ಸಿನಿಮಾ ಹೆಸರು ಸೂಚಿಸಲು ಫ್ಯಾನ್ಸ್‌ಗೆ ಮನವಿ ಮಾಡಿಕೊಂಡ ಕಾಜಲ್-ತಮನ್ನಾ!

ಇಂಡಿಯಾದ ಫೇಮಸ್ ನಟಿಯರಾದ ಕಾಜಲ್ ಅಗರ್‌ವಾಲ್ ಮತ್ತು ತಮನ್ನಾ ಭಾಟಿಯಾ ಅವರಿಬ್ಬರೂ ಒಟ್ಟಿಗೆ ಒಂದೇ ಚಿತ್ರದಲ್ಲಿ ನಟಿಸಿದರೆ ಆ ಚಿತ್ರಕ್ಕೆ ಏನೆಮದು ಹೆಸರಿಡಬಹುದು? ಈ ಪ್ರಶ್ನೆ ಯಾರದೋ ತಲೆಗೆ ಬಂದಿದ್ದಲ್ಲ, ಸ್ವತಃ ಅವರಿಬ್ಬರಿಗೇ ಕಾಡಿದ್ದು ಎಂಬುದು ಅಚ್ಚರಿಯಾದರೂ ಸತ್ಯ. ಹೌದು, ಇತ್ತೀಚೆಗೆ ಕಾಜಲ್ ಮತ್ತು ತಮನ್ನಾ ಇಬ್ಬರೂ ಭೇಟಿಯಾಗಿ ಒಟ್ಟಿಗೆ ಸೆಲ್ಫಿ, ವೀಡಿಯೋ ತೆಗೆದುಕೊಂಡಿದ್ದಾರೆ. ಆಗ ಅವರಿಬ್ಬರಿಗೆ ಈ ಪ್ರಶ್ನೆ ಕಾಡಿದೆ.

ಇತ್ತೀಚೆಗೆ ಕಾಜಲ್ ಮತ್ತು ತಮನ್ನಾ ಇಬ್ಬರೂ ಜೊತೆಯಾಗಿ ಇನ್‍ಸ್ಟಾಗ್ರಾಮ್‍ನಲ್ಲಿ ಕಾಣಿಸಿಕೊಂಡಿದ್ದು, ತಮ್ಮಿಬ್ಬರನ್ನೂ ಒಟ್ಟಿಗೇ ವಿಡಿಯೊದಲ್ಲಿ ಸೆರೆ ಹಿಡಿದುಕೊಂಡಿದ್ದಾರೆ. ಆಗ ವೀಡಿಯೋ ನೋಡುತ್ತಿದ್ದವರು ಇಬ್ಬರೂ ಒಟ್ಟಿಗೇ ಒಂದೇ ಸಿನಿಮಾದಲ್ಲಿ ಅಭಿನಯಿಸುವಂತೆ ಕೋರಿದ್ದಾರೆ. ಆ ಸಮಯದಲ್ಲಿ ಇಬ್ಬರೂ ಜೊತೆಯಾಗಿ ನಟಿಸುವ ಚಿತ್ರಕ್ಕೆ ಏನು ಹೆಸರಿಡುವುದು ಎಂಬ ಸಂಗತಿಯನ್ನು ಚರ್ಚಿಸಿದ್ದಾರೆ.

ಕಾಜಲ್ ಇಂಗ್ಲಿಷ್ ಹೆಸರೊಂದನ್ನು ಸೂಚಿಸಿದರೆ, ತಮನ್ನಾ ಲೋಕಲ್ ಹಾಗೂ ಮಸಾಲಾ ಹೆಸರು ಹೇಳುವಂತೆ ಕೇಳಿದ್ದರು. ಆಗ ಇಬ್ಬರೂ "ಇಡ್ಲಿ ಸಾಂಬಾರ್", "ಇಡ್ಲಿ ದೋಸೆ"ಯಿಂದ ಶುರು ಮಾಡಿ ಕೊನೆಗೆ "ಸಾಂಬಾರ್ ಚಟ್ನಿ"ಗೆ ಬಂದಿದ್ದರು. ಆದರೆ, ಯಾವುದನ್ನೂ ಫೈನಲ್ ಮಾಡಲು ಮನಸ್ಸು ಮಾಡದ ನಟಿಯರಿಬ್ಬರೂ, ಕೊನೆಗೆ ವೀಡಿಯೋ ನೋಡುತ್ತಿದ್ದ ಹುಡುಗರಲ್ಲಿ "ಗೈಸ್..ಸಜೆಸ್ಟ್ ಸಮ್ ಗುಡ್ ಟೈಟಲ್ಸ್" ಎಂದು ಪೋಸ್ಟ್ ಮಾಡುವ ಮೂಲಕ ಚಿತ್ರಪ್ರೇಮಿಗಳ ತಲೆಗೂ ಸುಮ್ಮನೇ ಹುಳ ಬಿಟ್ಟಿದ್ದಾರೆ.

ಈ ರೀತಿಯಾಗಿ ಇಂಡಿಯಾದ ಪ್ರಸಿದ್ಧ ನಟಿಯರಾದ ತಮನ್ನಾ ಭಾಟಿಯಾ ಹಾಗೂ ಕಾಜಲ್ ಅಗರ್‌ವಾಲ್, ಇದೀಗ ಅಭಿಮಾನಿಗಳ ಮಿದುಳಿಗೆ ಕೆಲಸ ನೀಡಿದ್ದಾರೆ. ನೋಡಿ, ಸಾಧ್ಯವಾದರೆ ನೀವೇನಾದರೂ ಸಜೆಸ್ಟ್ ಮಾಡಲು ಸಾಧ್ಯವೇ? ಯೋಚಿಸಿ.., ಉತ್ತರಿಸಿ...