ರಾಧಿಕಾ ಕುಮಾರಸ್ವಾಮಿ ಪಾಲಿಗೆ ಮುಳುವಾಯಿತೇ ಹೆವಿ ಕಾಸ್ಟ್ಯೂಮ್?

ಭೈರಾದೇವಿ ಚಿತ್ರೀಕರಣದಲ್ಲಿ ನಟಿ ರಾಧಿಕಾ ಕುಮಾರಸ್ವಾಮಿ ಗಾಯಗೊಂಡಿದ್ದು ಗೊತ್ತೇ ಇದೆ. ಶಾಂತಿನಗರ ಸ್ಮಶಾನದಲ್ಲಿ ನಡೆದ ಚಿತ್ರೀಕರಣದಲ್ಲಿ ಡ್ಯಾನ್ಸ್ ಮಾಡುವಾಗ ಬಿದ್ದು ಅವರ ಬೆನ್ನುಹುರಿಗೆ ಗಾಯವಾಗಿದ್ದು ಒಂದು ತಿಂಗಳು ವಿಶ್ರಾಂತಿ ಪಡೆಯುವಂತೆ ವೈದ್ಯರು ಸೂಚಿಸಿದ್ದಾರೆ. ಇಷ್ಟಕ್ಕೂ ಈ ಘಟನೆ ನಡೆಯಲು ಅವರು ಹಾಕಿಕೊಂಡಿದ್ದ ಅತ್ಯಂತ ತೂಕದ ಕಾಸ್ಟ್ಯೂಮ್ ಕಾರಣ ಎನ್ನಲಾಗಿದೆ.

ಅದ್ದೂರಿ ಕಾಸ್ಟ್ಯೂಮ್ ತೊಟ್ಟು ಸಾಕಷ್ಟು ಸಮಯ ರಾಧಿಕಾ ಅವರು ಚಿತ್ರೀಕರಣದಲ್ಲಿ ಭಾಗಿಯಾದ ಕಾರಣ ಜಾರಿ ಬಿದ್ದುಬಿಟ್ಟಿದ್ದಾರೆ ಎಂದಿವೆ ಮೂಲಗಳು. ಭೈರಾದೇವಿ ಗೆಟಪ್‌ನಲ್ಲಿ ಇದ್ದ ಕಾರಣ ಅವರ ಕೊರಳಿಗೆ ನಿಂಬೆ ಹಣ್ಣಿನ ಮಾಲೆ, ಹೂವು, ಒಂದಷ್ಟು ಹಾರಗಳು, ಆಭರಣಗಳು ಇವೆಲ್ಲವೂ ಸೇರಿ ಸಿಕ್ಕಾಪಟ್ಟೆ ಕಾಸ್ಟ್ಯೂಮ್ ಹಾಕಲಾಗಿತ್ತು. ಇದನ್ನು ಬಹಳಷ್ಟು ಸಮಯ ಹೊತ್ತು ಅವರು ಕಡೆಗೆ ಆಯತಪ್ಪಿ ಬಿದ್ದಿದ್ದಾರೆ ಎಂದಿವೆ ಮೂಲಗಳು.

ಈ ಚಿತ್ರವನ್ನು ರಾಧಿಕಾ ಅವರು ತಮ್ಮ ಸ್ವಂತ ಬ್ಯಾನರ್ ಶಮಿಕಾ ಎಂಟರ್‌ಪ್ರೈಸಸ್ ಲಾಂಛನದಲ್ಲಿ ನಿರ್ಮಿಸುತ್ತಿದ್ದಾರೆ. ಪೌರಾಣಿಕ ಸಿನಿಮಾದ ಪಾತ್ರವರ್ಗದಲ್ಲಿ ರಮೇಶ್ ಅರವಿಂದ್ ಹಾಗೂ ರವಿಶಂಕರ್ ಸಹ ಇದ್ದಾರೆ. ಶ್ರೀವಿಜಯ ಆ್ಯಕ್ಷನ್ ಕಟ್ ಹೇಳುತ್ತಿರುವ ಸಿನಿಮಾ.

2015ರಲ್ಲಿ ರುದ್ರ ತಾಂಡವ ಬಳಿಕ ಅವರು ಯಾವುದೇ ಸಿನಿಮಾದಲ್ಲಿ ಅಭಿನಯಿಸಿರಲಿಲ್ಲ. ಇದೀಗ ಭೈರಾದೇವಿ ಸಿನಿಮಾ ಮೂಲಕ ಪ್ರೇಕ್ಷಕರ ಮುಂದೆ ಬರುತ್ತಿದ್ದಾರೆ. ಇದರ ಜತೆಗೆ ದಮಯಂತಿ, ರಾಜೇಂದ್ರ ಪೊನ್ನಪ್ಪ ಸಿನಿಮಾಗಳಲ್ಲೂ ಅಭಿನಯಿಸುತ್ತಿದ್ದಾರೆ. ಈ ಹಿಂದೆ ಲಕ್ಕಿ ಮತ್ತು ಸ್ವೀಟಿ ನನ್ನ ಜೋಡಿ ಸಿನಿಮಾಗಳನ್ನು ರಾಧಿಕಾ ನಿರ್ಮಿಸಿದ್ದಾರೆ.