ಜೇಮ್ಸ್‌ ಬಾಂಡ್‌ ಅನುಕರಣೆಯಲ್ಲಿ ರಾಜು ಫಸ್ಟ್‌ರ‍್ಯಾಂಕ್‌

ಫಸ್ಟ್‌ರ‍್ಯಾಂಕ್‌ ರಾಜು ಖ್ಯಾತಿಯ ಗುರುನಂದನ್‌ 'ರಾಜು ಜೇಮ್ಸ್‌ ಬಾಂಡ್‌' ಸಿನಿಮಾದಲ್ಲಿ ನಟಿಸುತ್ತಿರುವ ವಿಷಯ ಗೊತ್ತೇ ಇದೆ. ಈ ಸಿನಿಮಾದಲ್ಲಿ ಅವರು ಯಾವ ರೀತಿಯ ಪಾತ್ರ ನಿರ್ವಹಿಸುತ್ತಿದ್ದಾರೆ ಎಂಬ ಗುಟ್ಟು ರಟ್ಟಾಗಿದೆ.

ಜೇಮ್ಸ್‌ ಬಾಂಡ್‌ ಅನುಕರಣೆ ಮಾಡಲು ಹೋಗಿ ಅವರು ಏನಾಗುತ್ತಾರೆ ಎನ್ನುವುದೇ ಚಿತ್ರಕಥೆ. ಜೇಮ್ಸ್‌ ಬಾಂಡ್‌ನ ಪಕ್ಕಾ ಅಭಿಮಾನಿ ಪಾತ್ರದಲ್ಲಿ ಗುರುನಂದನ್‌ ಕಾಣಿಸಿಕೊಳ್ಳಲಿದ್ದಾರೆ. ರಾಜು ಪಾತ್ರದ ಮೂಲಕ ಫೇಮಸ್‌ ಆಗಿರುವ ಇವರು, ಅದೇ ಸರಣಿಯಲ್ಲಿಯೇ ಮುಂದುವರೆದದ್ದು ವಿಶೇಷ.

ಮೊನ್ನೆಯಷ್ಟೇ ಈ ಸಿನಿಮಾದ ಮುಹೂರ್ತವಾಗಿದೆ. ಭಾಗ್ಯರಾಜ್‌ ಹಾಗೂ ಕಳ್ಬೆಟ್ಟದ ದರೋಡೆಕೊರರು ಸಿನಿಮಾಗಳ ಮೂಲಕ ಭರವಸೆ ಮೂಡಿಸಿರುವ ದೀಪಕ್‌ ಮಧುವನಹಳ್ಳಿ ಈ ಚಿತ್ರಕ್ಕೆ ಆ್ಯಕ್ಷ ನ್‌ ಕಟ್‌ ಹೇಳುತ್ತಿದ್ದಾರೆ. 'ನಗರ ಒಂದರಲ್ಲಿ ವಾಸವಾಗಿರುವ ತಂದೆ ತಾಯಿ ಇಲ್ಲದ ಹುಡುಗ ಈ ರಾಜು. ಮಾವನೇ ಅವನಿಗೆ ಎಲ್ಲ. ಸಾಲದ ಸುಳಿಯಿಂದ ತಮ್ಮ ಪಾಲಕರನ್ನು ಬಚಾವ್‌ ಮಾಡಲು ಅವನು ಏನು ಮಾಡುತ್ತಾನೆ ಎಂಬ ಕಥೆ ಸಿನಿಮಾದಲ್ಲಿದೆ. ಅಲ್ಲದೇ, ಲವ್‌ ಸ್ಟೋರಿ ಕೂಡ ಕಥೆಯ ಭಾಗವಾಗಿದೆ' ಅಂತಾರೆ ನಿರ್ದೇಶಕರು.