ಸಲಗಕ್ಕೆ ಫೈಟ್‌ ಮಾಡಿಸ್ತಾರೆ ಜಾಲಿ ಬಾಸ್ಟಿನ್‌

ದುನಿಯಾ ವಿಜಯ್‌ ನಿರ್ದೇಶನದ ಸಲಗ ಸಿನಿಮಾಗೆ ಸಾಹಸ ನಿರ್ದೇಶಕ ಜಾಲಿ ಬಾಸ್ಟಿನ್‌ ಸಾಹಸ ನಿರ್ದೇಶಕರಾಗಿ ಕೆಲಸ ಮಾಡುತ್ತಿದ್ದಾರೆ. ವಾಹನಗಳ ಜಂಪಿಂಗ್‌ನ್ನು ಅದ್ಬುತವಾಗಿ ಮಾಡಿಸುತ್ತಾರೆ ಎಂದು ಹೆಸರು ಮಾಡಿರುವ ಜಾಲಿ ಬಾಸ್ಟಿನ್‌ ಸಲಗದಲ್ಲಿಯೂ ಒಂದಷ್ಟು ಚೇಸಿಂಗ್‌ ದೃಶ್ಯಗಳನ್ನು ರೋಚಕವಾಗಿ ಕಂಪೋಸ್‌ ಮಾಡಲಿದ್ದಾರೆ ಎನ್ನುತ್ತಾರೆ ನಿರ್ದೇಶಕ ವಿಜಯ್‌.

ಬುಧವಾರದಿಂದ ಆರಂಭವಾಗಿರುವ ಎರಡನೇ ಶೆಡ್ಯೂಲ್‌ನಲ್ಲಿ ಜಾಲಿ ಬಾಸ್ಟಿನ್‌ ಸಲಗ ತಂಡವನ್ನು ಸೇರಿಕೊಂಡಿದ್ದು, ಬೆಂಗಳೂರಿನಲ್ಲಿ ನಡೆಯುತ್ತಿರುವ ಚಿತ್ರೀಕರಣದಲ್ಲಿ ಆ್ಯಕ್ಷನ್‌ ದೃಶ್ಯಗಳನ್ನು ಕಂಪೋಸ್‌ ಮಾಡುತ್ತಿದ್ದಾರೆ.

ಈ ಸಿನಿಮಾವನ್ನು ದುನಿಯಾ ವಿಜಯ್‌ ನಿರ್ದೇಶನ ಮಾಡಿ ತಾವೇ ನಾಯಕರಾಗಿಯೂ ನಟಿಸುತ್ತಿದ್ದಾರೆ. ಚಿತ್ರದಲ್ಲಿ ಡಾಲಿ ಧನಂಜಯ್‌ ಖಡಕ್‌ ಪೊಲೀಸ್‌ ಅಧಿಕಾರಿಯಾಗಿ ನಟಿಸುತ್ತಿದ್ದು, ಸದ್ಯದಲ್ಲೇ ಅವರೂ ಸಹ ಟೀಮ್‌ ಸೇರಿಕೊಳ್ಳಲಿದ್ದಾರೆ. ಈ ಸಿನಿಮಾಗೆ ಮಾಸ್ತಿ ಸಂಭಾಷಣೆ ಬರೆದಿದ್ದಾರೆ. ಕೆಮಿಸ್ಟ್ರಿ ಆಫ್‌ ಕರಿಯಪ್ಪ ಸಿನಿಮಾ ಮೂಲಕ ಸ್ಯಾಂಡಲ್‌ವುಡ್‌ ಪ್ರವೇಶ ಮಾಡಿ ಗಮನ ಸೆಳೆದಿದ್ದ ಸಂಜನಾ ಆನಂದ್‌ ಸಲಗಕ್ಕೆ ನಾಯಕಿಯಾಗಿದ್ದಾರೆ.

ನಾವು ಈಗ ಎರಡನೇ ಶೆಡ್ಯೂಲ್‌ ಆರಂಭಿಸಿದ್ದೇವೆ. ಈ ಬಾರಿ ನಮ್ಮನ್ನು ನಟ ಧನಂಜಯ ಸೇರಿಕೊಳ್ಳಲಿದ್ದು, ನನ್ನ ಮತ್ತು ಧನಂಜಯ ನಡುವಿನ ಜಿದ್ದಾ ಜಿದ್ದಿ ದೃಶ್ಯಗಳ ಚಿತ್ರೀಕರಣವಾಗಲಿದೆ.

-ದುನಿಯಾ ವಿಜಯ್‌, ನಟ, ನಿರ್ದೇಶಕ