325 ಥಿಯೇಟರ್‌ನಲ್ಲೂ 25ನೇ ದಿನದತ್ತ ಮುನ್ನುಗ್ಗಿದೆ 'ಐ ಲವ್‌ ಯು'

* ಶರಣು ಹುಲ್ಲೂರು

Vijaya Karnataka Web

ಉಪೇಂದ್ರ ಮತ್ತು ನಿರ್ದೇಶಕ ಆರ್‌.ಚಂದ್ರು ಕಾಂಬಿನೇಷನ್‌ನ 'ಐ ಲವ್‌ ಯು' ಸಿನಿಮಾ ದಾಖಲೆ ಬರೆದಿದೆ. ಬಿಡುಗಡೆಯಾದ 325 ಚಿತ್ರಮಂದಿರಗಳಲ್ಲೂ 25ನೇ ದಿನದತ್ತ ಮುನ್ನುಗ್ಗುತ್ತಿದೆ. ಕನ್ನಡ ಸಿನಿಮಾವೊಂದು ರಿಲೀಸ್‌ ಆದ ಅಷ್ಟೂ ಚಿತ್ರಮಂದಿರಗಳಲ್ಲಿ ಇದೇ ಮೊದಲ ಬಾರಿಗೆ 25 ದಿನಗಳ ಪ್ರದರ್ಶನ ಕಾಣುತ್ತಿರುವುದು ಚಿತ್ರತಂಡಕ್ಕೆ ಸಹಜವಾಗಿ ಸಂಭ್ರಮ ತಂದಿದೆ. ಜತೆಗೆ ತಮಿಳು ಮತ್ತು ಹಿಂದಿಯಿಂದಲೂ ಭಾರೀ ಡಿಮಾಂಡ್‌ ಕ್ರಿಯೇಟ್‌ ಆಗಿದೆ.

'ಐ ಲವ್‌ ಯು ಸಿನಿಮಾವನ್ನು ಜನರು ಸ್ವೀಕರಿಸುತ್ತಾರೆ ಎಂಬ ನಂಬಿಕೆ ನನಗಿತ್ತು. ಆದರೆ, ಭಾರೀ ಪ್ರಮಾಣದಲ್ಲಿ ರಿಸೀವ್‌ ಮಾಡುತ್ತಾರೆ ಎಂದುಕೊಂಡಿರಲಿಲ್ಲ. ಪ್ರೇಕ್ಷಕರು ಸ್ವೀಕರಿಸಿದ ರೀತಿಗೆ ನಾವು ಋುಣಿ ಆಗಿದ್ದೇವೆ. ತೆಲುಗಿನಲ್ಲೂ ಕೂಡ ಉತ್ತಮ ಪ್ರತಿಕ್ರಿಯೆ ವ್ಯಕ್ತವಾಗಿದೆ. ಹಾಗಾಗಿ ತಮಿಳು ಮತ್ತು ಹಿಂದಿ ರೈಟ್ಸ್‌ಗೆ ಡಿಮಾಂಡ್‌ ಕ್ರಿಯೇಟ್‌ ಆಗಿದೆ. ಡಬ್ಬಿಂಗ್‌ ಹಕ್ಕುಗಳನ್ನು ಕೊಡಬೇಕೋ ಅಥವಾ ಸಿನಿಮಾ ಮಾಡಬೇಕೋ ಎಂಬ ಮಾತುಕತೆ ನಡೆಯುತ್ತಿದೆ' ಎನ್ನುತ್ತಾರೆ ನಿರ್ದೇಶಕ ಆರ್‌.ಚಂದ್ರು.

ಕ್ರಿಕೆಟ್‌ ಮತ್ತು ಇತರ ಚಿತ್ರಗಳು ರಿಲೀಸ್‌ ಆದರೂ, ತಮ್ಮ ಚಿತ್ರಕ್ಕೆ ಯಾವುದೇ ರೀತಿಯಲ್ಲಿ ತೊಂದರೆ ಆಗಿಲ್ಲ ಎನ್ನುತ್ತಾರೆ ನಿರ್ದೇಶಕರು. 'ಸಾಮಾನ್ಯವಾಗಿ ಸಿನಿಮಾಗಳಿಗೆ ಕ್ರಿಕೆಟ್‌ ತೊಂದರೆ ಮಾಡುತ್ತದೆ ಎಂಬ ವಾದವಿದೆ. ಆದರೆ, ಕ್ರಿಕೆಟ್‌ ಪಂದ್ಯ ಇದ್ದಾಗಲೂ ಒಳ್ಳೆಯ ಕಲೆಕ್ಷನ್‌ ಆಗಿದೆ ಎನ್ನುತ್ತಿದ್ದಾರೆ ವಿತರಕರು. ಉತ್ತಮ ಸಿನಿಮಾ ಮಾಡಿದರೆ, ಜನರು ನೋಡುತ್ತಾರೆ ಎಂಬುದನ್ನು ನಮ್ಮ ಚಿತ್ರ ಸಾಬೀತು ಮಾಡಿದೆ' ಎನ್ನುವುದು ನಿರ್ದೇಶಕರ ಮಾತು.

ಯಾವುದೇ ಅಡೆತಡೆಯಿಲ್ಲದೇ, ರಿಲೀಸ್‌ ಆದ ಅಷ್ಟೂ ಚಿತ್ರಮಂದಿರಗಳಲ್ಲೂ ಐ ಲವ್‌ ಯೂ ಸಿನಿಮಾ 25ನೇ ದಿನದತ್ತ ಮುನ್ನುಗ್ಗುತ್ತಿದೆ. ಇದು ಕನ್ನಡಿಗರ ಗೆಲುವು ಎಂದು ಭಾವಿಸುವೆ.

- ಆರ್‌.ಚಂದ್ರು, ನಿರ್ದೇಶಕ