ಸ್ಯಾಂಡಲ್‌ವುಡ್‌ನಲ್ಲೂ ಶುರುವಾಗಿದೆ ಫುಟ್ಬಾಲ್‌ ಫಿವರ್‌

*ಹರೀಶ್‌ ಬಸವರಾಜ್‌

Vijaya Karnataka Web

ಇದೇ ಜೂ.14ರಿಂದ ರಷ್ಯಾದಲ್ಲಿ ನಡೆಯಲಿರುವ 'ಫಿಫಾ ಫುಟ್ಬಾಲ್‌ ವಿಶ್ವಕಪ್‌ ಟೂರ್ನಿ'ಗಾಗಿ ವಿಶ್ವವೇ ಕಾಯುತ್ತಿದೆ. 21ನೇ ವಿಶ್ವಕಪ್‌ ಫುಟ್ಬಾಲ್‌ ಪಂದ್ಯಾವಳಿ ವೀಕ್ಷಿಸಲು ವಿಶ್ವದ ನಾನಾ ಕ್ಷೇತ್ರದ ಗಣ್ಯರು ರಷ್ಯಾ ವಿಮಾನ ಏರಲಿದ್ದಾರೆ. ಹಾಗೆಯೇ ಬಾಲಿವುಡ್‌ನ ಸಿಲಿಬ್ರಿಟಿಗಳು ಕೂಡ ನೇರ ಟೂರ್ನಿ ನೋಡಲು ತಯಾರಿ ಮಾಡಿಕೊಂಡಿದ್ದಾರೆ. ಸ್ಯಾಂಡಲ್‌ವುಡ್‌ನಲ್ಲೂ ಫುಟ್ಬಾಲ್‌ ಫಿವರ್‌ ಶುರುವಾಗಿದೆ. ಶೂಟಿಂಗ್‌ ಮಧ್ಯೆಯೂ ಬಿಡುವು ಮಾಡಿಕೊಂಡು ಟೂರ್ನಿ ನೋಡುವುದಾಗಿ ಹೇಳಿದ್ದಾರೆ.

ಟೆನ್‌ಷನ್‌ ಗೇಮ್‌ : ಗಣೇಶ್‌

ಫುಟ್ಬಾಲ್‌ ಟೂರ್ನಿ ಅದೊಂದು ಟೆನ್‌ಷನ್‌ ಗೇಮ್‌ ಅಂತಾರೆ ನಟ ಗಣೇಶ್‌. 'ಯಾರು ಯಾವಾಗ ಹೇಗೆ ಗೇಮ್‌ ಫಿನಿಶ್‌ ಮಾಡುತ್ತಾರೋ ಗೊತ್ತಾಗಲ್ಲ. ಆಟ ಮುಗಿಯುವ ತನಕ ಉಸಿರು ಬಿಗಿ ಹಿಡಿದುಕೊಂಡು ನೋಡಬೇಕು. ಅಷ್ಟೊಂದು ಇಂಟ್ರಸ್ಟಿಂಗ್‌ ಆಗಿರುತ್ತವೆ ಮ್ಯಾಚ್‌. ನನಗೆ ಇಂಥ ಟೀಮ್‌ ಫೆವರೇಟ್‌ ಅಂತ ಹೇಳುವುದಕ್ಕೆ ಆಗಲ್ಲ. ಚೆನ್ನಾಗಿ ಆಡುವ ಟೀಮ್‌ಗೆ ಸಪೋರ್ಟ್‌ ಮಾಡ್ತೀನಿ. ಯಾವುದೇ ಆಟ ಆಗಿರಲಿ ಅದನ್ನು ಆಟದ ರೀತಿಯಲ್ಲೇ ನೋಡಿದರೆ ಎಂಜಾಯ್‌ ಮಾಡಲು ಸಾಧ್ಯ' ಎನ್ನುವುದು ಗಣೇಶ್‌ ಮಾತು.

ಈ ಬಾರಿಯ ಫುಟ್ಬಾಲ್‌ ಪಂದ್ಯವನ್ನು ಅವರು ಮನೆಯಲ್ಲಿಯೇ ವೀಕ್ಷಿಸುತ್ತಾರಂತೆ. ಅವರ ಮನೆಯಲ್ಲೇ ಬೃಹತ್‌ ಸ್ಕ್ರೀನ್‌ ಇರುವುದರಿಂದ ಲೈವ್‌ ನೋಡಿದ ಅನುಭವ ಆಗುತ್ತದೆಯಂತೆ. ಗೆಳೆಯರ ಜತೆ ಟೂರ್ನಿ ವೀಕ್ಷಿಸುವುದಾಗಿ ಹೇಳುತ್ತಾರೆ ಗಣೇಶ್‌.

ಒಂದೂವರೆ ಗಂಟೆಯ ರೋಚಕವಾಗಿರುತ್ತದೆ : ಶ್ರೀಮುರುಳಿ

ಫುಟ್ಬಾಲ್‌ ಒಂಥಾರ ರೋಚಕವಾಗಿರುತ್ತದೆ ಎಂದಿದ್ದಾರೆ ನಟ ಶ್ರೀಮುರುಳಿ. 'ಪ್ರತಿ ಸಲವೂ ನಾನು ಫುಟ್ಬಾಲ್‌ನ ವಿಶ್ವಕಪ್‌ ಪಂದ್ಯಗಳನ್ನು ಮಿಸ್‌ ಮಾಡದೇ ನೋಡುತ್ತೇನೆ. ನನ್ನ ಫೇವರೆಟ್‌ ಆಟಗಾರನೆಂದರೆ ಕ್ರಿಸ್ಟಿಯಾನೋ ರೊನೋಲ್ಡೊ. ಫೇವರಿಟ್‌ ಟೀಮ್‌ಗಳು ಬಹಳಷ್ಟಿವೆ. ಇಟಲಿ, ಬ್ರಸೆಲ್ಸ್‌, ಜರ್ಮನಿ ಹೀಗೆ ಪಟ್ಟಿ ದೊಡ್ಡದಾಗುತ್ತದೆ. ಆಯಾ ಮ್ಯಾಚ್‌ಗಳು ಎಷ್ಟು ರೋಚಕವಾಗಿರುತ್ತವೆ ಎಂದರೆ ಒಂದೂವರೆ ಗಂಟೆ ಹೇಗೆ ಕಳೆಯುತ್ತದೆ ಎಂಬುದೇ ಗೊತ್ತಾಗುವುದಿಲ್ಲ'ಅಂತಾರೆ.

ಸಾಮಾನ್ಯವಾಗಿ ಪಂದ್ಯ ನಡೆಯುವ ವೇಳೆ ಶ್ರೀಮುರುಳಿ ಮನೆಬಿಟ್ಟು ಹೋಗುವುದಿಲ್ಲವಂತೆ. ಮನೆಯಲ್ಲಿ ಮಕ್ಕಳ ಜತೆ ಮ್ಯಾಚ್‌ ನೋಡುತ್ತಾರೆ. ಅಪರೂಪಕ್ಕೆ ಎನ್ನುವಂತೆ ಎಲ್ಲ ಸ್ನೇಹಿತರು ಒಟ್ಟಿಗೆ ಸೇರಿ ಒಂದು ದೊಡ್ಡ ಸ್ಕ್ರೀನ್‌ ಹಾಕಿ ನೋಡುತ್ತಾರಂತೆ.

ಫುಟ್ಬಾಲ್‌ ಫಿಟ್ನೆಸ್‌ ಆಟ : ದುನಿಯಾ ವಿಜಯ್‌

ಫುಟ್ಬಾಲ್‌ ಅಂದ್ರೆ ಫಿಟ್ನೆಸ್‌ ಆಟ ಎನ್ನುವ ಅಭಿಪ್ರಾಯ ದುನಿಯಾ ವಿಜಯ್‌ ಅವರದ್ದು. 'ನನಗಿಂತ ನನ್ನ ಮಗ ಸಾಮ್ರಾಟ್‌ ಹೆಚ್ಚು ಫುಟ್ಬಾಲ್‌ ನೋಡುತ್ತಾನೆ. ನನ್ನನ್ನು ಕರೆದು ಅವನು ತೋರಿಸುತ್ತಾನೆ. ನನಗೆ ಫೇವರಿಟ್‌ ಅನ್ನುವುದಕ್ಕಿಂತ ಎಲ್ಲ ತಂಡಗಳು ನನಗೆ ಇಷ್ಟವಾಗುತ್ತವೆ. ಕಳೆದ ಬಾರಿಯೂ ಬಹುತೇಕ ಪಂದ್ಯಗಳನ್ನು ನೋಡಿದ್ದೆ . ಈ ಬಾರಿ ವೀಕ್ಷಿಸುವುದಕ್ಕೆ ಕಾತರನಾಗಿದ್ದೇನೆ. ನಾನು 'ಕುಸ್ತಿ' ಸಿನಿಮಾದ ತಯಾರಿಯಲ್ಲಿರುವ ಕಾರಣ ಎಲ್ಲ ಪಂದ್ಯಗಳನ್ನು ಮನೆಯಲ್ಲಿಯೇ ಕುಳಿತು ನೋಡುತ್ತೇನೆ. ನನ್ನ ಮನೆಯಲ್ಲಿ ದೊಡ್ಡ ಸ್ಕ್ರೀನ್‌ ಇದ್ದು, ನನ್ನ ಮಗ ಇಡೀ ವಿಶ್ವಕಪ್‌ ಮುಗಿಯವರೆಗೂ ಅದನ್ನು ಬಿಟ್ಟು ಬೇರೆ ಏನೂ ನೋಡುವುದಿಲ್ಲ' ಎನ್ನುತ್ತಾರೆ ವಿಜಯ್‌.

ಫುಟ್ಬಾಲ್‌ ಅಂದ್ರೆ ಫುಲ್‌ ಮಸ್ತಿ : ರಶ್ಮಿಕಾ ಮಂದಣ್ಣ

ಫುಟ್ಬಾಲ್‌ ಅಂದ್ರೆ ಸಖತ್‌ ಮಸ್ತಿ ಎನ್ನುವುದು ರಶ್ಮಿಕಾ ಮಂದಣ್ಣ ಮಾತು. ಸದ್ಯ ತೆಲುಗು ಚಿತ್ರವೊಂದರಲ್ಲಿ ಕ್ರಿಕೆಟ್‌ ಆಟಗಾರ್ತಿಯಾಗಿ ನಟಿಸುತ್ತಿರುವ ಅವರು, ಆ ಸಿನಿಮಾದ ತಯಾರಿ ಮತ್ತು ಶೂಟಿಂಗ್‌ ಇರುವ ಕಾರಣ ಫುಟ್ಬಾಲ್‌ ಅನ್ನು ಮಿಸ್‌ ಮಾಡಿಕೊಳ್ಳುತ್ತಿದ್ದಾರಂತೆ.

'ನನಗೆ ಅದರ ಬಗ್ಗೆ ಹೆಚ್ಚು ಗೊತ್ತಿಲ್ಲ. ಆದರೆ ಕಾಲೇಜು ದಿನಗಳಲ್ಲಿ ವರ್ಲ್ಡ್‌ ಕಪ್‌ ಸಮಯದಲ್ಲಿ ಹೊಟೇಲ್‌ಗಳಲ್ಲಿ, ಹೊರಗಡೆ ಹೋದಾಗ ನೋಡುತ್ತಿದ್ದೆವು. ನಮ್ಮ ಮನೆಯಲ್ಲಿಯೂ ನಾವು ನೋಡುತ್ತಿದ್ದೆವು. ಆದರೆ ಈ ಬಾರಿ ಕ್ರೇಝ್‌ ಜಾಸ್ತಿಯಾಗಿದೆ ಬಟ್‌ ನನಗೆ ಶೂಟಿಂಗ್‌ ಕಾರಣ ನೋಡಲಾಗುತ್ತಿಲ್ಲ ಅಂತಾರೆ ರಶ್ಮಿಕಾ.