ಕಂಡವರ ವಿಚಾರವನ್ನು ಟ್ಯಾಗ್ ಮಾಡಬೇಡಿ: ನಟ ಜಗ್ಗೇಶ್ ವಿನಂತಿ!

ಸಿನಿಮಾ ಹಾಗೂ ರಾಜಕೀಯ ವಿದ್ಯಮಾನಗಳ ಕುರಿತು ತಮ್ಮ ಅಭಿಪ್ರಾಯಗಳನ್ನ ವ್ಯಕ್ತಪಡಿಸುವ ಮೂಲಕ ಟ್ವೀಟರ್‌ನಲ್ಲಿ ಸದಾ ಸಕ್ರಿಯರಾಗಿರುವ ನಟ ಜಗ್ಗೇಶ್ ಒಂದು ಎಚ್ಚರಿಕೆ ಸಂದೇಶ ರವಾನಿಸಿದ್ದಾರೆ. ಅನಾವಶ್ಯಕ ವಿಚಾರಗಳ ಬಗ್ಗೆ ಟ್ಯಾಗ್ ಮಾಡಿ, ನಿಮ್ಮ ಅಭಿಪ್ರಾಯ ತಿಳಿಸಿ ಎಂದು ಕೇಳುವವರಿಗೆ ನಟ ಜಗ್ಗೇಶ್ ವಿರೋಧ ವ್ಯಕ್ತಪಡಿಸಿದ್ದಾರೆ. 'ನಾನು ಈ ಮೂಲಕ ವಿನಂತಿ ಮಾಡಿಕೊಳ್ಳುತ್ತಿದ್ದೇನೆ. ಇದನ್ನು ಮೀರಿಯೂ ಮತ್ತೆ ಹಾಗೇ ವರ್ತಿಸಿದರೆ ಅವರನ್ನು ಬ್ಲಾಕ್ ಮಾಡಬೇಕಾಗುತ್ತದೆ' ಎಂದು ಖಡಕ್ ಆಗಿ ತಿಳಿಸಿದ್ದಾರೆ.

''ನಾನು ಮತ್ತು ನನ್ನ ಅಭಿಮಾನಿಗಳ ಮಧ್ಯೆ ಚಿತ್ರರಂಗದ ಅಭಿಪ್ರಾಯ ವಿಚಾರ ವಿನಿಮಯಕ್ಕೆ ಸೇತುವೆ ಈ ನನ್ನ ಟ್ವೀಟರ್ ಖಾತೆ. ಇಲ್ಲಿ ಅನಾವಶ್ಯಕ ಕಂಡವರ ವಿಚಾರ tag ಮಾಡಿ ಪ್ರಚಾರಕ್ಕೆ ಯತ್ನಿಸುವುದನ್ನು ನಾನು ಸಹಿಸಲ್ಲ. ಮುಂದುವರೆದರೆ ಅವರನ್ನು ನಾನು block ಮಾಡುವೆ. ಪರರ ಸಂತೋಷ ಬಯಸುವ ನನ್ನನ್ನು ಶ್ರೇಷ್ಠವಾಗಿ ಬಳಸಿಕೊಳ್ಳಿ. ಪ್ರೀತಿಗೆ ಗೌರವಿಸುವಿರಿ ಎಂದು ಭಾವಿಸುವೆ'' ಎಂದು ಜಗ್ಗೇಶ್ ತಮ್ಮ ಟ್ವೀಟರ್ ಖಾತೆಯಲ್ಲಿ ಪೋಸ್ಟ್ ಮಾಡುವ ಮೂಲಕ ವಿನಂತಿ ಮಾಡಿಕೊಂಡಿದ್ದಾರೆ.

ಅಭಿಮಾನಿಗಳ ಜೊತೆ ಯಾವತ್ತು ಸಂವಾದ, ಚರ್ಚೆ ಹಾಗೂ ಅಭಿಮಾನಿಗಳ ಕೆಲವು ಬೇಡಿಕೆಗಳನ್ನ ಈಡೇರಿಸುವ ಸಲುವಾಗಿ ಟ್ವಿಟ್ಟರ್ ನಲ್ಲಿ ಪ್ರತಿಕ್ರಿಯಿಸುವ ಜಗ್ಗೇಶ್,ಕೆಲವೊಮ್ಮೆ ಬೇಡವಾದ ವಿಚಾರಕ್ಕೆ ಪ್ರತಿಕ್ರಿಯೆ ನೀಡಿ ಟೀಕೆಗೆ ಗುರಿಯಾಗಿರುವ ಉದಾಹರಣೆಯೂ ಸಾಕಷ್ಟಿದೆ. ಹೀಗಾಗಿ, ಈ ಬಗ್ಗೆ ಜಗ್ಗೇಶ್ ಇತ್ತೀಚೆಗೆ ಜಾಗೃತರಾಗಿದ್ದಾರೆ.

ಎಷ್ಟೋ ವಿಷಯಗಳ ಬಗ್ಗೆ, ಆಗುಹೋಗುಗಳ ಬಗ್ಗೆ ಜಗ್ಗೇಶ್ ಅವರ ಬಳಿ ಅಭಿಮಾನಿಗಳು ಪ್ರಶ್ನೆ ಕೇಳುತ್ತಾರೆ. ಅದಕ್ಕೆ ಜಗ್ಗೇಶ್ ತಮ್ಮದೇ ಶೈಲಿಯಲ್ಲಿ ಉತ್ತರಿಸುತ್ತಾರೆ. ಕೆಲವರು ತಮ್ಮ ಹುಟ್ಟುಹಬ್ಬಕ್ಕೆ ವಿಶ್ ಮಾಡಿಸಿಕೊಳ್ಳುತ್ತಾರೆ. ಇನ್ನೂ ಹಲವರು ವಿವಾಹ ವಾರ್ಷಿಕೋತ್ಸವಕ್ಕೂ ವಿಶ್ ಮಾಡಿಸಿಕೊಳ್ಳುತ್ತಾರೆ. ಅಂಥವರಿಗೆ ಜಗ್ಗೇಶ್ ಮನಸಾರೆ ಹಾರೈಸುತ್ತಾರೆ. ಅಷ್ಟೆ ಅಲ್ಲ, ಹಲವರು ಸಿನಿಮಾ ಹಾಗು ಕಲಾವಿದರ ಬಗ್ಗೆ ಅಭಿಪ್ರಾಯ ಹಂಚಿಕೊಳ್ಳುತ್ತಾರೆ. ಅವುಗಳನ್ನು ಮೀರಿದರೆ ಇನ್ಮುಂದೆ ನಟ ಜಗ್ಗೇಶ್ ಅವರ ಅಭಿಮಾನಿಗಳನ್ನು ಬ್ಲಾಕ್ ಮಾಡುತ್ತಾರಂತೆ, ಹುಶಾರಾಗಿರುವುದು ಒಳಿತು!