ಸ್ಯಾಂಡಲ್‌ವುಡ್ಗೆ ಎಂಟ್ರಿ ಕೊಟ್ಟ ಜೈಜಗದೀಶ್‌ ಪುತ್ರಿಯರು

ನಟಿ, ನಿರ್ದೇಶಕಿ ವಿಜಯಲಕ್ಷ್ಮಿಸಿಂಗ್‌ 'ಯಾನಾ' ಚಿತ್ರ ನಿರ್ದೇಶನ ಮಾಡಿದ್ದು, ತಮ್ಮ ಮೂವರು ಪುತ್ರಿಯರನ್ನು ಚಿತ್ರರಂಗಕ್ಕೆ ಕರೆತಂದಿದ್ದಾರೆ. ಭಾರತೀಯ ಚಿತ್ರರಂಗದಲ್ಲಿ ಮೂವರು ಸಹೋದರಿಯರು ನಾಯಕಿಯರಾಗಿ ಒಟ್ಟಿಗೆ ನಟಿಸಿದ ಮೊದಲ ಚಿತ್ರ ಎಂಬ ದಾಖಲೆ ಬರೆಯಲಿದೆ. ಪುತ್ರಿಯರಿಗೆ ಅಮ್ಮನೇ ನಿರ್ದೇಶನ ಮಾಡಿದ್ದಾರೆ.

'ಯಾನಾ' ಇಂದಿನ ಜನರೇಷನ್‌ ಹುಡುಗ ಹುಡುಗಿಯರನ್ನು ಪ್ರತಿನಿಧಿಸಲಿದೆ. ವಿಜಯಲಕ್ಷ್ಮಿಸಿಂಗ್‌ ಮತ್ತು ಜೈ ಜಗದೀಶ್‌ ಪುತ್ರಿಯರಾದ ವೈಭವಿ, ವೈನಿಧಿ, ವೈಸಿರಿ ಈ ಚಿತ್ರದಲ್ಲಿ ನಾಯಕಿಯರಾಗಿ ನಟಿಸಿದ್ದಾರೆ. ನಾಯಕ ನಟರಾಗಿ ಮೂವರು ಹೊಸ ನಟರನ್ನು ಪರಿಚಯಿಸಲಾಗುತ್ತಿದೆ.'ಮೂವರು ಹುಡುಗಿಯರ ಸ್ಟೋರಿ ಚಿತ್ರದಲ್ಲಿದೆ. ಮಾಯಾ, ಅಂಜಲಿ ಮತ್ತು ನಂದಿನಿ ಪಾತ್ರಗಳಲ್ಲಿ ನನ್ನ ಮಕ್ಕಳು ನಟಿಸಿದ್ದಾರೆಂದು ವಿಜಯಲಕ್ಷ್ಮಿಸಿಂಗ್‌ ತಿಳಿಸಿದ್ದಾರೆ.

ವಿಜಯಲಕ್ಷ್ಮಿಯವರಿಗೆ ವೈಭವಿ ಹಿರಿಯ ಮಗಳಾದರೆ, ವೈನಿಧಿ ಮತ್ತು ವೈಸಿರಿ ಅವಳಿ ಸಹೋದರಿಯರು. ಸಹೋದರಿಯರಾಗಿರುವ ಮೂವರೂ ಸಿನಿಮಾದಲ್ಲೂ ಸಹೋದರಿಯಾಗೇ ಕಾಣಿಸಿಕೊಂಡಿದ್ದಾರಾ ಎಂಬ ಕುತೂಹಲ ಎಲ್ಲರಲ್ಲಿದೆ. 'ತುಂಬಾ ಜನ ಈ ಪ್ರಶ್ನೆ ಕೇಳುತ್ತಿದ್ದಾರೆ. ಅದನ್ನು ನಾವು ಸಸ್ಪೆನ್ಸ್‌ ಆಗಿಯೇ ಇಟ್ಟಿದ್ದೇವೆ. ಸಿನಿಮಾದಲ್ಲೇ ಅದು ರಿವೀಲ್‌ ಆಗಲಿ ಅಂತ. ನಿಜ ಹೇಳಬೇಕೆಂದರೆ, ವೈಭವಿ ಮತ್ತು ಅವಳಿ ಮಕ್ಕಳ ನಡುವೆ 1 ವರ್ಷ 3 ತಿಂಗಳ ವ್ಯತ್ಯಾಸ ಅಷ್ಟೆ. ಹಾಗಾಗಿ ಎಲ್ಲರೂ ಸ್ವಲ್ಪ ಒಂದೇ ರೀತಿ ಕಾಣುತ್ತಾರೆ. ಸಿನಿಮಾದಲ್ಲಿ ಇದು ನನಗೆ ಚಾಲೆಂಜಿಂಗ್‌ ಆಗಿತ್ತು. ಅವರ ಕ್ಯಾರೆಕ್ಟರ್‌, ಬಿಹೇವಿಯರ್‌ ನಿಂದಲೇ ಒಂದೇ ರೀತಿ ಕಾಣದಂತೆ ತೋರಿಸಬೇಕಿತ್ತು. ನಾನು ಮೊದಲೇ ಯಾರಿಗೂ ಸ್ಕ್ರಿಪ್ಟ್‌ ಕೊಡುತ್ತಿರಲಿಲ್ಲ. ಸೆಟ್‌ನಲ್ಲಿ ಶೂಟ್‌ಗೆ ಮೊದಲು ಡೈಲಾಗ್‌ ಕೊಡ್ತಿದ್ದೆ. ನೀವು ರಿಯಲಿಸ್ಟಿಕ್‌ ಆಗಿ ಬರಲಿ ಎಂಬ ಕಾರಣಕ್ಕೆ ಹೇಗಿದ್ದೀರೋ ಹಾಗೇ ನಟಿಸಿ ಎಂದೆ. ಎಲ್ಲರೂ ತುಂಬಾ ಚೆನ್ನಾಗಿ ನಟಿಸಿದ್ದಾರೆ. ನನಗೆ ಹೆಮ್ಮೆ ಎನ್ನಿಸ್ತಿದೆ' ಎನ್ನುತ್ತಾರೆ ವಿಜಯಲಕ್ಷ್ಮಿ.

20-21ರ ವಯಸ್ಸಿನ ಹರೆಯದ ಹುಡುಗಿಯರ ಲೈಫ್‌ ಸ್ಟೈಲ್‌ ಅನ್ನು ಹಾಸ್ಯದೊಂದಿಗೆ ಹೇಳುವ ಪ್ರಯತ್ನ ಮಾಡಲಾಗಿದೆಯಂತೆ. 'ಇವತ್ತಿನ ಹುಡುಗಿಯರ ಆಲೋಚನಾ ವಿಧಾನ, ಜೀವನ ಶೈಲಿ ಬಹಳ ಬದಲಾಗಿದೆ. ಚಿತ್ರದಲ್ಲಿ ಇದನ್ನು ಪೋಟ್ರೇಟ್‌ ಮಾಡುವುದರ ಜತೆಗೆ ಒಂದು ಜರ್ನಿ ಇದೆ. ಕತೆಯಲ್ಲಿ ಬರುವ ಸನ್ನಿವೇಶ ಮೂವರೂ ಹುಡುಗಿಯರ ಜರ್ನಿ ಶುರುವಾಗುತ್ತೆ. ಲವ್‌, ಸೆಂಟಿಮೆಂಟ್‌ ಎಲ್ಲವೂ ಇದೆ' ಎಂದಿದ್ದಾರೆ ಅವರು.

ಚಿತ್ರದಲ್ಲಿ ಹದಿಹರೆಯದವರ ಭಾವನೆಗಳ ಜತೆ ಹಿರಿಯರ ಭಾವನೆಗಳ ಬಗ್ಗೆಯೂ ಹೇಳಲಾಗಿದೆ. 'ಫ್ಯಾಮಿಲಿ ಜತೆ ಯೂತ್ಸ್‌ ಕೂಡಾ ಸಿನಿಮಾ ನೋಡೋಕೆ ಬರಬೇಕು ಅನ್ನೋದನ್ನು ಮನಸ್ಸಿನಲ್ಲಿಟ್ಟುಕೊಂಡು ಈ ತರದ ಕತೆ ಮಾಡಿದೆ. ಅನಂತ್‌ನಾಗ್‌, ಸುಂದರ್‌ರಾಜ್‌ ಮತ್ತಿತರ ದೊಡ್ಡ ನಟರ ಬಳಗವೇ ಚಿತ್ರದಲ್ಲಿ ನಟಿಸಿದ್ದಾರೆ' ಎನ್ನುತ್ತಾರೆ ಅವರು. ಚಿತ್ರವನ್ನು ಜೈಜಗದೀಶ್‌ ನಿರ್ಮಾಣ ಮಾಡಿದ್ದಾರೆ.

------

ನಮ್ಮ ಜನರೇಷನ್‌ ಸಿನಿಮಾಗಳಿಗಿಂತ ಭಿನ್ನವಾದ ಸಿನಿಮಾ ಮಾಡಬೇಕಿತ್ತು.ಯೂತ್ಸ್‌ ಬಗ್ಗೆ ರಿಯಲಿಸ್ಟಿಕ್‌ ಆಗಿ ಸಿನಿಮಾ ಮಾಡುವಾಗ ನನ್ನ ಮಕ್ಕಳನ್ನು ನೋಡಿದ್ದ ನನಗೆ ಸ್ಕ್ರಿಪ್ಟ್‌ ಬರೆಯುವುದು ಕಷ್ಟ ಎನ್ನಿಸಲಿಲ್ಲ.

-ವಿಜಯಲಕ್ಷ್ಮಿ ಸಿಂಗ್‌, ನಿರ್ದೇಶಕಿ

==

ನನ್ನ ಕನಸಿನ ಪ್ರಾಜೆಕ್ಟ್ ಇದು. ಬಹಳ ಎಕ್ಸೈಟ್‌ ಆಗಿದ್ದೇನೆ. ಈ ಸ್ಕ್ರಿಪ್ಟ್‌ನಲ್ಲಿ ನಾವೇ ನಟಿಸ್ತೀವಿ ಅಂತ ಅಂದುಕೊಂಡಿರಲಿಲ್ಲ. ಇಂಥ ಅವಕಾಶ ನೀಡಿದ ನಮ್ಮ ಅಪ್ಪ ಅಮ್ಮನಿಗೆ ನಾನು ಥ್ಯಾಂಕ್ಸ್‌ ಹೇಳುತ್ತೇನೆ.

-ವೈಸಿರಿ, ನಟಿ

==

ಸಿನಿಮಾ ನೋಡುವ ಪ್ರತಿ ಹುಡುಗ,ಹುಡುಗಿಯೂ ಒಂದಲ್ಲಾ ಒಂದು ಪಾತ್ರಕ್ಕೆ ಕನೆಕ್ಟ್ ಆಗುತ್ತಾರೆ. ತುಂಬಾ ಇಂಟರೆಸ್ಟಿಂಗ್‌ ಆಗಿದೆ. ಫುಲ್‌ ಫನ್‌ ನೀಡುತ್ತೆ.

-ವೈಭವಿ, ನಟಿ

--

ರಿಲೀಸ್‌ ದಿನ ಹತ್ತಿರ ಬರುತ್ತಿರೋದ್ರಿಂದ ತುಂಬಾ ಎಕ್ಸೈಟ್‌ ಆಗಿದ್ದೇನೆ. ಇದು ನಮ್ಮ ಮೊದಲ ಸಿನಿಮಾ. ಫಸ್ಟ್‌ ಡೇ ಶೂಟ್‌ ನಂತರ ಕಾನ್ಫಿಡೆನ್ಸ್‌ ಬಂತು. ಫೈನಲಿ ಸಿನಿಮಾ ತುಂಬಾ ಚೆನ್ನಾಗಿ ಬಂದಿದೆ.

-ವೈನಿಧಿ, ನಟಿ