ಚಿತ್ರರಂಗದಲ್ಲಿ ಕ್ಯಾಸ್ಟಿಂಗ್ ಕೌಚ್ ಇದೆ ಎಂದು ಹೇಳಿದ್ದ ನಟಿ ಶ್ರುತಿ ಹರಿಹರನ್ ಲೈಂಗಿಕ ದೌರ್ಜನ್ಯಕ್ಕೆ ಒಳಗಾಗದಂತೆ ಎಚ್ಚರಿಕೆಯಿಂದ ಇರಬೇಕು ಎಂದು ಹೇಳಿದ್ದರು. ಇದೀಗ ನಟಿ ಹರಿಪ್ರಿಯಾ ನಟಿಯರು ಸ್ಟ್ರಿಕ್ಟ್ ಆಗಿದ್ದರೆ ಇಂಥ ಸಮಸ್ಯೆ ಎದುರಾಗುವುದಿಲ್ಲ ಎಂದಿದ್ದಾರೆ.
'ಚಿತ್ರರಂಗದಲ್ಲಿ ನಾವು ಹೇಗಿರುತ್ತೇವೋ ಹಾಗೆ ಜನ ನಮ್ಮೊಂದಿಗೆ ವರ್ತಿಸುತ್ತಾರೆ. ಹಾಗಾಗಿ ನಾವು ಸ್ಟ್ರಿಕ್ಟ್ ಆಗಿದ್ದರೆ ಯಾರೂ ಏನೂ ಮಾಡಲು ಸಾಧ್ಯವಿಲ್ಲ' ಎಂದಿದ್ದಾರೆ ಹರಿಪ್ರಿಯಾ.
ಚಿತ್ರರಂಗದಲ್ಲಿ ಕೆಲವೊಮ್ಮೆ ಪರಸ್ಪರ ಒಪ್ಪಿಗೆಯಿಂದಲೂ ನಟಿಯರು ತೊಂದರೆಯನ್ನು ಮೈಮೇಲೆ ಎಳೆದುಕೊಂಡಿರಬಹುದು ಎನ್ನುತ್ತಾರೆ ಅವರು. 'ಎಷ್ಟೋ ಸಾರಿ ಪರಸ್ಪರ ಒಪ್ಪಿಗೆ ಇದ್ದೇ ಇದೆಲ್ಲಾ ನಡೆಯುವ ಸಾಧ್ಯತೆ ಇರುತ್ತದೆ. ಆಗ ಗಂಡಸರನ್ನು ದೂರಿ ಏನೂ ಪ್ರಯೋಜನ ಇಲ್ಲ. ನಟಿಯರು ನಿಷ್ಠುರವಾಗಿದ್ದರೆ ಏನೂ ತೊಂದರೆ ಇರುವುದಿಲ್ಲ' ಎನ್ನುತ್ತಾರೆ ಅವರು.
ಪರಭಾಷಾ ಚಿತ್ರರಂಗದಲ್ಲೂ ಹೆಸರು ಮಾಡಿರುವ ನಟಿ ಹರಿಪ್ರಿಯಾ. 'ಕೆಲವರು ನಟಿಯಾಗಲು ಅವಕಾಶಕ್ಕಾಗಿ ಹಾತೊರೆಯುತ್ತಿರುತ್ತಾರೆ. ಆಗ ಈ ರೀತಿ ರಾಜಿ ಮಾಡಿಕೊಳ್ಳಬಹುದು. ಎಲ್ಲರೂ ಈ ರೀತಿ ಇರುವುದಿಲ್ಲ. ನಟಿಯಾಗಲೇ ಬೇಕು ಎಂಬ ಹಂಬಲವೂ ನನಗಿರಲಿಲ್ಲ. ಹಾಗಾಗಿ ನಾನು ಎಲ್ಲೂ ರಾಜಿ ಮಾಡಿಕೊಳ್ಳುವ ಪ್ರಶ್ನೆಯೇ ಎದುರಾಗಲಿಲ್ಲ. ಒಂದೆರಡು ಚಿತ್ರಗಳಲ್ಲಿ ನಟಿಸಿದ ನಂತರ ನನಗೆ ಸಿನಿಮಾ ಮೇಲೆ ಪ್ರೀತಿ ಉಂಟಾಯಿತು. ನಾನು ಎಂದೂ ಇಂಥ ಸಂದರ್ಭವನ್ನು ಎದುರಿಸಿಲ್ಲ' ಎಂದಿದ್ದಾರೆ ಹರಿಪ್ರಿಯಾ.
'ಶ್ರುತಿ ಹರಿಹರನ್ ನೀಡಿರುವ ಹೇಳಿಕೆಗೆ ತಾವು ಈ ರೀತಿ ಪ್ರತಿಕ್ರಿಯೆ ನೀಡಲು ಹೀಗೆ ಹೇಳುತ್ತಿಲ್ಲ. ಚಿತ್ರರಂಗದಲ್ಲಿ ನಾನು ಬೆಳೆದು ಬಂದ ಬಗೆ ಇದು. ನನ್ನ ಅನುಭವ ಹೇಳುತ್ತಿದ್ದೇನೆ ಅಷ್ಟೆ' ಎಂದೂ ಮಾತು ಸೇರಿಸಿದ್ದಾರೆ ಹರಿಪ್ರಿಯಾ.