ತಮಿಳಿನಲ್ಲಿ ಕನ್ನಡದ ಮಫ್ತಿ: ಶಿವಣ್ಣ ಪಾತ್ರದಲ್ಲಿ ಸಿಂಬು

ಶ್ರೀಮುರಳಿ, ಶಿವರಾಜ್‌ಕುಮಾರ್‌ ನಟನೆಯ ಮಫ್ತಿ ಚಿತ್ರ ತಮಿಳಿಗೆ ರಿಮೇಕ್‌ ಅಗಿಲಿದ್ದು, ಗೌತಮ್‌ ಕಾರ್ತಿಕ್‌ ಮತ್ತು ಸಿಂಬು ಒಟ್ಟಿಗೆ ನಟಿಸುತ್ತಿದ್ದಾರೆ. ಸ್ಯಾಂಡಲ್‌ವುಡ್‌ನಲ್ಲಿ ಸೂಪರ್‌ಹಿಟ್‌ ಆಗಿದ್ದ ಆ ಚಿತ್ರವಿದು. ಕನ್ನಡದಲ್ಲಿ ನಿರ್ದೇಶಿಸಿದ್ದ ನರ್ತನ್‌ ಅವರೇ ತಮಿಳಿನಲ್ಲೂ ಡೈರೆಕ್ಟ್ ಮಾಡಲಿದ್ದಾರೆ. ಚಿತ್ರದಲ್ಲಿ ಶ್ರೀಮುರಳಿ ಪಾತ್ರದಲ್ಲಿ ಗೌತಮ್‌ ಕಾರ್ತಿಕ್‌, ಶಿವರಾಜ್‌ಕುಮಾರ್‌ ಪಾತ್ರಕ್ಕೆ ಸಿಂಬು ಎಂಟ್ರಿ ಕೊಟ್ಟಿದ್ದಾರೆ.

ತಮಿಳು ಚಿತ್ರಕ್ಕಾಗಿ ಪಾತ್ರಗಳನ್ನು ನರ್ತನ್‌ ಸ್ವಲ್ಪ ಬದಲಾಯಿಸಿದ್ದಾರೆ. ಅಷ್ಟೇ ಅಲ್ಲ, ಪ್ರಮುಖ ದೃಶ್ಯಗಳಲ್ಲೂ ಬದಲಾವಣೆ ಮಾಡಲಾಗಿದೆ. ಸಿನಿಮಾವನ್ನು ಕೆಇ ಜ್ಞಾನವೇಲ್‌ ರಾಜ ನಿರ್ಮಾಣ ಮಾಡುತ್ತಿದ್ದಾರೆ. ಮದ್ರಾಸ್‌ ಮತ್ತು ಕಬಾಲಿ ಚಿತ್ರಕ್ಕೆ ಕೆಲಸ ಮಾಡಿರುವ ಸ್ಟಂಟ್‌ ಮಾಸ್ಟರ್‌ ಅನ್ಬರಿವ್‌ ಈ ಚಿತ್ರಕ್ಕೆ ಕೆಲಸ ಮಾಡಲಿದ್ದಾರೆ.

ಮಫ್ತಿಗೆ ಕೆಲಸ ಮಾಡಿದ ಛಾಯಾಗ್ರಾಹಕ ನವೀನ್‌ ಕುಮಾರ್‌ ಅವರೇ ತಮಿಳಿನಲ್ಲೂ ಕ್ಯಾಮೆರಾ ಹಿಡಿಯಲಿದ್ದಾರೆ. ಅಂದ ಹಾಗೆ ಇದು ಸಿಂಬು ನಟನೆಯ 45ನೇ ಚಿತ್ರ. ಮೇ 25ರಂದು ಚಿತ್ರ ಸೆಟ್ಟೇರಲಿದೆ.

ನಟ ಶಿವರಾಜ್‌ ಕುಮಾರ್‌ ಬೈರತಿ ರಣಗಲ್ಲು ಪಾತ್ರದಲ್ಲಿ ಎಲ್ಲರ ಮನಸೂರೆಗೊಂಡಿದ್ದರು. ನರ್ತನ್‌ ನಿರ್ದೇಶನದ ಈ ಚಿತ್ರದ ತೆಲುಗು ರಿಮೇಕ್‌ ರೈಟ್ಸ್‌ ದೊಡ್ಡ ಮೊತ್ತಕ್ಕೆ ಮಾರಾಟವಾಗಿದೆ. ಶತದಿನೋತ್ಸವ ಕಂಡ ಚಿತ್ರದಲ್ಲಿ ಎರಡು ಮುಖ್ಯ ಪಾತ್ರಗಳಲ್ಲಿ ತೆಲುಗಿನ ಯಾರೆಲ್ಲಾ ನಟಿಸುತ್ತಾರೆ ಎಂಬ ಕುತೂಹಲ ಎಲ್ಲರಲ್ಲಿದೆ.

'ಮಫ್ತಿ ಸಿನಿಮಾದ ಕಥೆಯನ್ನು ನಾನು ಬಹಳ ಇಷ್ಟಪಟ್ಟು ಮಾಡಿದ್ದೆ. ಈ ಸಿನಿಮಾದಲ್ಲಿ ಶ್ರೀಮುರಳಿ ಮತ್ತು ಶಿವಣ್ಣ ಅವರ ಲುಕ್‌ ಹಾಗೂ ಇವರಿಬ್ಬರ ಅಭಿನಯ, ಹಿರಿಯ ನಟ ದೇವರಾಜ್‌ ಅವರ ನಟನೆ ಎಲ್ಲವೂ ವಿಶೇಷವಾಗಿದೆ. ಇವರೆಲ್ಲರ ನಟನೆ ನನ್ನ ಕಥೆಗೆ ಹೇಗೆ ಬ್ಲೆಂಡ್‌ ಆಗಿದೆ ಎನ್ನುವುದೇ ಸಿನಿಮಾ ವಿಶೇಷತೆಯಾಗಿದೆ' ಎನ್ನುತ್ತಾರೆ ನರ್ತನ್.