ಪ್ರೀತಿ, ಪ್ರೇಮ, ಪ್ರಣಯದ ವಿಚಾರ ಬಂದಾಗ ಸಿನಿಮಾ ತಾರೆಗಳು ಹಾರಿಕೆಯ ಉತ್ತರ ನೀಡುವುದೇ ಹೆಚ್ಚು. "ಸದ್ಯಕ್ಕೆ ನನ್ನ ದೃಷ್ಟಿಯೆಲ್ಲಾ ಸಿನಿಮಾಗಳ ಮೇಲೆ ಇದೆ, ಪ್ರೀತಿ ಪ್ರೇಮಕ್ಕೆ ಟೈಮಿಲ್ಲ" ಎಂಬ ಮಾತುಗಳನ್ನೇ ಹೇಳುತ್ತಿರುತ್ತಾರೆ. ಆದರೆ ನಟಿ ಕಿಯಾರಾ ಅಡ್ವಾಣಿ ಮಾತ್ರ ಈ ಬಗ್ಗೆ ಸ್ವಲ್ಪ ಡಿಫರೆಂಟ್ ಉತ್ತರ ನೀಡಿದ್ದಾರೆ.

ಪ್ರೀತಿ ಪ್ರೇಮದ ಬಗ್ಗೆ ಮಾತನಾಡಿರುವ ಅವರು, "ಪ್ರೀತಿಸಲು ನನ್ನ ಬಳಿ ತುಂಬಾ ಸಮಯ ಇದೆ" ಎಂದಿದ್ದಾರೆ 'ಕಬೀರ್ ಸಿಂಗ್' ಬೆಡಗಿ. ಬಾಕ್ಸ್ ಆಫೀಸ್‌ನಲ್ಲಿ ಕಬೀರ್ ಸಿಂಗ್ ಸಿನಿಮಾ ಭರ್ಜರಿ ಸದ್ದು ಮಾಡಿದ್ದು ಗೊತ್ತೇ ಇದೆ.
ಆಧಾರ್ ಕಾರ್ಡ್‌ನಲ್ಲಿ ಜನ್ಮ ದಿನಾಂಕ ತಿದ್ದಿ 'ಕಬೀರ್ ಸಿಂಗ್' ವೀಕ್ಷಣೆ!

ಈ ಹಿನ್ನೆಲೆಯಲ್ಲಿ ಮಾತನಾಡಿರುವ ಕಿಯಾರಾ, "ಕಬೀರ್ ಸಿಂಗ್ ಒಂದು ಪ್ರೇಮಕಥೆ. ಪ್ರೀತಿ ಯಾವಾಗ, ಎಲ್ಲಿ ಬೇಕಾದರೂ, ಯಾರ ಮೇಲಾದರೂ ಹುಟ್ಟಬಹುದು. ಅದಕ್ಕೆ ಇದು ಸೂಕ್ತ ಸಮಯ ಹೌದೋ, ಅಲ್ಲವೇ ಎಂಬುದು ಗೊತ್ತಿಲ್ಲ" ಎಂದಿದ್ದಾರೆ.

"ಸದ್ಯಕ್ಕೆ ನಾನು ಪ್ರೀತಿಯಲ್ಲಿಲ್ಲ. ಆದರೆ ಯಾರ ಮೇಲಾದರೂ ಪ್ರೀತಿ ಹುಟ್ಟಿದರೆ ಅದನ್ನು ಮುಚ್ಚಿಟ್ಟುಕೊಳ್ಳಲು ಸಾಧ್ಯವಿಲ್ಲ. ಪ್ರೀತಿ ಎಂಬುದು ಸಂಪೂರ್ಣ ವೈಯಕ್ತಿಕ. ಯಾರನ್ನಾದರೂ ಪ್ರೀತಿಸಿದರೆ, ಸಿನಿಮಾಗಳ ಬಗ್ಗೆ ಆಸಕ್ತಿ ಕಡಿಮೆಯಾಗುತ್ತದೆ ಎಂಬ ಭಯ ಸಹ ನನಗಿಲ್ಲ. ಪ್ರೀತಿ ಪ್ರೀತಿಯೇ, ಸಿನಿಮಾ ಸಿನಿಮಾನೇ. ಸದ್ಯಕ್ಕೆ ನನ್ನ ಹೃದಯದಲ್ಲಿ ಯಾರಿಗೂ ಜಾಗ ಕೊಟ್ಟಿಲ್ಲ, ಅದು ಖಾಲಿ ಇದೆ" ಎಂದಿದ್ದು ಅಭಿಮಾನಿಗಳಲ್ಲಿ ಪ್ರೀತಿ ಚಿಗುರಿಸಿದ್ದಾರೆ.