತಿಥಿ' ಚಿತ್ರ ಅತ್ಯುತ್ತಮ ಚಿತ್ರ ಪ್ರಶಸ್ತಿ ಪಡೆಯಿತು. ವಿಮರ್ಶಕರ ಅತ್ಯುತ್ತಮ ನಟ ಪ್ರಶಸ್ತಿಯನ್ನು 'ಕಿರಿಕ್‌ ಪಾರ್ಟಿ' ಚಿತ್ರದ ಅಭಿನಯಕ್ಕಾಗಿ ರಕ್ಷಿತ್‌ ಶೆಟ್ಟಿಗೆ ಪ್ರದಾನ ಮಾಡಿದರೆ, ವಿಮರ್ಶಕರ ಅತ್ಯುತ್ತಮ ನಟಿ ಪ್ರಶಸ್ತಿಯು 'ಗೋಧಿ ಬಣ್ಣ ಸಾಧಾರಣ ಮೈಕಟ್ಟು' ಸಿನಿಮಾದ ನಟನೆಗಾಗಿ ಶ್ರುತಿ ಹರಿಹರನ್‌ ಪಡೆದರು.

ವಿವಿಧ ವಿಭಾಗಗಳಲ್ಲಿ ಬರೋಬ್ಬರಿ ಐದು ಪ್ರಶಸ್ತಿಗಳನ್ನು ಪಡೆಯುವ ಮೂಲಕ 'ಕಿರಿಕ್‌ ಪಾರ್ಟಿ' ಚಿತ್ರ ಈ ಬಾರಿ ಹೆಚ್ಚು ಪ್ರಶಸ್ತಿ ಪಡೆದ ಚಿತ್ರವಾಗಿ ಹೊರಹೊಮ್ಮಿದೆ. ಈ ಚಿತ್ರವನ್ನು ನಿರ್ದೇಶನ ಮಾಡಿದ್ದು ರಿಷಭ್‌ ಶೆಟ್ಟಿ. ಇವರಿಗೆ ಅತ್ಯುತ್ತಮ ನಿರ್ದೇಶಕ ಪ್ರಶಸ್ತಿ ಕೂಡ ಸಂದಿದೆ.

'ಗೋಧಿ ಬಣ್ಣ ಸಾಧಾರಣ ಮೈಕಟ್ಟು' ಚಿತ್ರಕ್ಕಾಗಿ ವಸಿಷ್ಠ ಸಿಂಹಗೆ ಅತ್ಯುತ್ತಮ ಪೋಷಕ ನಟ, 'ಕಿರಿಕ್‌ ಪಾರ್ಟಿ' ನಟನೆಗಾಗಿ ಸಂಯುಕ್ತ ಹೆಗಡೆಗೆ ಅತ್ಯುತ್ತಮ ಪೋಷಕ ನಟಿ ಪ್ರಶಸ್ತಿ ದೊರೆತಿದೆ. ಕಿರಿಕ್‌ ಪಾರ್ಟಿ ಸಿನಿಮಾದ ಸಂಗೀತಕ್ಕಾಗಿ ಅಜನೀಶ್‌ ಲೋಕನಾಥ್‌ ಅತ್ಯುತ್ತಮ ಸಂಗೀತ ನಿರ್ದೇಶಕ ಪ್ರಶಸ್ತಿ ಪಡೆದಿದ್ದಾರೆ.

ಈ ವರ್ಣ ರಂಜಿತ ಸಮಾರಂಭದಲ್ಲಿ ನಟಿ ರಶ್ಮಿಕಾ ಮಂದಣ್ಣ, ಸಂಗೀತ ನಿರ್ದೇಶಕ ಗುರುಕಿರಣ್‌ ಸೇರಿದಂತೆ ಅನೇಕ ಸ್ಯಾಂಡಲ್‌ವುಡ್‌ ತಾರೆಯರು ಹಾಜರಿದ್ದರು. ರಂಗಿನ ಸಮಾರಂಭದಲ್ಲಿ ಶ್ರದ್ಧಾ ಶ್ರೀನಾಥ್‌, ಸಂಯುಕ್ತ ಹೆಗಡೆ ಕನ್ನಡದ ಹಾಡುಗಳಿಗೆ ಹೆಜ್ಜೆ ಹಾಕಿದ್ದು ವಿಶೇಷವಾಗಿತ್ತು. ಇದೇ ಮೊದಲ ಬಾರಿಗೆ ಕನ್ನಡದ ನಟಿ ರಾಗಿಣಿ ದ್ವಿವೇದಿ ಕಾರ‍್ಯಕ್ರಮ ನಿರೂಪಿಸಿದರು.

64ನೇ ಸೌತ್‌ ಫಿಲ್ಮ್‌ಫೇರ್‌ ಪ್ರಶಸ್ತಿ ಪುರಸ್ಕೃತರು:

ಅತ್ಯುತ್ತಮ ಚಿತ್ರ : ತಿಥಿ
ಅತ್ಯುತ್ತಮ ನಿರ್ದೇಶಕ : ರಿಷಭ್‌ ಶೆಟ್ಟಿ (ಕಿರಿಕ್‌ ಪಾರ್ಟಿ)
ಅತ್ಯುತ್ತಮ ನಟ : ಅನಂತ್‌ ನಾಗ್‌ (ಗೋಧಿ ಬಣ್ಣ ಸಾಧಾರಣ ಮೈಕಟ್ಟು)
ಅತ್ಯುತ್ತಮ ನಟಿ : ಶ್ರದ್ಧಾ ಶ್ರೀನಾಥ್‌ (ಯೂ ಟರ್ನ್‌)
ಅತ್ಯುತ್ತಮ ಪೋಷಕ ನಟ : ವಸಿಷ್ಠ ಸಿಂಹ (ಗೋಧಿ ಬಣ್ಣ ಸಾಧಾರಣ ಮೈಕಟ್ಟು)
ಅತ್ಯುತ್ತಮ ಪೋಷಕ ನಟಿ : ಸಂಯುಕ್ತ ಹೆಗಡೆ (ಕಿರಿಕ್‌ ಪಾರ್ಟಿ)
ಅತ್ಯುತ್ತಮ ಸಂಗೀತ ನಿರ್ದೇಶಕ : ಅಜನೀಶ್‌ ಲೋಕನಾಥ್‌ (ಕಿರಿಕ್‌ ಪಾರ್ಟಿ)
ಅತ್ಯುತ್ತಮ ಸಾಹಿತ್ಯ : ಜಯಂತ್‌ ಕಾಯ್ಕಿಣಿ ( ಮುಂಗಾರು ಮಳೆ -2 ‘ಸರಿಯಾಗಿ ನೆನಪಿದೆ....’)
ಅತ್ಯುತ್ತಮ ಹಿನ್ನೆಲೆ ಗಾಯಕ : ವಿಜಯ ಪ್ರಕಾಶ್‌ ( ಬೆಳಗೆದ್ದು ಯಾರ ಮುಖವಾ... ಚಿತ್ರ : ಕಿರಿಕ್‌ ಪಾರ್ಟಿ)
ಅತ್ಯುತ್ತಮ ಹಿನ್ನೆಲೆ ಗಾಯಕಿ : ಅನನ್ಯ ಭಟ್‌ (ನಮ್ಮ ಕಾಯೋ ದೇವರೆ... ಚಿತ್ರ : ರಾಮಾ ರಾಮಾ ರೇ ‘)
ವಿಮರ್ಶಕರ ಅತ್ಯುತ್ತಮ ನಟ : ರಕ್ಷಿತ್‌ ಶೆಟ್ಟಿ (ಕಿರಿಕ್‌ ಪಾರ್ಟಿ)
ವಿಮರ್ಶಕರ ಅತ್ಯುತ್ತಮ ನಟಿ : ಶ್ರುತಿ ಹರಿಹರನ್‌ (ಗೋಧಿ ಬಣ್ಣ ಸಾಧಾರಣ ಮೈಕಟ್ಟು)