ರಕ್ಷಿತ್‌ ಶೆಟ್ಟಿ '777 ಚಾರ್ಲಿ' ಸಿನಿಮಾದ ಇಂಟ್ರಸ್ಟಿಂಗ್‌ ಸಂಗತಿ ಬಹಿರಂಗ

ಕಿರಣ್‌ ರಾಜ್‌ ನಿರ್ದೇಶನದ '777 ಚಾರ್ಲಿ' ಸಿನಿಮಾದ ಇಂಟ್ರಸ್ಟಿಂಗ್‌ ಸಂಗತಿಯೊಂದು ಬಹಿರಂಗವಾಗಿದೆ. ರಕ್ಷಿತ್‌ ಶೆಟ್ಟಿ ಮುಖ್ಯ ಭೂಮಿಕೆಯ ಈ ಸಿನಿಮಾದ ಶೂಟಿಂಗ್‌ ನಡೆದಿದ್ದು, ಕಥಾ ನಾಯಕನ ಬಾಲ್ಯದ ದೃಶ್ಯಗಳನ್ನು ಸೆರೆ ಹಿಡಿಯುತ್ತಿದ್ದಾರೆ ನಿರ್ದೇಶಕರು.

ರಕ್ಷಿತ್‌ ಶೆಟ್ಟಿ ಅವರ ಬಾಲ್ಯದ ಪಾತ್ರವನ್ನು ಡ್ರಾಮಾ ಜ್ಯೂನಿಯರ್ಸ್‌ ಖ್ಯಾತಿಯ ಶಾರ್ವರಿ ಮಾಡುತ್ತಿದ್ದಾರೆ. ಕಥಾ ನಾಯಕನ ತಂಗಿಯ ಪಾತ್ರವನ್ನು ಏಳು ವರ್ಷದ ಬಾಲಕಿ ಪ್ರಾಣ್ಯ ಪಿ.ರಾವ್‌ ನಿರ್ವಹಿಸುತ್ತಿದ್ದಾರೆ.

'ಈ ಬಾಲ ಕಲಾವಿದರಿಬ್ಬರ ವಯಸ್ಸು ಏಳು. ಚೂಟಿ ಮಕ್ಕಳು. ಶಾರ್ವರಿ ಡ್ರಾಮಾ ಜ್ಯೂನಿಯರ್‌ ಪ್ರತಿಭೆ. ಪ್ರಾಣ್ಯ ಅದ್ಭುತವಾಗಿ ಡಬ್‌ ಸ್ಮ್ಯಾಶ್‌ ಮಾಡುತ್ತಾಳೆ. ಬಾಲ್ಯವನ್ನು ನೆನಪಿಸುವಂಥ ಪಾತ್ರಗಳು ಇವಾಗಿದ್ದರೂ, ಸಿನಿಮಾದಲ್ಲಿ ಮಹತ್ವದ ಪಾತ್ರ ವಹಿಸುತ್ತವೆ' ಎನ್ನುತ್ತಾರೆ ನಿರ್ದೇಶಕರು.

ಪ್ರಾಣಿ ಮತ್ತು ಮನುಷ್ಯನ ಸಂಬಂಧದ ಸುತ್ತ ಹೆಣೆದಿರುವ ಕಥೆ ಚಿತ್ರದಲ್ಲಿದ್ದು, ನಾಯಿಯೂ ಕೂಡ ಪ್ರಮುಖ ಪಾತ್ರದಲ್ಲಿ ನಟಿಸುತ್ತಿರುವುದು ವಿಶೇಷ. '777 ಚಾರ್ಲಿ ಎಂದು ಶೀರ್ಷಿಕೆ ಇಟ್ಟಾಗಲೇ ಎಲ್ಲರೂ ಇದರ ಅರ್ಥವನ್ನು ತಿಳಿದುಕೊಳ್ಳಲು ಬಯಸಿದರು. ಕಥೆಗೂ ಮತ್ತು ಟೈಟಲ್‌ಗೂ ಸಂಬಂಧವಿದೆ. ಅದು ಏನು ಎನ್ನುವುದನ್ನು ಸಿನಿಮಾದಲ್ಲಿಯೇ ನೋಡಿ' ಎನ್ನುತ್ತಾರೆ ನಿರ್ದೇಶಕರು. ನಿರ್ದೇಶಕರ ಚೊಚ್ಚಲು ಸಿನಿಮಾ ಇದಾಗಿದ್ದು, ಪುಷ್ಕರ್‌ ಮಲ್ಲಿಕಾರ್ಜುನಯ್ಯ ಈ ಚಿತ್ರವನ್ನು ನಿರ್ಮಾಣ ಮಾಡುತ್ತಿದ್ದಾರೆ.