ವರಮಹಾಲಕ್ಷ್ಮೇ ಹಬ್ಬಕ್ಕೆ ಗುಬ್ಬಿ ಮೇಲೆ ಬ್ರಹ್ಮಾಸ್ತ್ರ

-ಹರೀಶ್‌ ಬಸವರಾಜ್‌

ರಾಜ್‌ ಬಿ. ಶೆಟ್ಟಿ ಮತ್ತು ಕವಿತಾ ಗೌಡ ನಟನೆಯ ಗುಬ್ಬಿ ಮೇಲೆ ಬ್ರಹ್ಮಾಸ್ತ್ರ ಸಿನಿಮಾ ಇದೇ ವರಮಹಾಲಕ್ಷ್ಮೇ ಹಬ್ಬಕ್ಕೆ ಬಿಡುಗಡೆಯಾಗುತ್ತಿದೆ ಎಂದು ನಿರ್ದೇಶಕ ಸುಜಯ್‌ ಶಾಸ್ತ್ರಿತಿಳಿಸಿದ್ದಾರೆ.

'ಗುಬ್ಬಿ ಮೇಲೆ ಬ್ರಹ್ಮಾಸ್ತ್ರ ಒಂದು ಕಂಪ್ಲೀಟ್‌ ಕಾಮಿಡಿ ಎಂಟರ್‌ಟೇನರ್‌. ನಾನು ಇದುವರೆಗೂ ಸಿನಿಮಾಗಳಲ್ಲಿ ನಟಿಸುತ್ತಿದ್ದೆ, ಮೊದಲ ಬಾರಿಗೆ ನಿರ್ದೇಶನ ಮಾಡಿದ್ದೇನೆ. ಜನರ ನಾಡಿಮಿಡಿತ ಅರಿತು ಚಿತ್ರಕಥೆಯನ್ನು ರಚಿಸಿದ್ದೇನೆ. ಈ ಸಿನಿಮಾ ಖಂಡಿತಾ ಪ್ರೇಕ್ಷಕರನ್ನು ನಕ್ಕು ನಗಿಸುತ್ತದೆ. ಇದೆಲ್ಲದರ ಜತೆಗೆ ಒಂದು ಸೋಷಿಯಲ್‌ ಕಂಟೆಂಟ್‌ನ್ನು ಸಹ ಇಟ್ಟಿದ್ದೇವೆ'ಎನ್ನುತ್ತಾರೆ ಸುಜಯ್‌ ಶಾಸ್ತ್ರಿ.

'ಈಗಾಗಲೇ ಬಿಡುಗಡೆಯಾಗಿರುವ ಎರಡು ಹಾಡುಗಳು ಸೋಷಿಯಲ್‌ ಮೀಡಿಯಾದಲ್ಲಿ ವೈರಲ್‌ ಆಗಿವೆ. ಇದರಿಂದ ಸಿನಿಮಾ ಮೆಲೆ ಈಗಾಗಲೇ ನಿರೀಕ್ಷೆ ಹುಟ್ಟಿಕೊಂಡಿದೆ. ಒಂದು ಮೊಟ್ಟೆಯ ಕಥೆ ಸಿನಿಮಾದ ನಂತರ ರಾಜ್‌ ಬಿ. ಶೆಟ್ಟಿ ನಾಯಕರಾಗಿ ನಟಿಸಿರುವ ಸಿನಿಮಾ ಇದು. ಈ ಸಿನಿಮಾದಲ್ಲಿ ಕಾಮಿಡಿಯನ್ನು ಬೇಕು ಅಂತ ತುರುಕಿಲ್ಲ. ಸಿನಿಮಾದ ದೃಶ್ಯಗಳು ಸಹಜವಾಗಿ ನೋಡುಗನನ್ನು ನಗುವಂತೆ ಮಾಡುತ್ತದೆ. ನಟಿ ಕವಿತಾ ಗೌಡ ಅವರ ಪಾತ್ರವೂ ಬಹಳ ಚೆನ್ನಾಗಿದೆ. ಒಟ್ಟಿನಲ್ಲಿ ನನ್ನ ಮೊದಲ ಪ್ರಯತ್ನದಲ್ಲಿ ಎಲ್ಲರನ್ನು ಖುಷಿ ಪಡಿಸಲು ಪ್ರಯತ್ನ ಪಟ್ಟಿದ್ದೇನೆ'ಎನ್ನುವುದು ಸುಜಯ್‌ ಮಾತಾಗಿದೆ.

ಅಯೋಗ್ಯ,ಚಮಕ್‌, ಬೀರಬಲ್‌ ಸಿನಿಮಾಗಳಿಗೆ ಬಂಡವಾಳ ಹಾಕಿದ್ದ ಟಿ. ಆರ್‌. ಚಂದ್ರಶೇಖರ್‌ ಗುಬ್ಬಿ ಮೇಲೆ ಬ್ರಹ್ಮಾಸ್ತ್ರ ಚಿತ್ರದ ನಿರ್ಮಾಪಕರು. 'ಗುಬ್ಬಿ ಮೇಲೆ ಬ್ರಹ್ಮಾಸ್ತ್ರ ಸಿನಿಮಾ ಕಂಪ್ಲೀಟ್‌ ಎಂಟರ್‌ಟೇನಿಂಗ್‌ ಸಬ್ಜೆಕ್ಟ್. ನಿರ್ದೇಶಕರು ಬಹಳ ಇಷ್ಟಪಟ್ಟು ಜನರನ್ನು ರಂಜಿಸಲೆಂದೇ ವಿಶಿಷ್ಟವಾಗಿ ಕಥೆಯನ್ನು ಬರೆದು ಮಾಡಿದ್ದಾರೆ. ಈಗಾಗಲೇ ಸಾಕಷ್ಟು ಜನ ಸಿನಿಮಾ ಯಾವಾಗ ಬಿಡುಗಡೆಯಾಗುತ್ತದೆ ಎಂದು ಕೇಳುತ್ತಿದ್ದರು. ಈಗ ದಿನಾಂಕವನ್ನು ಅನೌನ್ಸ್‌ ಮಾಡಿದ್ದು, ವರಮಹಾಲಕ್ಷ್ಮೇ ಹಬ್ಬಕ್ಕೆ ಕನ್ನಡಿಗರಿಗೆ ಉಡುಗೊರೆಯಾಗಿ ಈ ಸಿನಿಮಾವನ್ನು ನೀಡುತ್ತಿದ್ದೇವೆ'ಎಂದು ಅವರು ತಿಳಿಸಿದ್ದಾರೆ.

---
ವರಮಹಾಲಕ್ಷ್ಮೇ ಹಬ್ಬಕ್ಕೆ ಗುಬ್ಬಿ ಮೇಲೆ ಬ್ರಹಾಸ್ತ್ರ ಸಿನಿಮಾವನ್ನು ಬಿಡುಗಡೆ ಮಾಡುತ್ತಿದ್ದೇವೆ. ಈಗಾಗಲೇ ಸಿನಿಮಾ ಸೆನ್ಸಾರ್‌ ಮುಗಿದಿದೆ. ಯಾವುದೇ ಕಟ್‌ಗಳು ಇಲ್ಲದೇ ಯು/ಎ ಪ್ರಮಾಣ ಪತ್ರ ಸಿಕ್ಕಿದೆ.
-ಸುಜಯ್‌ ಶಾಸ್ತ್ರಿ, ನಿರ್ದೇಶಕ