ಗಾಂಚಲಿ ಟೀಸರ್‌ ಈಗ ವೈರಲ್‌

ಆದರ್ಶ್‌ ಎಂಬ ನವ ನಟ ನಟಿಸಿರುವ ಗಾಂಚಲಿ ಸಿನಿಮಾದ ಟೀಸರ್‌ ನವೆಂಬರ್‌ 1ರಂದು ಬಿಡುಗಡೆಯಾಗಿದ್ದು ಯೂಟ್ಯೂಬ್‌ ಟ್ರೆಂಡಿಂಗ್‌ ಆಗಿದೆ.

ನಾಯಕ ಆದರ್ಶ್‌ ಈ ಸಿನಿಮಾ ಮೂಲಕ ನಾಯಕರಾಗಿ ಸ್ಯಾಂಡಲ್‌ವುಡ್‌ಗೆ ಎಂಟ್ರಿ ಕೊಡುತ್ತಿದ್ದು, ಅವರನ್ನು ಇಂಟ್ರಡುಕ್ಷನ್‌ ಮಾಡುವ ಟೀಸರ್‌ ಇದಾಗಿದೆ. ಟೀಸರ್‌ನಲ್ಲಿ ಆದರ್ಶ್‌ ಸಖತ್‌ ಖಡಕ್‌ ಆಗಿ ಕಾಣಿಸಿಕೊಂಡಿದ್ದು, ಚಂದನ ವನಕ್ಕೆ ಒಬ್ಬ ಒಳ್ಳೆ ಹೀರೋ ಸಿಕ್ಕಿದ್ದಾರೆ ಎಂಬ ಫೀಲ್‌ ಆಗುತ್ತದೆ.

ರಾರ‍ಯಪರ್‌ ಚಂದನ್‌ ಶೆಟ್ಟಿ ಗಾಂಚಲಿ ಸಿನಿಮಾಗೆ ಸಂಗೀತ ನೀಡಿದ್ದು, ಈಗಾಗಲೇ ಟಾಪ್‌ ಟು ಬಾಟಮ್‌ ಗಾಂಚಲಿ ಮತ್ತು ಜೈ ಗಣೇಶ ಎಂಬ ಎರಡು ಹಾಡುಗಳು ಬಿಡುಗಡೆಯಾಗಿ ಯೂಟ್ಯೂಬ್‌ನಲ್ಲಿ ವೈರಲ್‌ ಆಗಿವೆ. ಈಗ ಈ ಸಾಲಿಗೆ ಟೀಸರ್‌ ಸಹ ಸೇರಿಕೊಂಡಿದೆ.


ಒಂದು ಏರಿಯಾದಲ್ಲಿ ಎರಡು ಗ್ಯಾಂಗ್‌ ನಡುವೆ ನಡೆಯವ ಕಥೆ ಇದಾಗಿದೆ. ಆದರ್ಶ್‌ ಜತೆ ಭಜರಂಗಿ ಲೋಕಿ , ಶರತ್‌ ಲೋಹಿತಾಶ್ವ ಸೇರಿದಂತೆ ಸಾಕಷ್ಟು ನಟ® ನಟಿಯರು ನಟಿಸಿದ್ದಾರೆ. ಏರಿಯಾದಲ್ಲಿ ಭಜರಂಗಿ ಲೋಕಿ ಮತ್ತು ಆದರ್ಶ್‌ ಅವರ ಗ್ಯಾಂಗ್‌ ನಡುವೆ ಆಗಾಗ ಜಟಾಪಟಿ ನಡೆಯುತ್ತಲೇ ಇರುತ್ತದೆ ಆ ಜಟಾಪಟಿಯ ನಡುವೆ ಒಂದು ಮುಗ್ಧ ಪ್ರೇಮ ಕಥೆಯೂ ಗಾಂಚಲಿಯಲ್ಲಿದೆ.

ಈ ಸಿನಿಮಾ ನೋಡುವ ಸಾಕಷ್ಟು ಮಂದಿಗೆ ತಮ್ಮ ಏರಿಯಾದ ಘಟನೆಗಳು ಜ್ಞಾಪಕ ಬರುತ್ತವೆ ಎನ್ನುತ್ತಾರೆ ನಟ ಆದರ್ಶ್‌. ಸಿನಿಮಾಗೆ ಡಿಎನ್‌ಎನ್‌ ಅಶೋಕ್‌ ಅವರು ಬಂಡವಾಳ ಹೂಡಿದ್ದಾರೆ. ಈ ಸಿನಿಮಾದ ಎರಡು ಹಾಡುಗಳನ್ನು ಯೂಟ್ಯೂಬ್‌ನಲ್ಲಿ ಮಿಲಿಯನ್‌ಗಟ್ಟಲೆ ಜನ ನೋಡಿದ್ದಾರೆ. ಟೀಸರ್‌ನಿಂದ ಗಮನ ಸೆಳೆದಿರುವ ಈ ಸಿನಿಮಾ ಮೇಲೆ ಸಾಕಷ್ಟು ನಿರೀಕ್ಷೆಗಳು ಹುಟ್ಟಿಕೊಂಡಿವೆ.