ಕನ್ನಡದ ನಟಿ ರಶ್ಮಿಕಾ ಸದ್ಯ ತಮಿಳು ಸಿನಿಮಾದಲ್ಲಿ ನಟಿಸುತ್ತಿರುವುದು ಗೊತ್ತೇ ಇದೆ. ಈಗಾಗಲೇ ತಮಿಳು ನಟ ಕಾರ್ತಿ ಜೊತೆಗೆ ರಶ್ಮಿಕಾ ನಟಿಸುತ್ತಿರುವ ಇನ್ನೂ ಹೆಸರಿಡದ ಈ ಚಿತ್ರಕ್ಕೆ ಆಗಲೇ ಮುಹೂರ್ತ ಕೂಡ ನಡೆದಿದೆ. ಇದೀಗ ಈ ಹೆಸರಿಡದ ಚಿತ್ರ ಕನ್ನಡಕ್ಕೆ ಡಬ್ ಆಗುತ್ತದೆ ಎಂಬ ಮಾತುಗಳು ಕೇಳಿ ಬರುತ್ತಿವೆ.
ಸದ್ಯಕ್ಕೆ ವರ್ಕಿಂಗ್ ಟೈಟಲ್ ಆಗಿ 'ಕೆ 19' ಎನ್ನುವ ಚಿತ್ರದಲ್ಲಿ ನಟಿ ರಶ್ಮಿಕಾ ನಟಿಸುತ್ತಿದ್ದು, ಈ ಚಿತ್ರವು ಕನ್ನಡದಲ್ಲಿ ಕೂಡ ಏಕಕಾಲಕ್ಕೆ ಸಿದ್ಧವಾಗಿ ಬಿಡುಗಡೆಯಾಗಲಿದೆ ಎನ್ನಲಾಗುತ್ತಿದೆ. ತಮಿಳಿನ ಖ್ಯಾತ ನಟ ಕಾರ್ತಿ ಈಗಾಗಲೇ ತೆಲುಗು, ತಮಿಳು ಮತ್ತು ಮಲಯಾಳಂ ಭಾಷೆಗಳಲ್ಲಿ ಅಭಿನಯಿಸಿದ್ದಾಗಿದೆ. ಇದೀಗ ಮುಂಬರುವ ಚಿತ್ರವನ್ನು ಸೌತ್ ಇಂಡಿಯಾದ ನಾಲ್ಕೂ ಭಾಷೆಗಳಲ್ಲಿ ಬಿಡುಗಡೆ ಮಾಡಲು ಪ್ಲಾನ್ ನಡೆಯುತ್ತಿದೆ ಎನ್ನಲಾಗಿದೆ.
ಸದ್ಯಕ್ಕೆ ಕೆ 19 ಎಂದು ಹೆಸರಿಟ್ಟುಕೊಂಡಿರುವ ಈ ಚಿತ್ರವು ಏಕಕಾಲದಲ್ಲಿ ತಮಿಳು-ಕನ್ನಡದಲ್ಲಿ ಬಿಡುಗಡೆಯಾಗಿ ಮಲಯಾಳಂ ಮತ್ತು ತೆಲುಗಿಗೆ ಡಬ್ ಆದರೆ ಅಚ್ಚರಿಯಿಲ್ಲ ಎಂಬಂತಾಗಿದೆ. ಏಕೆಂದರೆ, ಇತ್ತೀಚಿಗೆ ಕನ್ನಡದ ಚಿತ್ರಗಳಿಗೆ ಹೊಸರಾಜ್ಯಗಳಲ್ಲೂ ಬೇಡಿಕೆ ಇದೆ. ಹೀಗಾಗಿ, ಸಹಜವಾಗಿಯೇ ಈ ಬೆಳವಣಿಗೆ ನಡೆದರೆ ಆಶ್ಚರ್ಯವೇನೂ ಇಲ್ಲ. ಅದರಲ್ಲೂ ಕಾರ್ತಿ-ರಶ್ಮಿಕಾ ಜೋಡಿ ಇಡೀ ಸೌತ್ ಇಂಡಿಯಾದಲ್ಲಿ ಫೇಮಸ್ ಹೆಸರು. ಹೀಗಾಗಿ ಈ ಸುದ್ದಿ ನಿಜವಾದರೆ ಬಹಳಷ್ಟು ಸಿನಿಪ್ರೇಕ್ಷಕರು ಖುಷಿಯಾಗಿದ್ದಾರೆ ಎಂಬ ಮಾತು ಸತ್ಯವೇ ಇರಬಹುದು.
ಕನ್ನಡದ ನಟಿ ರಶ್ಮಿಕಾ ತೆಲುಗಿನ 'ಗೀತ ಗೋವಿಂದಂ' ಚಿತ್ರದ ಮೂಲಕ ಇಡೀ ಇಂಡಿಯಾಗೆ ಫೇಮಸ್ ಆಗಿದ್ದಾರೆ. ಇದೀಗ, ಕನ್ನಡ-ತೆಲುಗು-ತಮಿಳು ಈ ಮೂರೂ ಭಾಷೆಗಳಲ್ಲಿ ಬ್ಯುಸಿ ನಟಿಯಾಗಿದ್ದಾರೆ. ಸದ್ಯದಲ್ಲೇ ಮಲಯಾಳಂ ಮತ್ತು ಬಾಲಿವುಡ್ ಚಿತ್ರರಂಗಗಳಿಗೆ ರಶ್ಮಿಕಾ ಪ್ರಯಾಣ ಬೆಳೆಸಿದರೆ ಖಂಡಿತ ಅಚ್ಚರಿ ಪಡಬೇಕಾಗಿಲ್ಲ. ಏಕೆಂದರೆ, ಸದ್ಯಕ್ಕೆ ಕನ್ನಡದ ನಟಿ ರಶ್ಮಿಕಾ ಸೌತ್ ಇಂಡಿಯಾದ ಓಡುವ ಕುದುರೆ.