ಕನ್ನಡಿಗ ನವೀನ್‌ ಜತೆ ದಾಂಪತ್ಯ ಜೀವನಕ್ಕೆ ಕಾಲಿಟ್ಟ ಭಾವನಾ

'ಜಾಕಿ' ಸೇರಿದಂತೆ ಹಲವಾರು ಕನ್ನಡ ಚಿತ್ರಗಳ ಮೂಲಕ ಕನ್ನಡಿಗರ ಮನಗೆದ್ದ ಕೇರಳದ ಬೆಡಗಿ ಭಾವನಾ ಮೆನನ್‌ ಬಹುದಿನದ ಗೆಳೆಯ ನವೀನ್‌ ಜತೆ ಸೋಮವಾರ ಮುಂಜಾನೆ ಸಪ್ತಪದಿ ತುಳಿಯುವ ಮೂಲಕ ದಾಂಪತ್ಯ ಜೀವನಕ್ಕೆ ಕಾಲಿಟ್ಟಿದ್ದಾರೆ. ಕುಟುಂಬದ ಆಪ್ತರು ಹಾಗೂ ಸ್ನೇಹಿತರ ಸಮ್ಮುಖದಲ್ಲಿ ಕೇರಳದ ತ್ರಿಶೂರ್‌ನ ತಿರುವಂಬಾಡಿ ದೇವಸ್ಥಾನದಲ್ಲಿ ಭಾವನಾ-ನವೀನ್‌ ವಿವಾಹ ನೆರವೇರಿತು.

ಕಳೆದ ವರ್ಷ ಅಂದರೆ 2017 ಮಾರ್ಚ್‌ 9ರಂದು ಭಾವನಾ-ನವೀನ್‌ ಅವರ ನಿಶ್ಚಿತಾರ್ಥ ನಡೆದಿತ್ತು. ಇದೀಗ ಈ ಮುದ್ದು ಜೋಡಿ ದಾಂಪತ್ಯ ಜೀವನಕ್ಕೆ ಕಾಲಿಡುವ ಮೂಲಕ ಬಾಳಿನ ನೂತನ ಅಧ್ಯಾಯವನ್ನು ಜತೆಯಾಗಿ ಆರಂಭಿಸಿದ್ದಾರೆ. ಕನ್ನಡ ಚಿತ್ರರಂಗದಲ್ಲಿ ನಟ ಹಾಗೂ ನಿರ್ಮಾಪಕನಾಗಿ ಗುರುತಿಸಿಕೊಂಡಿರುವ ನವೀನ್‌, 'ಜಾಕಿ' ಬೆಡಗಿ ಕೈ ಹಿಡಿದಿದ್ದಾರೆ. ಗಣೇಶ್‌-ಭಾವನಾ ಅಭಿನಯದ 'ರೋಮಿಯೋ' ಚಿತ್ರವನ್ನು ನವೀನ್‌ ಅವರೇ ನಿರ್ಮಿಸಿದ್ದರು.

ಇನ್ನು ಕನ್ನಡದ ಬಹುತೇಕ ಸ್ಟಾರ್‌ ನಟರೊಂದಿಗೆ ತೆರೆ ಹಂಚಿಕೊಂಡಿರುವ ಭಾವನಾ, ಪುನೀತ್‌, ಸುದೀಪ್‌, ಉಪೇಂದ್ರ, ಗಣೇಶ್‌ ಸೇರಿದಂತೆ ಇತರರೊಂದಿಗೆ ಅಭಿನಯಿಸಿ ಕನ್ನಡಿಗರ ಮನಗೆದ್ದಿದ್ದಾರೆ. 'ವಿಷ್ಣುವರ್ಧನ', 'ಬಚ್ಚನ್‌', 'ಚೌಕ', 'ಟೋಪಿವಾಲಾ' ಸೇರಿದಂತೆ ಅನೇಕ ಚಿತ್ರಗಳಲ್ಲಿ ನಟಿಸಿರುವ ಭಾವನಾ, ಮಲಯಾಳಂ, ತೆಲುಗು ಮತ್ತು ತಮಿಳು ಚಿತ್ರರಂಗದಲ್ಲೂ ಗುರುತಿಸಿಕೊಂಡಿದ್ದಾರೆ. ಅಷ್ಟೇ ಅಲ್ಲದೆ ಶಿವರಾಜ್‌ ಕುಮಾರ್‌ ಅಭಿನಯದ 'ಟಗರು' ಚಿತ್ರದಲ್ಲಿ ಭಾವನಾ ಪ್ರಮುಖ ಪಾತ್ರದಲ್ಲಿ ಕಾಣಿಸಿಕೊಂಡಿದ್ದು, ಫೆಬ್ರವರಿಯಲ್ಲಿ ಚಿತ್ರ ಬಿಡುಗಡೆಯಾಗಲಿದೆ.