ಐ ಲವ್‌ ಯೂ ಚಿತ್ರವನ್ನು ಇಡೀ ಫ್ಯಾಮಿಲಿ ನೋಡಬಹುದು ಎಂದ ರಚಿತಾ

* ಶರಣು ಹುಲ್ಲೂರು

Vijaya Karnataka Web

ನಾನು ಐ ಲವ್‌ ಯೂ ಚಿತ್ರದಲ್ಲಿ ಗ್ಲಾಮ್‌ ಲುಕ್‌ನಲ್ಲಿ ಕಾಣಿಸಿಕೊಂಡಿದ್ದರೂ, ಇದೊಂದು ಫ್ಯಾಮಿಲಿ ಎಂಟರ್‌ಟೇನರ್‌ ಸಿನಿಮಾ ಎಂದು ತಿಳಿಸಿದ್ದಾರೆ ಚಿತ್ರದ ನಾಯಕಿ ರಚಿತಾ ರಾಮ್‌.

'ಕುಟುಂಬ ಸಮೇತ ನೋಡುವಂಥ ಚಿತ್ರವಿದು. ಅದರಲ್ಲೂ ಯುವಕ ಯುವತಿಯರು ಕಡ್ಡಾಯವಾಗಿ ನೋಡುವಂಥ ಚಿತ್ರ. ಫ್ಯಾಮಿಲಿ ಸಮೇತ ಚಿತ್ರಕ್ಕೆ ಬನ್ನಿ' ಎಂದು ಪ್ರೇಕ್ಷಕರಿಗೆ ಕರೆ ನೀಡಿದ್ದಾರೆ ಅವರು.

ಐ ಲವ್‌ ಯೂ ಸಿನಿಮಾದಲ್ಲಿ ರಚಿತಾ ತುಂಬಾ ಹಾಟ್‌ ಆಗಿ ಕಾಣಿಸಿಕೊಂಡಿರುವ ಸುದ್ದಿ ಸ್ಯಾಂಡಲ್‌ವುಡ್‌ನಲ್ಲಿ ಭಾರೀ ಸದ್ದು ಮಾಡುತ್ತಿದೆ. ಕನ್ನಡದ ಹುಡುಗಿಯರು ಇಂಥ ಪಾತ್ರಗಳಲ್ಲೂ ನಟಿಸಬಹುದಾ ಎಂಬ ಅಚ್ಚರಿ ಮೂಡಿತ್ತು. ಅದಕ್ಕೆ ರಚಿತಾ ಈ ಹೀಗೆ ಉತ್ತರಿಸಿದ್ದಾರೆ.

'ಇದೊಂದು ಕೌಟುಂಬಿಕ ಸಿನಿಮಾ. ಈ ರೀತಿಯ ಸಿನಿಮಾದಲ್ಲಿ ಆ ದೃಶ್ಯ ಯಾಕೆ ಬರುತ್ತದೆ ಎನ್ನುವ ಪ್ರಶ್ನೆ ಸಹಜವಾಗಿ ಎಲ್ಲರಲ್ಲೂ ಮೂಡುತ್ತದೆ. ಸಿನಿಮಾ ನೋಡಿದ ನಂತರ ಉತ್ತರ ಸಿಗಲಿದೆ. ರಚಿತಾ ಒಳ್ಳೆಯ ನಟಿ. ತುಂಬಾ ಚೆನ್ನಾಗಿ ನಟಿಸಿದ್ದಾರೆ. ಈ ಹೊತ್ತಿನ ಹುಡುಗಿಯರ ಪಾತ್ರವನ್ನು ಅವರು ಮಾಡಿದ್ದಾರೆ. ಒಂದೊಳ್ಳೆ ಸಂದೇಶ ಇರುವಂಥ ಚಿತ್ರ ಇದಾಗಿದೆ' ಎನ್ನುತ್ತಾರೆ ನಿರ್ದೇಶಕ ಆರ್‌.ಚಂದ್ರು.

'ಪ್ರತಿ ಪಾತ್ರಕ್ಕೂ ತನ್ನದೇ ಆದ ಹಿನ್ನೆಲೆಯಿದೆ. ನಮ್ಮ ಸಮಾಜದಲ್ಲಿ ನಡೆಯುವ ಅನೇಕ ಘಟನೆಗಳನ್ನು ಸಿನಿಮಾದಲ್ಲಿ ತೋರಿಸುವ ಪ್ರಯತ್ನ ಮಾಡಿದ್ದೇವೆ. ಆದಷ್ಟು ನೈಜತೆಗೆ ಹತ್ತಿರ ಆಗುವಂತೆ ಚಿತ್ರ ಮಾಡಿದ್ದೇವೆ. ರಚಿತಾ ರಾಮ್‌ ಮಾಡಿರುವ ಪಾತ್ರದ ಬಗ್ಗೆ ಹೇಳಿದರೆ ಕ್ಯೂರಿಯಾಸಿಟಿ ಇರುವುದಿಲ್ಲ. ಅದನ್ನು ಸಿನಿಮಾದಲ್ಲಿಯೇ ನೋಡಲಿ' ಎನ್ನುತ್ತಾರೆ ನಿರ್ದೇಶಕರು.

ಇದೇ ಮೊದಲ ಬಾರಿಗೆ ರಚಿತಾ ರಾಮ್‌ ಮತ್ತು ಉಪೇಂದ್ರ ಪ್ರಧಾನ ಪಾತ್ರದಲ್ಲಿ ಕಾಣಿಸಿಕೊಂಡಿದ್ದಾರೆ. ಜೂ.14ರಂದು ಕನ್ನಡ ಮತ್ತು ತೆಲುಗಿನಲ್ಲಿ ಏಕಕಾಲಕ್ಕೆ ಈ ಚಿತ್ರ ಬಿಡುಗಡೆ ಆಗಲಿದೆ. ಸೋನು ಗೌಡ ಕೂಡ ಸಿನಿಮಾದಲ್ಲಿ ನಟಿಸಿದ್ದಾರೆ.

ಇದೊಂದು ಕೌಟುಂಬಿಕ ಸಿನಿಮಾ. ಜತೆಗೆ ಕ್ಯೂಟ್‌ ಆಗಿರುವಂಥ ಲವ್‌ ಸ್ಟೋರಿ ಕೂಡ ಚಿತ್ರದಲ್ಲಿದೆ. ಕುಟುಂಬದ ಪ್ರತಿ ಸದಸ್ಯರಿಗೂ ಈ ಸಿನಿಮಾ ಅನ್ವಯ ಆಗಲಿದೆ.

- ರಚಿತಾ ರಾಮ್‌, ನಟಿ