ಪಡ್ಡೆಹುಲಿಯಲ್ಲಿ ಇನ್ನೊಂದು ಪ್ರೇಮಲೋಕ

ರವಿಚಂದ್ರನ್‌ ನಟನೆಯ ಪ್ರೇಮಲೋಕ ಪ್ರೇಮಿಗಳ ಪಾಲಿಗೆ ಮರೆಯಲಾಗದ ಸಿನಿಮಾ. ಈಗ ಮತ್ತೊಂದು ಪ್ರೇಮಲೋಕವನ್ನು ಸೃಷ್ಟಿಸಲು ಹೊರಟಿದ್ದಾರೆ ನಿರ್ದೇಶಕ ಗುರು ದೇಶಪಾಂಡೆ. ಇವರ ನಿರ್ದೇಶನದ 'ಪಡ್ಡೆ ಹುಲಿ' ಸಿನಿಮಾದಲ್ಲಿ ಹೊಸ ರೀತಿಯ ಲವ್‌ಸ್ಟೋರಿ ಇದ್ದು, ಅದಕ್ಕೆ ತಕ್ಕಂತೆ ಹಾಡುಗಳನ್ನೂ ಬರೆಸಿದ್ದಾರೆ.

ಈ ಚಿತ್ರದ ಮೂಲಕ ನಿರ್ಮಾಪಕ ಕೆ.ಮಂಜು ಅವರ ಪುತ್ರ ಶ್ರೇಯಸ್‌ ಸಿನಿಮಾ ರಂಗಕ್ಕೆ ಪ್ರವೇಶ ಮಾಡುತ್ತಿದ್ದಾರೆ. ಹೀರೋ ಆಗಿ ರಂಗ ಪ್ರವೇಶ ಮಾಡಲು ಅವರು ಎಲ್ಲ ವಿಭಾಗಗಳಲ್ಲಿಯೂ ತಯಾರಿ ಮಾಡಿಕೊಂಡಿದ್ದಾರೆ. ಮೊದಲ ಸಿನಿಮಾದಲ್ಲಿಯೇ ವಿಭಿನ್ನ ಪಾತ್ರ ಮಾಡಿದ್ದ ಎಂದು ನಿರ್ದೇಶಕ ಗುರು ದೇಶಪಾಂಡೆ ತಿಳಿಸಿದ್ದಾರೆ.

'ವರ್ತಮಾನದ ಯುವಕ ಯುವತಿಯರು ಇಷ್ಟಪಡುವಂಥ ಸಿನಿಮಾ ಇದು. ಅವರ ಕನಸುಗಳನ್ನೇ ಈ ಚಿತ್ರದಲ್ಲಿ ಹೇಳುವ ಪ್ರಯತ್ನ ಮಾಡಿದ್ದೇನೆ. ಕಥಾ ನಾಯಕ ಇಲ್ಲಿ ಮಧ್ಯಮ ವರ್ಗದ ಕುಟುಂಬದವನು. ಅವನ ತೊಳಲಾಟ ಮತ್ತು ಪ್ರೀತಿಯ ಭಾವನೆಗಳನ್ನು ಹಿಡಿದಿಟ್ಟಿದ್ದೇನೆ. ಹಾಗಾಗಿ ಇದೊಂದು ವಿಶೇಷ ಸಿನಿಮಾ ಅನಿಸಿಕೊಳ್ಳಲಿದೆ' ಎಂದಿದ್ದಾರೆ ಅವರು. ಶ್ರೇಯಸ್‌ಗೆ ಜತೆಯಾಗಿ ನಿಶ್ವಿಕಾ ನಾಯ್ಡು ನಟಿಸಿದ್ದಾರೆ. ಅವರು ಇಲ್ಲಿ ಕಾಲೇಜು ಹುಡುಗಿಯಾಗಿ ಕಾಣಿಸಿಕೊಂಡಿದ್ದಾರೆ.