ನಾನು ಆರ್‌ಜೆ ರಾಜೇಶ್‌ ಅವರ ಪಕ್ಕಾ ಅಭಿಮಾನಿ. ಈ ಕಾರಣಕ್ಕಾಗಿ 'ಫಸ್ಟ್‌ ಲವ್‌' ಸಿನಿಮಾ ನಿರ್ದೇಶನ ಮಾಡಿದ್ದೇನೆ ಎಂದು ನಿರ್ದೇಶಕ ಮಲ್ಲಿ ಹೇಳಿದ್ದಾರೆ.
- ಶರಣು ಹುಲ್ಲೂರು
ಮೊದಲ ಪ್ರೇಮದ ಅನುಭವವೇ ರೋಮಾಂಚನ. ಅಂಥದ್ದೊಂದು ಮೊದಲ ಪ್ರೇಮಕತೆಯನ್ನು ಇಟ್ಟುಕೊಂಡು ಸಿನಿಮಾ ಮಾಡಿದ್ದಾರೆ ನಿರ್ದೇಶಕ ಮಲ್ಲಿಕಾರ್ಜುನ್‌ ಅಲಿಯಾಸ್‌ ಮಲ್ಲಿ. ಈ ಚಿತ್ರ ಇಂದು ರಾಜ್ಯಾದ್ಯಂತ 100ಕ್ಕೂ ಹೆಚ್ಚು ಚಿತ್ರಮಂದಿರಗಳಲ್ಲಿ ರಿಲೀಸ್‌ ಆಗುತ್ತಿದೆ.
ತಮ್ಮ ಚಿತ್ರದ ಬಗ್ಗೆ ಲವಲವಿಕೆ ಜತೆ ಮಾತನಾಡಿರುವ ಮಲ್ಲಿ, ಪ್ರತಿಯೊಬ್ಬರಿಗೂ ಫಸ್ಟ್‌ಲವ್‌ ಇಷ್ಟವಾಗಲಿದೆ. ರಾಜೇಶ್‌ ಸೊಗಸಾಗಿ ನಟಿಸಿದ್ದಾರೆಂದು ಹೇಳಿದ್ದಾರೆ.
ಆರ್‌ಜೆಯಾಗಿ ಲವ್‌ಸ್ಟೋರಿಗಳನ್ನು ಹೇಳುವ ಮೂಲಕ ಮನೆಮಾತಾಗಿರುವ ರಾಜೇಶ್‌ ಮೊದಲ ಬಾರಿಗೆ ನಾಯಕರಾಗಿ ಕಾಣಿಸಿಕೊಂಡಿದ್ದಾರೆ. ಎರಡು ಶೇಡ್‌ನ ಪಾತ್ರವನ್ನು ಅವರಿಲ್ಲಿ ನಿರ್ವಹಿಸಿದ್ದಾರೆ.
'ಸಾಮಾನ್ಯವಾಗಿ ಪ್ರತಿಯೊಬ್ಬರ ಜೀವನದಲ್ಲೂ ಮೊದಲ ಪ್ರೇಮದ ನವಿರಾದ ಅನುಭವ ಇದ್ದೇ ಇರುತ್ತದೆ. ಅಂತಹ ಪ್ರೇಮಾಂಕುರದ ಕತೆಯನ್ನು ಈ ಚಿತ್ರದ ಮೂಲಕ ಹೇಳಲು ಹೊರಟಿದ್ದೇನೆ. ರಾಜೇಶ್‌ ಅವರ ಪ್ರೀತಿಯ ಮಾತುಗಳನ್ನು ನಾನು ಎಫ್‌ಎಂನಲ್ಲಿ ಕೇಳುತ್ತಿದ್ದೆ. ಅವರ ದೊಡ್ಡ ಅಭಿಮಾನಿಯಾಗಿದ್ದೆ. ಅದೇ ನನ್ನನ್ನು ಇಂತಹ ಸಿನಿಮಾವಾಗಿಸಲು ಪ್ರೇರಣೆ ಆಗಿದೆ' ಅಂತಾರೆ ನಿರ್ದೇಶಕರು.
ನಿರ್ಮಾಪಕ ಅಶೋಕ್‌ ಲಮಾಣಿ ಅವರಿಗೆ ನಿರ್ದೇಶಕರು ಒಂದು ಪ್ರೇಮಕತೆಯನ್ನು ಒಪ್ಪಿಸಲು ಹೋದಾಗ, ಸ್ವತಃ ಅಶೋಕ್‌ ಅವರೇ ತಮ್ಮ ಮಿತ್ರನ ಜೀವನದಲ್ಲಿ ಆದ ಪ್ರೇಮ ಪ್ರಕರಣ ವಿವರಿಸಿದ್ದಾರೆ. ನೈಜ ಲವ್‌ಸ್ಟೋರಿಯಲ್ಲಿ ಅನೇಕ ಕುತೂಹಲದ ಸಂಗತಿಗಳು ಇರುವ ಕಾರಣಕ್ಕಾಗಿ ಅದನ್ನೇ ಚಿತ್ರವಾಗಿಸಿದ್ದಾರಂತೆ ನಿರ್ದೇಶಕರು. ಹಾಗಾಗಿ ಇದೊಂದು ಅಪರೂಪದ ಪ್ರೇಮಕತೆ ಅನ್ನುವುದು ನಿರ್ದೇಶಕರ ಮಾತು.
ರಾಜೇಶ್‌ ನಾಯಕನಾದರೆ, ಕವಿತಾ ಗೌಡ ಮತ್ತು ಸ್ನೇಹ ನಾಯರ್‌ ನಾಯಕಿಯರು. ಮುಸ್ಸಂಜೆ ಮಾತು ಖ್ಯಾತಿಯ ಶ್ರೀಧರ್‌ ವಿ. ಸಂಭ್ರಮ್‌ ಅವರ ಸಂಗೀತ ನಿರ್ದೇಶನದಲ್ಲಿ ಹಾಡುಗಳು ಮೂಡಿ ಬಂದಿದ್ದು, ಬಹುತೇಕ ಹಾಡುಗಳು ಪ್ರೇಕ್ಷಕರಿಗೆ ಹಿಡಿಸಿವೆ. ಸುರೇಶ್‌ ಬಾಬು ಅವರ ಸಿನಿಮಾಟೋಗ್ರಫಿಯಲ್ಲಿ ಚಿತ್ರ ಮೂಡಿ ಬಂದಿದೆ. ಆದಿತ್ಯ ಫಿಲ್ಮ ಪ್ರೊಡಕ್ಷನ್‌ ಲಾಂಛನದಲ್ಲಿ ಚಿತ್ರ ತಯಾರಾಗಿದೆ.
----------
ಫಸ್ಟ್‌ ಲವ್‌ ಅಂದಾಕ್ಷಣ ಒಂದು ಸಲ ಥ್ರಿಲ್‌ ಆಗುವುದು ಖಂಡಿತ. ಈ ಸಿನಿಮಾ ಕೂಡ ಅಷ್ಟೇ ಥ್ರಿಲ್‌ ನೀಡುತ್ತದೆ. ಪ್ರತಿಯೊಬ್ಬರು ಮನಸ್ಸಿನಲ್ಲೂ ಪ್ರೇಮದ ಜೋಗುಳವನ್ನು ಹಾಡಲಿದೆ.
- ಮಲ್ಲಿ, ನಿರ್ದೇಶಕ