ವಿದೇಶದಲ್ಲಿ ಇದ್ದುಕೊಂಡೇ, ಕನ್ನಡದಲ್ಲಿ ಹಲವಾರು ಕಾರ‍್ಯಕ್ರಮಗಳನ್ನು ಮಾಡುವ ಮೂಲಕ ಫೇಮಸ್‌ ಆಗಿರುವ ವಿನಯ್‌ ಭಾರದ್ವಾಜ್‌, ಈಗ ಹೊಸ ಸಾಹಸಕ್ಕೆ ಮುಂದಾಗಿದ್ದಾರೆ. ಅಕ್ಕನ ವಚನವನ್ನು ಆಧರಿಸಿದ ಆಲ್ಬಂವೊಂದನ್ನು ತಯಾರಿಸಿದ್ದು, ಅದಕ್ಕೆ ಆಧುನಿಕ ಮ್ಯೂಸಿಕ್‌ ಸ್ಪರ್ಶ ನೀಡಿದ್ದಾರೆ. ಅಲ್ಲದೇ ಈ ಹೊತ್ತಿನ ಯುವಕ ಯುವತಿಯರಿಗೆ ಇಷ್ಟವಾಗುವ ರೀತಿಯಲ್ಲಿ ಅದನ್ನು ಶೂಟ್‌ ಮಾಡಿದ್ದಾರೆ. ಈ ಕಾರಣದಿಂದಾಗಿ ಆಲ್ವಂ ಸಾಮಾಜಿಕ ಜಾಲತಾಣದಲ್ಲಿ ವೈರಲ್‌ ಆಗಿದೆ.
12ನೇ ಶತಮಾನದಲ್ಲಿ ರಚಿತವಾಗಿರುವ 'ಅಕ್ಕ ಕೇಳವ್ವ..' ವಚನವನ್ನು ಜಾಜ್‌ ಶೈಲಿಯಲ್ಲಿ ಹೊರತರಲಾಗಿದ್ದು, ಇಂಚರಾ ರಾವ್‌ ಈ ವಚನವನ್ನು ಹಾಡಿದ್ದಾರೆ. ಹಿತಾ ಚಂದ್ರಶೇಖರ್‌ ಮತ್ತು ಶರತ್‌ ಚಂದ್ರುಹಾಡಿನಲ್ಲಿ ಕಾಣಿಸಿಕೊಂಡಿದ್ದಾರೆ. ಅಯ್ಯೋ ರಾಮ ಸಂಗೀತ ಸಂಯೋಜನೆಯಲ್ಲಿ ವಚನ ಮೂಡಿ ಬಂದಿದೆ.
'ನಾವು ಆಯ್ಕೆ ಮಾಡಿಕೊಂಡಿರುವ ವಚನ ಎಲ್ಲ ಕಾಲಕ್ಕೂ ಸಲ್ಲುವಂಥದ್ದು. ಜೀವನಕ್ಕೆ ಬೇಕಾದ ಸಾರ ಅದರಲ್ಲಿದೆ. ಈ ವಚನವನ್ನು ನಾನು ಕಾರ್ಪೊರೇಟ್‌ ಜೀವನ ಶೈಲಿ ಮತ್ತು ಈ ಬದುಕಿಗೆ ಹೊಂದಿಕೊಂಡ ದಂಪತಿಗಳ ಸುತ್ತ ಹೆಣೆದುಕೊಂಡು ದೃಶ್ಯ ರೂಪ ನೀಡಿದ್ದೇನೆ. ಪ್ರೀತಿ ಮತ್ತು ಸಂಬಂಧಗಳು ಇಂದು ಯಾವ ರೀತಿಯಲ್ಲಿವೆ ಎಂಬುದನ್ನು ಸೂಕ್ಷ್ಮವಾಗಿ ಹೇಳುವ ಪ್ರಯತ್ನ ಇಲ್ಲಿ ಆಗಿದೆ. ಹಾಗಾಗಿ ಎಲ್ಲರೂ ಆಲ್ಬಂ ಅನ್ನು ಇಷ್ಟ ಪಡುತ್ತಿದ್ದಾರೆ' ಅನ್ನುವುದು ವಿನಯ್‌ ಮಾತು. ಈಗಾಗಲೇ ಸಾಮಾಜಿಕ ಜಾಲತಾಣದಲ್ಲಿ ಆಲ್ಬಂ ರಿಲೀಸ್‌ ಆಗಿದೆ. ಉತ್ತಮ ಪ್ರತಿಕ್ರಿಯೆ ಕೂಡ ಸಿಕ್ಕಿದೆ.