'ಕೆಜಿಎಫ್‌ 2' ಡಿಜಿಟಲ್‌ ರೈಟ್ಸ್‌ಗೆ ಭಾರೀ ಬೇಡಿಕೆ! ನಿರ್ಮಾಪಕರಿಗೆ ಭರ್ಜರಿ ಆಫರ್‌ ನೀಡಿದ ಅಮೆಜಾನ್‌?

'ರಾಕಿಂಗ್ ಸ್ಟಾರ್' ಯಶ್‌ ನಟನೆಯ 'ಕೆಜಿಎಫ್‌' ಚಿತ್ರವು ಮಾಡಿದ ದಾಖಲೆಗಳು ಒಂದೆರಡಲ್ಲ. ನಟ ಯಶ್‌ ಅವರನ್ನು ನ್ಯಾಷನಲ್ ಸ್ಟಾರ್ ಮಾಡಿದ ಸಿನಿಮಾವಿದು. ಇದೀಗ ಎಲ್ಲರ ಗಮನ 'ಕೆಜಿಎಫ್‌ ಚಾಪ್ಟರ್ 2' ಮೇಲಿದೆ. ಈಗಾಗಲೇ ಅದರ ಬಹುತೇಕ ಚಿತ್ರೀಕರಣವೂ ಮುಗಿದಿದೆ. ಅಕ್ಟೋಬರ್ 23ರಂದು ಐದು ಭಾಷೆಗಳಲ್ಲಿ ಸಿನಿಮಾವನ್ನು ತೆರೆಗೆ ತರುವುದಾಗಿ ಈಗಾಗಲೇ ತಂಡ ಹೇಳಿಕೊಂಡಿದೆ. ಈ ಮಧ್ಯೆ ಚಿತ್ರದ ಡಿಜಿಟಲ್‌ ಹಕ್ಕುಗಳಿಗೆ ಭರ್ಜರಿ ಬೇಡಿಕೆ ಬಂದಿದೆಯಂತೆ!

55 ಕೋಟಿ ರೂ. ಆಫರ್!
ಮೂಲಗಳ ಪ್ರಕಾರ, ಅಮೆಜಾನ್‌ ಪ್ರೈಮ್‌ ಈ ಸಿನಿಮಾದ ಎಲ್ಲ ಭಾಷೆಯ ಆನ್‌ಲೈನ್‌ ಪ್ರಸಾರದ ಹಕ್ಕಗಳನ್ನು ಕೊಳ್ಳಲು ನಿರ್ಧಾರ ಮಾಡಿದೆಯಂತೆ. ಅದಕ್ಕಾಗಿ 55 ಕೋಟಿ ರೂ.ಗಳ ದೊಡ್ಡ ಡೀಲ್‌ ಅನ್ನೇ ನೀಡಿದೆಯಂತೆ. 'ಕೆಜಿಎಫ್‌ 2' ಚಿತ್ರದ ಕನ್ನಡ, ಹಿಂದಿ, ತೆಲುಗು, ತಮಿಳು, ಮಲಯಾಳಂ ವರ್ಷನ್ ಸೇರಿ ಈ ಮೊತ್ತವನ್ನು ಅಮೆಜಾನ್ ಕೋಟ್ ಮಾಡಿದೆಯಂತೆ. ಆದರೆ, ಆ ಆಫರ್‌ಗೆ ಚಿತ್ರತಂಡದ ಪ್ರತಿಕ್ರಿಯೆ ಏನು ಎಂಬುದು ಸದ್ಯಕ್ಕಂತೂ ತಿಳಿದುಬಂದಿಲ್ಲ.

'ಕೆಜಿಎಫ್‌ ಚಾಪ್ಟರ್‌ 1'ಗಿಂತ 'ಕೆಜಿಎಫ್‌ 2' ಇನ್ನಷ್ಟು ಅದ್ದೂರಿಯಾಗಿರಲಿದೆ ಎಂದು ಅನೇಕ ಬಾರಿ ಯಶ್‌ ಹೇಳಿದ್ದಾರೆ. ಅಲ್ಲದೆ, ಅಭಿಮಾನಿಗಳು ಈ ಸಿನಿಮಾದ ಮೇಲೆ ಸಾಕಷ್ಟು ನಿರೀಕ್ಷೆ ಇಟ್ಟುಕೊಂಡಿದ್ದಾರೆ. ಡಿಜಿಟಲ್‌ ಮಾತ್ರವಲ್ಲದೆ, ವಿತರಣೆಗೂ ಭಾರೀ ಬೇಡಿಕೆ ಇದೆ. ಬಾಲಿವುಡ್‌ನಲ್ಲಿ ಅನಿಲ್‌ ತಡಾನಿ, ಫರ್ಹಾನ್ ಅಖ್ತರ್ ಇದರ ವಿತರಣೆಯನ್ನು ಮಾಡಲಿದ್ದಾರೆ. ಪ್ರಶಾಂತ್ ನೀಲ್‌ ನಿರ್ದೇಶನದಲ್ಲಿ ಮೂಡಿಬರುತ್ತಿರುವ 'ಕೆಜಿಎಫ್‌ 2' ಚಿತ್ರದಲ್ಲಿ ಬಾಲಿವುಡ್ ನಟ ಸಂಜಯ್ ದತ್ ಮತ್ತು ನಟಿ ರವೀನಾ ಟಂಡನ್ ನಟಿಸಿದ್ದಾರೆ.

ರಾಕಿ ಭಾಯ್‌ ಅಡ್ಡಕ್ಕೆ ಪ್ರಧಾನಿಗೂ ಎಂಟ್ರಿ ಇಲ್ಲ! 'ಕೆಜಿಎಫ್‌ ಚಾಪ್ಟರ್‌ 2' ಕಥೆಯ ಎಳೆ ಬಿಟ್ಟುಕೊಟ್ಟರಾ ಯಶ್‌?

ಅಧೀರ ಪಾತ್ರದಲ್ಲಿ ಸಂಜು ಕಾಣಿಸಿಕೊಂಡಿದ್ದರೆ, ಪ್ರಧಾನಿಯಾಗಿ ರವೀನಾ ಬಣ್ಣ ಹಚ್ಚಿದ್ದಾರೆ. ಯಶ್‌ಗೆ ನಾಯಕಿಯಾಗಿ ಶ್ರೀನಿಧಿ ಶೆಟ್ಟಿ ನಟಿಸಿದ್ದಾರೆ. ರವಿ ಬಸ್ರೂರ್ ಸಂಗೀತ ಚಿತ್ರಕ್ಕಿದೆ. ವಿಜಯ್ ಕಿರಗಂದೂರು ಈ ಭಾರೀ ಬಜೆಟ್‌ನ ಚಿತ್ರಕ್ಕೆ ಬಂಡವಾಳ ಹೂಡಿದ್ದಾರೆ.