2019ರ ಲೋಕಸಭೆ ಚುನಾವಣೆಗೆ ಉಪೇಂದ್ರ ಸ್ಪರ್ಧಿಸುತ್ತಾರಾ?

ರಿಯಲ್ ಸ್ಟಾರ್ ಉಪೇಂದ್ರ ಅವರ ಹೊಸ ರಾಜಕೀಯ ಪಕ್ಷ 'ಉತ್ತಮ ಪ್ರಜಾಕೀಯ ಪಕ್ಷ' ಬರಲಿರುವ ಲೋಕಸಭೆ ಚುನಾವಣೆಯ 28 ಕ್ಷೇತ್ರಗಳಿಂದ ತಮ್ಮ ಅಭ್ಯರ್ಥಿಗಳನ್ನು ಕಣಕ್ಕಿಳಿಸುತ್ತಿದೆ. ಈ ಬಗ್ಗೆ ಸ್ವತಃ ಉಪೇಂದ್ರ ಟ್ವೀಟ್ ಮಾಡಿದ್ದು ಪಕ್ಷದ ಮುಂದಿನ ನಡೆ ಬಗ್ಗೆ ಟ್ವೀಟ್ ಮಾಡಿದ್ದಾರೆ.

"ಕರ್ನಾಟಕ ಲೋಕಸಭೆಯ ಎಲ್ಲಾ 28 ಕ್ಷೇತ್ರಗಳಲ್ಲಿ ಉತ್ತಮ ಪ್ರಜಾಕೀಯ ಪಕ್ಷ ಸ್ಪರ್ಧೆ. ಪ್ರಜೆಗಳಿಂದಲೇ Selection, Election, Correction, Rejection, promotion - from people. 5 ತತ್ವಗಳ ಮೇಲೆ ಪಕ್ಷದ ಪ್ರಣಾಳಿಕೆ" ಎಂದಿದ್ದಾರೆ.

ಪ್ರತಿಯೊಂದು ಕ್ಷೇತ್ರಕ್ಕೂ ಸೂಕ್ತ ಅಭ್ಯರ್ಥಿ ಆಯ್ಕೆ ಮಾಡುತ್ತೇವೆ ಎಂದಿದ್ದಾರೆ. ಆಟೋ ರಿಕ್ಷಾ ಚಿನ್ಹೆಯನ್ನು ಹೊಂದಿರುವ ಉತ್ತಮ ಪ್ರಜಾಕೀಯ ಪಕ್ಷದಿಂದ ಸೂಕ್ತ ಅಭ್ಯರ್ಥಿಗಳನ್ನು ಕಣಕ್ಕಿಳಿಸುವುದಾಗಿ ಹೇಳಿರುವ ಉಪೇಂದ್ರ ಸ್ವತಃ ಸ್ಪರ್ಧಿಸುತ್ತಾರೋ ಇಲ್ಲವೋ ಎಂಬುದನ್ನು ಮಾತ್ರ ಸ್ಪಷ್ಟಪಡಿಸಿಲ್ಲ.

ಒಂದು ವೇಳೆ ಸ್ಪರ್ಧಿಸುವಂತಿದ್ದರೆ ಯಾವ ಕ್ಷೇತ್ರದಿಂದ ಸ್ಪರ್ಧಿಸಲಿದ್ದಾರೆ ಎಂಬ ಕುತೂಹಲವೂ ಇದೆ. ಇಷ್ಟೇ ಅಲ್ಲದೆ ಅಧಿಕಾರಕ್ಕಾಗಿ ನಾವು ಯಾವ ಪಕ್ಷದ ಜತೆಗೂ ಕೈಜೋಡಿಲ್ಲ ಎಂದೂ ಉಪೇಂದ್ರ ಹೇಳಿದ್ದಾರೆ. ಪ್ರಜಾಪ್ರಭುತ್ವದಲ್ಲಿ ಪ್ರಜೆಗಳೇ ಸ್ಟಾರ್‌ಗಳು. ಬೇರೆ ಸ್ಟಾರ್‌ಗಳನ್ನು ನೋಡಿ ಮತಚಲಾಯಿಸಬೇಡಿ. ಚುನಾವಣೆಗೆ ತಾವು ಸ್ಪರ್ಧಿಸುವ ಬಗ್ಗೆ ಇನ್ನೂ ತೀರ್ಮಾನ ತೆಗೆದುಕೊಂಡಿಲ್ಲ ಎಂದಿದ್ದಾರೆ ಉಪೇಂದ್ರ.

"ಪಕ್ಷದಲ್ಲಿ ಕಾರ್ಯಕರ್ತರಿಲ್ಲ, ಮಧ್ಯವರ್ತಿಗಳಿಲ್ಲ, ಪ್ರಜೆಗಳು ಹಾಗೂ ಅಭ್ಯರ್ಥಿ ನೇರವಾಗಿ ಕೊಂಡಿಯಾಗಿ, ಪ್ರಜೆಗಳ ಆಣತಿಯಂತೆ ಅಭ್ಯರ್ಥಿಗಳು ಕಾರ್ಯನಿರ್ವಹಿಸಲಿದ್ದಾರೆ" ಎಂದು ಹೇಳಿದರು.