ನಟ ರಮೇಶ್ ದಾಡಿ-ಮೀಸೆಯ ಹಿಂದಿನ 'ರಣಗಿರಿಯ ರಹಸ್ಯ'ವೇನು ಗೊತ್ತೇ?

ಸ್ಯಾಂಡಲ್‌ವುಡ್ ಎವರ್ ಗ್ರೀನ್ ಸುಂದರ ನಟ ರಮೇಶ್ ಅರವಿಂದ್ ಅವರು ಇತ್ತೀಚೆಗೆ ಗುಡ್ಡ ಬಿಟ್ಟು ಹೊಸ ಲುಕ್‌ನಲ್ಲಿ ಮಿಂಚುತ್ತಿದ್ದಾರೆ. ಉದ್ದ ಮೀಸೆ ಮತ್ತು ದಾಡಿ ಬಿಟ್ಟು ಟ್ರೆಂಡಿ ಲುಕ್‌ನಲ್ಲಿ ಮಿಂಚುತ್ತಿರುವ ನಟ ಅರವಿಂದ್ ಹಿಂದೆ ರಹಸ್ಯವೊಂದಿದೆ. ಜೀ ಕನ್ನಡದಲ್ಲಿ ಸದ್ಯ ಪ್ರಸಾರ ಕಾಣುತ್ತಿರುವ 'ವೀಕೆಂಡ್ ವಿತ್ ರಮೇಶ್ 4' ಕಾರ್ಯಕ್ರಮದಲ್ಲಿ ಸಹ ರಮೇಶ್ ದಾಡಿ ಬಿಟ್ಟು ಹೊಸ ಅವತಾರದಲ್ಲೇ ಕಾಣಿಸಿಕೊಳ್ಳುತ್ತಿದ್ದಾರೆ.

ನಟ ರಮೇಶ್ ಅರವಿಂದ್ ಅವರ ಈ ಹೊಸ ಗೆಟಪ್ ನ ಹಿಂದಿದೆ ಒಂದು ಭಾರೀ ರಹಸ್ಯ. ಹೌದು, ಅದು 'ರಣಗಿರಿಯ ರಹಸ್ಯ'. ಅಂದರೆ, ರಮೇಶ್ ಅರವಿಂದ್ ಹೊಸ ಸಿನಿಮಾದ ಹೆಸರಿನ ಜೊತೆ ಇರುವ ಟ್ಯಾಗ್‌ಲೈನ್ ಇದು. 'ಶಿವಾಜಿ ಸೂರತ್ಕಲ್' ಎನ್ನುವ ಚಿತ್ರದಲ್ಲಿ ರಮೇಶ್ ಅಭಿನಯಿಸುತ್ತಿದ್ದು, ಈ ಚಿತ್ರಕ್ಕೆ ಕೇಸ್ ಆಫ್ 'ರಣಗಿರಿಯ ರಹಸ್ಯ' ಎನ್ನುವ ಟ್ಯಾಗ್ ಲೈನ್ ಇದೆ.

'ಶಿವಾಜಿ ಸೂರತ್ಕಲ್' ಚಿತ್ರದಲ್ಲಿ ರಮೇಶ್ ಅರವಿಂದ್ ಡಿಟೆಕ್ಟಿವ್ ಪಾತ್ರದಲ್ಲಿ ಮಿಂಚುತ್ತಿದ್ದಾರೆ. ವಿಭಿನ್ನವಾದ ಕಥಾಹಂದರ ಹೊಂದಿರುವ ಶಿವಾಜಿ ಸೂರತ್ಕಲ್ ಚಿತ್ರವು ರಮೇಶ್ ಸಿನಿ ಜೀವನದ ತುಂಬಾ ಮಹತ್ತರವಾದ ಸಿನಿಮಾವಾಗಿದೆ ಎನ್ನಲಾಗಿದೆ. ರಮೇಶ್ ಅರವಿಂದ್ ಇದರಲ್ಲಿ 'ಕ್ರೈಮ್ ಬ್ರಾಂಚ್'ನ ತುಂಬಾ ಚಾಣಾಕ್ಯ ಗೂಢಾಚಾರಿ ಅಧಿಕಾರಿಯಾಗಿ ಕಾಣಿಸಿಕೊಂಡಿದ್ದಾರಂತೆ. ಈ ಚಿತ್ರದಲ್ಲಿ ರಮೇಶ್ ಅರವಿಂದ್ ಅವರಿಗೆ ನಾಯಕಿಯಾಗಿ ರಾಧಿಕಾ ಚೇತನ್ ಕಾಣಿಸಿಕೊಂಡಿದ್ದಾರೆ.

ರಾಧಿಕಾ ಇಲ್ಲಿ ಮಹಿಳಾ ವಕೀಲರ ಪಾತ್ರದಲ್ಲಿ ಮಿಂಚಿದ್ದಾರೆ. ರಮೇಶ್ ಪತ್ನಿಯಾಗಿ ಕಾಣಿಸಿಕೊಂಡಿರುವ ರಾಧಿಕಾ ಪಾತ್ರ, ಚಿತ್ರದ ಹೈಲೈಟ್ ಆಗಿದೆಯಂತೆ. ಇನ್ನು ಚಿತ್ರದಲ್ಲಿ ಆರೋಹಿ ನಾರಾಯಣ್ ಪ್ರಮುಖ ಪಾತ್ರದಲ್ಲಿ ಮತ್ತೊಬ್ಬರು ನಾಯಕಿಯಾಗಿ ಮಿಂಚಿದ್ದಾರೆ.

'ಶಿವಾಜಿ ಸೂರತ್ಕಲ್' ಚಿತ್ರಕ್ಕೆ ಆಕಾಶ್ ಶ್ರೀವಾತ್ಸವ್ ನಿರ್ದೇಶನ ಮಾಡುತ್ತಿದ್ದು, 'ಅಂಜನಾದ್ರಿ ಸಿನಿ ಕ್ರಿಯೇಷನ್'ನಲ್ಲಿ ಚಿತ್ರ ಸಿದ್ಧವಾಗುತ್ತಿದೆ. ಈ ಚಿತ್ರದ ಶೇ% 80ರಷ್ಟು ಚಿತ್ರೀಕರಣ ಮುಗಿದಿದ್ದು, ಚಿತ್ರದ ಒಂದಿಷ್ಟು ಫೋಟೋಗಳನ್ನು ಸಾಮಾಜಿಕ ಜಾಲತಾಣದಲ್ಲಿ ಹಂಚಿಕೊಂಡಿದೆ ಚಿತ್ರತಂಡ. ಚಿತ್ರವು ಸದ್ಯದಲ್ಲೇ ತೆರೆಗೆ ಬರಲಿದೆ ಎನ್ನಲಾಗಿದೆ.