ಜಯಲಲಿತಾ ಬಯೋಪಿಕ್ 'ತಲೈವಿ'ಗೆ ವಿಜಯೇಂದ್ರ ಪ್ರಸಾದ್ ಕಥೆ

ಎಸ್ ಎಸ್ ರಾಜಮೌಳಿ ಅವರ ತಂದೆ ವಿಜಯೇಂದ್ರ ಪ್ರಸಾದ್ ಕಥೆಗಳೆಂದರೆ ಸಿನಿಮಾ ಮಂದಿ ಮುಗಿಬೀಳುತ್ತಾರೆ. ಇದೀಗ ಅವರು ದಿವಂಗತ ಜಯಲಲಿತಾ ಅವರ ಜೀವನಕಥೆಯಾಧಾರಿತ 'ತಲೈವಿ' ಚಿತ್ರಕ್ಕೆ ಕಥೆ ಬರೆಯುತ್ತಿದ್ದಾರೆ. ಫೆಬ್ರವರಿ 24ರ ಜಯಲಲಿತಾ ಹುಟ್ಟುಹಬ್ಬದಂದು ತಲೈವಿ ಚಿತ್ರ ಸೆಟ್ಟೇರಿದೆ.

ಸಾಮಾನ್ಯವಾಗಿ ಬಯೋಪಿಕ್ ಎಂದರೆ ವಿವಾದಗಳು ಇರುತ್ತವೆಯೇ? ಎಂಬ ಅನುಮಾನ ಮೂಡುವುದು ಸಹಜ. ಆದರೆ ಆ ರೀತಿಯ ಯಾವುದೇ ವಿವಾದಾಸ್ಪದ ಅಂಶಗಳು ಇರುವುದಿಲ್ಲ ಎಂದು ಗೊತ್ತಾಗಿದೆ. ಈಗಾಗಲೆ ಜಯಲಲಿತಾ ಅವರ ಸೋದರಳಿಯ ದೀಪಕ್ ಬಳಿ ಎನ್‌ಒಸಿ ಪಡೆದುಕೊಂಡಿದ್ದೇವೆ ಎಂದಿದೆ ಚಿತ್ರತಂಡ.

ಜಯಲಲಿತಾ ಪಾತ್ರ ಯಾರು ಪೋಷಿಸಲಿದ್ದಾರೆ? ತಾರಾಗಣಲ್ಲಿ ಯಾರೆಲ್ಲಾ ಇರುತ್ತಾರೆ ಎಂಬುದು ಗೊತ್ತಾಗಬೇಕಾದರೆ ಸ್ವಲ್ಪ ದಿನ ಕಾಯಲೇಬೇಕು. ಏಕೆಂದರೆ ಚಿತ್ರದ ಪಾತ್ರವರ್ಗದ ವಿವರಗಳು ಇನ್ನೂ ಅಂತಿಮಗೊಳಿಸಿಲ್ಲವಂತೆ.

ಈ ಚಿತ್ರಕ್ಕೆ ವಿಜಯ್ ಆ್ಯಕ್ಷನ್ ಕಟ್ ಹೇಳಲಿದ್ದಾರೆ. ಈ ಬಗ್ಗೆ ಮಾತನಾಡಿರುವ ಅವರು, ತಲೈವಿ ಪಾತ್ರಕ್ಕೆ ಪಕ್ಕಾ ಕಲಾವಿದೆಯನ್ನು ಹುಡುಕಲಾಗುತ್ತಿದೆ. ಲೀಡರ್ಸ್ ಜನಿಸುವುದಿಲ್ಲ, ಅವರು ರೂಪಗೊಳ್ಳುತ್ತಾರೆ ಎಂಬ ಮಾತಿಗೆ ಜಯಲಲಿತಾ ಅನ್ವರ್ಥ. ಈ ಚಿತ್ರಕ್ಕಾಗಿ ಅವಕಾಶ ಸಿಕ್ಕಕೂಡಲೆ ಒಪ್ಪಿಕೊಂಡೆ. ಜಯಲಲಿತಾರ ಜೀವನವನ್ನು ಪ್ರಾಮಾಣಿಕವಾಗಿ ತೆರೆಗೆ ತರುತ್ತೇನೆ ಎನ್ನುತ್ತಾರೆ ನಿರ್ದೇಶಕ ವಿಜಯ್.

'ತಲೈವಿ' ಶೀರ್ಷಿಕೆ ಬಿಡುಗಡೆ ಮಾಡುತ್ತಿರುವುದಕ್ಕೆ ತುಂಬಾ ಖುಷಿಯಾಗುತ್ತಿದೆ. ಸಿನಿಮಾ ಮಾಡಲು ತಮಗೆ ಒಪ್ಪಿಗೆ ಕೊಟ್ಟ ಜಯಲಲಿತಾ ಅವರ ಸೋದರಳಿಯ ದೀಪಕ್ ಅವರಿಗೆ ಹೃತ್ಪೂರ್ವಕ ಧನ್ಯವಾದಗಳನ್ನು ತಿಳಿಸಿದ್ದಾರೆ ನಿರ್ದೇಶಕರು. ವಿಶೇಷ ಎಂದರೆ ವಿಜಯೇಂದ್ರ ಪ್ರಸಾದ್ ಕಥೆ ಜಯಲಲಿತಾ ಬಯೋಪಿಕ್‌ಗೆ ಇರುವುದು.

ಹಲವಾರು ಹಿಟ್ ಗೀತೆಗಳನ್ನು ಕೊಟ್ಟಿರುವ ಜಿಬಿ ಪ್ರಕಾಶ್ ಕುಮಾರ್ ಸಂಗೀತ ಚಿತ್ರಕ್ಕಿದೆ. ನೀರವ್ ಶಾ ಛಾಯಾಗ್ರಹಣ, ಮಧನ್ ಕಾರ್ಕಿ ಅವರ ಸಾಹಿತ್ಯ ಚಿತ್ರಕ್ಕಿದೆ. ಒಟ್ಟಾರೆ ಜಯಲಲಿತಾ ಬಯೋಪಿಕ್ ಆಗ ಬರುತ್ತದೆ ಈಗ ಬರುತ್ತದೆ ಎಂಬ ಸುದ್ದಿಗಳ ಹಿನ್ನೆಲೆಯಲ್ಲಿ ಈಗ ಅಧಿಕೃತವಾಗಿ ಲಾಂಚ್ ಆಗಿದ್ದು ಚಿತ್ರರಂಗದಲ್ಲಿ ಕುತೂಹಲ ಮೂಡಿಸಿದೆ. ಮೂರು ಭಾಷೆಗಳಲ್ಲಿ ತಮಿಳು, ತೆಲುಗು ಮತ್ತು ಹಿಂದಿಯಲ್ಲಿ ಇದನ್ನು ತೆರೆಗೆ ತರಲಾಗುತ್ತಿದೆ.