ಖುಷಿ ಹೇಳಿಕೊಳ್ಳಲು ನನಗೆ ಪದಗಳೇ ಸಿಗುತ್ತಿಲ್ಲ: ನಟಿ ಸೋನು ಗೌಡ!

ಆರ್ ಚಂದ್ರು ನಿರ್ದೇಶನ, ಉಪೇಂದ್ರ-ರಚಿತಾ ರಾಮ್ ಜೋಡಿಯ 'ಐ ಲವ್ ಯು' ಚಿತ್ರವು ರಿಲೀಸ್ ಆಗಿ ಯಶಸ್ವಿ ಪ್ರದರ್ಶನ ಕಾಣುತ್ತಿದೆ. ಈ ಚಿತ್ರದಲ್ಲಿ ನಟಿ ಸೋನು ಗೌಡ ಪ್ರಮುಖ ಪಾತ್ರದಲ್ಲಿ ಕಾಣಿಸಿಕೊಂಡಿದ್ದಾರೆ. ಐ ಲವ್ ಯು ಚಿತ್ರ ಬಿಡುಗಡೆಗಿಂತ ಮೊದಲು ನಟಿ ಸೋನು ಗೌಡ ಅವರು ಸಾಕಷ್ಟು ಕಡೆ ಸಿನಿಮಾ ಪ್ರಚಾರಕ್ಕೆ ಹೋಗಿದ್ದರೂ ಎಲ್ಲಿಯೂ ತಮ್ಮ ಪಾತ್ರದ ಬಗೆಗಿನ ಗುಟ್ಟು ಬಿಟ್ಟುಕೊಟ್ಟಿರಲಿಲ್ಲ. ಆದರೆ, ಇದೀಗ ಸಿನಿಮಾ ಬಿಡುಗಡೆಯಾಗಿದ್ದು, ಸೋನು ಪಾತ್ರದ ಬಗ್ಗೆ ಬಹಳಷ್ಟು ಮೆಚ್ಚುಗೆ ಕೇಳಿ ಬರುತ್ತಿದೆಯಂತೆ.

ಹೌದು, ನಟಿ ಸೋನು ಗೌಡ ಅವರು ತಮ್ಮ ಸಿನಿಮಾ ಬಗ್ಗೆ, ತಾವು ನಟಿಸಿರುವ 'ಐ ಲವ್ ಯು' ಪಾತ್ರದ ಬಗ್ಗೆ ಸಖತ್ ಖುಷಿಯಾಗಿದ್ದಾರೆ. ಕಾರಣ, ಸಿನಿಮಾ ನೋಡಿದ ಪ್ರೇಕ್ಷಕರು ಸೋನು ಪಾತ್ರದ ಬಗ್ಗೆ ಭಾರೀ ಮೆಚ್ಚುಗೆ ವ್ಯಕ್ತಪಡಿಸಿದ್ದಾರೆ ಎನ್ನಲಾಗಿದೆ. ಇಷ್ಟು ದಿನ ತಮ್ಮ ಪಾತ್ರವನ್ನು ಪ್ರೇಕ್ಷಕರು ಒಪ್ಪಿಕೊಳ್ಳುತ್ತಾರೋ ಇಲ್ಲವೋ ಎಂಬ ಗೊಂದಲದಲ್ಲಿ ಇದ್ದವರಂತೆ ಸೈಲೆಂಟಾಗಿ ಇದ್ದ ಸೋನು ಗೌಡ ಇದೀಗ ತಮ್ಮ ಅಭಿಪ್ರಾಯ ಬಹಿರಂಗಗೊಳಿಸಿದ್ದಾರೆ. ತಾವು ಈ ಪಾತ್ರ ಒಪ್ಪಿ ಮಾಡಿರುವ ಬಗ್ಗೆ ಅವರಿಗೀಗ ಖುಷಿಯಿದೆ, ಹೆಮ್ಮೆಯಿದೆ ಎನ್ನಬಹುದು.

ಐ ಲವ್ ಯು ಚಿತ್ರದಲ್ಲಿನ ತಮ್ಮ ಪಾತ್ರದ ಬಗ್ಗೆ ಮಾತನಾಡಿರುವ ಸೋನು "ಐ ಲವ್ ಯು ಚಿತ್ರದಲ್ಲಿ ಇಂಥ ಜನಮೆಚ್ಚುವ ಪಾತ್ರ ಸೃಷ್ಟಿ ಮಾಡಿ ಅದನ್ನು ನನಗೆ ನೀಡಿದ್ದಕ್ಕಾಗಿ ನಾನು ನಿರ್ದೇಶಕ ಚಂದ್ರು ಅವರಿಗೆ ಕೃತಜ್ಞತೆ ಸಲ್ಲಿಸುತ್ತೇನೆ. ನಿಜವಾಗಿಯೂ ನನಗೆ ಈಗ ಸಿಗುತ್ತಿರುವ ಮೆಚ್ಚುಗೆಯ ಮಳೆಗೆ, ಆಗುತ್ತಿರುವ ಖುಷಿಯನ್ನು ಹೇಳಿಕೊಳ್ಳಲು ಪದಗಳೇ ಸಿಗುತ್ತಿಲ್ಲ. ಈ ಪಾತ್ರಕ್ಕಾಗಿ ನನ್ನನ್ನು ನಿರ್ದೇಶಕ ಚಂದ್ರು ಅವರಿಗೆ ರೆಫರ್ ಮಾಡಿದ ಡಾ . ಕಿರಣ್ ಅವರಿಗೆ ಮೊದಲನೆಯದಾಗಿ ನಾನು 'ಥ್ಯಾಂಕ್ಸ್' ಹೇಳುತ್ತೇನೆ. ಜೊತೆಗೆ, ಈ ಚಿತ್ರದಲ್ಲಿ ನಾನು ಪಾತ್ರ ಮಾಡುವಂತೆ ಪ್ರಚೋದಿಸಿದ, ಸಲಹೆ ನೀಡಿದ ಬಾದಲ್ ನಂಜುಂಡಸ್ವಾಮಿ ಅವರಿಗೂ ನಾನು ಹೃತ್ಪೂರ್ವಕ ಕೃತಜ್ಞತೆ ಹೇಳುತ್ತಿದ್ದೇನೆ.

ಐ ಲವ್ ಯು ಚಿತ್ರದ ನನ್ನ ಪಾತ್ರವನ್ನು ಮೆಚ್ಚಿ ಹಲವು ನನ್ನ ಸ್ನೇಹಿತರು, ಬಂಧುಗಳು ಹಾಗೂ ಅಭಿಮಾನಿಗಳು ಹೊಗಳುತ್ತಿದ್ದಾರೆ. ನನಗೀಗ ನನ್ನ ಪಾತ್ರದ ಆಯ್ಕೆಯ ಬಗ್ಗೆ ತುಂಬಾನೇ ಖುಷಿಯಿದೆ. ಆದರೆ, ಪಾತ್ರದ ಆಫರ್ ಬಂದಾಗ ನಾನು ಇದನ್ನು ಒಪ್ಪಿಕೊಳ್ಳಲೋ ಬೇಡವೋ ಎಂದು ಬಹಳಷ್ಟು ಯೋಚಿಸಿದ್ದೆ. ನಾನು ಹೆಚ್ಚುಕಡಿಮೆ ಎರಡು ದಿನ ಟೈಮ್ ತೆಗೆದುಕೊಂಡು ಕೊನೆಗೆ ಒಪ್ಪಿ ಮಾಡಿದೆ. ನಾನು ಯಾವತ್ತೂ ಹಾಗೆಯೇ. ಒಬ್ಬಳೇ ಕುಳಿತು ತುಂಬಾ ಯೋಚಿಸಿ ನಿರ್ಧಾರ ತೆಗೆದುಕೊಳ್ಳುತ್ತೇನೆ. ಆದರೆ ಒಮ್ಮೆ ನಿರ್ಧಾರ ತೆಗೆದುಕೊಂಡ ಬಳಿಕ ಅದನ್ನು ತುಂಬಾ ಶ್ರದ್ಧೆಯಿಂದ ನಿರ್ವಹಿಸುತ್ತೇನೆ. ಐ ಲವ್ ಯು ಚಿತ್ರದ ಪಾತ್ರಕ್ಕೂ ಇದೆಲ್ಲವೂ ಅನ್ವಯಿಸುತ್ತದೆ.." ಎಂದಿದ್ದಾರೆ ನಟಿ ಸೋನು ಗೌಡ.