99 ಚಿತ್ರವನ್ನು 99ರ ಗೆಳೆಯ ಡೈರೆಕ್ಟ್ ಮಾಡುತ್ತಿರುವುದು ತುಂಬಾ ಖುಷಿ ಎಂದ ಗಣೇಶ್‌

ಹರೀಶ್‌ ಬಸವರಾಜ್‌

*99 ಅಂದಾಕ್ಷಣ ಗಣೇಶ್‌ ಅವರಿಗೆ ಏನು ಜ್ಞಾಪಕ ಬರುತ್ತದೆ ಮತ್ತು ಈ ಸಿನಿಮಾ ನಿಮಗೇಕೆ ವಿಶೇಷ?

ನನಗೆ 99 ಅಂದಾಕ್ಷಣ ನನ್ನ ಆ ಸಿನಿಮಾನೇ ಜ್ಞಾಪಕ ಬರುತ್ತದೆ. ಇದು ನನಗೆ ಬಹಳ ವಿಶೇಷವಾದ ಸಿನಿಮಾ. ಏಕೆಂದರೆ ಈ ಪಾತ್ರ ರಿಯಲಿಸ್ಟಿಕ್‌ ಆಗಿದೆ. ಇದರಲ್ಲಿ ನಟಿಸುವುದಕ್ಕಿಂತ ನಾನು ಅನುಭವಿಸಿದ್ದೇನೆ. ಪ್ರತಿಯೊಂದು ದೃಶ್ಯದಲ್ಲಿಯೂ ಜೀವಿಸಿದ್ದೇನೆ.

*99 ಸಿನಿಮಾ ರೀತಿಯಲ್ಲಿ ನೀವು ನಿಮ್ಮ ಸ್ನೇಹಿತರ ರೀ ಯೂನಿಯನ್‌ ಆಗ್ತೀರಾ?

ಆ ರೀತಿ ಎಲ್ಲ ಗೆಳೆಯರು ಒಟ್ಟಾಗಲೂ ಇಷ್ಟ. ಆದರೆ ಸಾಕಷ್ಟು ಜನ ತಮ್ಮ ತಮ್ಮ ಕೆಲಸಗಳಲ್ಲಿ ಬಿಝಿ ಇರುತ್ತಾರೆ. ಜೂಮ್‌ ಸಿನಿಮಾ ಸಮಯದಲ್ಲಿ ಒಮ್ಮೆ ಎಲ್ಲರೂ ಸೇರಿಕೊಂಡಿದ್ದೆವು. ಎಲ್ಲಾದರೂ ಸಿಕ್ಕಾಗ ಒಮ್ಮೆ ರಿ ಯೂನಿಯನ್‌ ಆಗೋಣ ಅಂತೀವಿ. ಆದರೆ ಸಮಯವೇ ಕೂಡಿ ಬರುತ್ತಿಲ್ಲ. ಈ ಸಿನಿಮಾ ನೋಡುವ ಪ್ರತಿಯೊಬ್ಬರು 99 ಬ್ಯಾಚ್‌ಗೆ ಹೋಗಿ ಬರುತ್ತಾರೆ. ಎಲ್ಲ ಗೆಳೆಯರು ಒಮ್ಮೆ ರಿಯೂನಿಯನ್‌ ಆಗಬೇಕು ಅಂದುಕೊಳ್ತಾರೆ. ಅಷ್ಟರ ಮಟ್ಟಿಗೆ ಕನೆಕ್ಟ್ ಆಗುತ್ತದೆ.

*ಪ್ರೀತಂ ಗುಬ್ಬಿ ಮತ್ತು ನೀವು ಮೂರನೇ ಬಾರಿ ಒಟ್ಟಾಗಿದ್ದೀರಾ?

ನಾನು ಪ್ರೀತು 99ರಿಂದಲೂ ಗೆಳೆಯರು. 99 ಚಿತ್ರವನ್ನು 90ರಿಂದಲೂ ಗೆಳೆಯನಾದ ಪ್ರೀತಂ ಡೈರೆಕ್ಟ್ ಮಾಡುತ್ತಿರುವುದು ಖುಷಿ ತಂದಿದೆ. ಇಬ್ಬರ ಕಾಂಬಿನೇಶನ್‌ನಲ್ಲಿ ಬಂದಿದ್ದ ಸಿನಿಮಾಗಳು ಹಿಟ್‌ ಆಗಿವೆ. ಅಲ್ಲದೆ ಈ ಟೈಟಲ್‌ ಕೂಡಾ 99 ಎಂದೇ ಬಂದಿದ್ದು ಖುಷಿ ನೀಡಿದೆ. ಪ್ರೀತಂ, ಸಂತೋಷ್‌ ರೈ ಪಾತಾಜೆ, ಭಾವನಾ ಎಲ್ಲರೂ ಈ ಸಿನಿಮಾದಲ್ಲಿ ಮೋಡಿ ಮಾಡಿದ್ದಾರೆ ಎಂದು ಹೇಳುತ್ತೇನೆ.

*99 ಚಿತ್ರದ ವಿಶೇಷತೆಗಳೇನು?

ನಾನು ಮೊದಲೇ ಹೇಳಿದಂತೆ ಇದು ಸಿನಿಮಾ ಎನ್ನುವುದಕ್ಕಿಂತ ಒಂದು ದೊಡ್ಡ ಅನುಭವ ನಟರಿಗೆ. ಅದೇ ನೋಡುಗರಿಗೆ ಇದು ಒಂದು ಜರ್ನಿ ಎನ್ನುವ ಫೀಲ್‌ ಆಗುತ್ತದೆ. ಜನ ಎಷ್ಟೇ ದುಡಿಯಲಿ, ಎಷ್ಟೇ ದೊಡ್ಡ ಹೆಸರು ಮಾಡಿದರೂ ಕಡೆಗೆ ಉಳಿಯುವುದು ನೆನಪುಗಳು ಮಾತ್ರ. ಅದನ್ನು ಈ ಸಿನಿಮಾದಲ್ಲಿ ಹೇಳಿದ್ದೇವೆ. ಸುಂದರವಾದ ಹಾಡುಗಳು, ಸುಂದರವಾದ ಲೊಕೇಶನ್‌ಗಳು ಕಣ್ಣಿಗೆ ಇಂಪು ನೀಡುತ್ತದೆ ಇಂತಹ ಹತ್ತು ಹಲವು ವಿಶೇಷತೆಗಳು ಚಿತ್ರದಲ್ಲಿದೆ.

*ಅರ್ಜುನ್‌ ಜನ್ಯ ಅವರ ನೂರನೇ ಚಿತ್ರ ಇದು ಅವರ ಬಗ್ಗೆ?

ಅರ್ಜುನ್‌ ಅವರು ನನಗೆ ಬಹಳಷ್ಟು ಒಳ್ಳೆಯ ಹಾಡುಗಳನ್ನು ನೀಡಿದ್ದಾರೆ. 99 ಸಿನಿಮಾದಲ್ಲಿಯೂ ಮನಮುಟ್ಟು ಹಾಡುಗಳನ್ನು ಕೊಟ್ಟಿದ್ದು, ಅದಕ್ಕೆ ಜೀವ ತುಂಬವ ಕೆಲಸ ಮಾಡಿದ್ದೇವೆ. ಸಿನಿಮಾಗೆ ಹಾಡುಗಳು ಮತ್ತು ಸಂಗೀತ ಬಹಳ ಮುಖ್ಯವಾಗುತ್ತದೆ ಎಂಬುದನ್ನು ಮತ್ತೊಮ್ಮೆ ಪ್ರೂವ್‌ ಮಾಡುವಂತೆ ಸಂಗೀತ ನೀಡಿದ್ದಾರೆ ಅವರು. ನನ್ನ ಸಿನಿಮಾ ಮೂಲಕ ಅವರು ಸೆಂಚುರಿ ಹೊಡೆದಿದ್ದಕ್ಕೆ ನಾನು ಅಭಿನಂದಿಸುತ್ತೇನೆ.

-=---

ನಾನು ಸಾಕಷ್ಟು ಕಮರ್ಷಿಯಲ್‌ ಸಿನಿಮಾಗಳನ್ನು ಮಾಡುತ್ತೇನೆ. ಅಲ್ಲಿ ಡಾನ್ಸ್‌ , ಫೈಟ್‌ ಎಲ್ಲವೂ ಇರುತ್ತದೆ ಅದು ಒಂದು ರೀತಿಯಲ್ಲಿ ಜನರನ್ನು ರಂಜಿಸುತ್ತದೆ. ಆದರೆ ಈ 99 ಸಿನಿಮಾದ ಪಾತ್ರ ಒಂದು ರೀತಿ ಚಾಲೆಂಜಿಂಗ್‌ ಎನಿಸುವಂತಹದ್ದು ಅದ್ಯಾಕೆ ಎಂಬುದನ್ನು ಸಿನಿಮಾ ನೋಡಿದಾಗ ತಿಳಿಯುತ್ತದೆ.

-ಗಣೇಶ್‌, ನಟ