- ಶರಣು ಹುಲ್ಲೂರು
ವಿಜಯ ರಾಘವೇಂದ್ರ ನಟನೆಯ 'ಜಾನಿ' ಸಿನಿಮಾ ಸೆಟ್ಟೇರುವುದರ ಹಿಂದಿನ ಕೌತುಕದ ಕತೆಯನ್ನು ಬಿಚ್ಚಿಟ್ಟಿರುವ ನಿರ್ಮಾಪಕರಲ್ಲಿ ಒಬ್ಬರಾದ ಪುರುಷೋತ್ತಮ್‌, 25 ವರ್ಷಗಳ ಗೆಳೆತನದ ಸವಿನೆನಪಿಗೆ ಹೆಗ್ಗುರುತಾಗಿ ಈ ಚಿತ್ರ ಉಳಿಯಲಿದೆ ಎಂದು ಹೇಳಿದ್ದಾರೆ.
ಈ ಬಗ್ಗೆ ಲವಲವಿಕೆ ಜತೆ ಮಾತನಾಡಿದ ಪುರುಷೋತ್ತಮ್‌, ಜಾನಿ ಸಿನಿಮಾ ನಿರ್ಮಿಸಿರುವ ಜಾನಕಿರಾಮ್‌, ಅರವಿಂದ್‌ ಮತ್ತು ನಾನು ಪ್ರಾಣ ಸ್ನೇಹಿತರು. ನಮ್ಮ ಸ್ನೇಹಕ್ಕೆ 25 ವರ್ಷ. ಆ ಸಂಭ್ರಮಕ್ಕಾಗಿ ಗೆಳೆಯ ಜಾನಕಿರಾಮ್‌ ಹೆಸರಲ್ಲಿ ಸಿನಿಮಾ ಮಾಡುವ ಆಲೋಚನೆ ಇತ್ತು. ಈ ವಾರ ರಾಜ್ಯಾದ್ಯಂತ ರಿಲೀಸ್‌ ಆಗುತ್ತಿರುವ ಜಾನಿ ಸಿನಿಮಾ ಶುರುವಾಗಿದ್ದು ಹೀಗೆ ಎಂದು ತಿಳಿಸಿದ್ದಾರೆ.
'ಗೆಳೆಯನ ಹೆಸರಲ್ಲಿಯೇ ಸಿನಿಮಾ ಮಾಡಬೇಕು ಅಂತ ಟೈಟಲ್‌ ನೋಂದಾಯಿಸಲು ವಾಣಿಜ್ಯ ಮಂಡಳಿಗೆ ಹೋಗಿದ್ದೆವು. ಆಗಲೇ ನಿರ್ಮಾಪಕ ಜಯಣ್ಣ ಹೆಸರಲ್ಲಿ ಈ ಶೀರ್ಷಿಕೆ ರಿಜಿಸ್ಟರ್‌ ಆಗಿತ್ತು. ನಾವು ಅವರನ್ನು ಕೇಳಿದಾಗ ವಿಶ್ವಾಸದಿಂದ ಟೈಟಲ್‌ ಕೊಟ್ಟರು. ಉತ್ತಮ ಸಿನಿಮಾ ಮಾಡಿ ಅವರ ನಂಬಿಕೆ ಉಳಿಸಿಕೊಂಡಿದ್ದೇವೆ. ಹಾಗಾಗಿ ಅವರೇ ನಮ್ಮ ಸಿನಿಮಾವನ್ನು ವಿತರಿಸುತ್ತಿದ್ದಾರೆ' ಎಂದು ಅವರು ಹೇಳಿದ್ದಾರೆ.
ಚಿತ್ರದಲ್ಲಿ ಹೆಸರಾಂತ ಕಲಾವಿದರು ನಟಿಸಿದ್ದು, ನೂರಾರು ಸಿನಿಮಾಗಳಿಗೆ ಸಿನಿಮಾಟೋಗ್ರಫಿ ಮಾಡಿದ್ದ ಪಿ.ಕೆ.ಎಚ್‌.ದಾಸ್‌ ಅವರ ಚೊಚ್ಚಲು ನಿರ್ದೇಶನದ ಸಿನಿಮಾವಿದು. ಮೆಲೊಡಿ ಮಾಂತ್ರಿಕ ಜೆಸ್ಸಿ ಗಿಫ್ಟ್‌ ಅವರ 25ನೇ ಸಿನಿಮಾ. ಮೊದಲ ಬಾರಿಗೆ ವಿಜಯ ರಾಘವೇಂದ್ರ ಮಾಸ್‌ಲುಕ್‌ನಲ್ಲಿ ಕಾಣಿಸಿಕೊಂಡಿದ್ದಾರೆ. ಐಶ್ವರ್ಯ ಫಿಲ್ಮ್‌ ಪ್ರೊಡಕ್ಷನ್‌ನಲ್ಲಿ ಸಿನಿಮಾ ಮೂಡಿ ಬಂದಿದೆ.