ಚುನಾವಣೆ ಹೊತ್ತಿನಲ್ಲಿ ಪೊಲಿಟಿಕಲ್‌ ಕಥೆ ಹೇಳುವ ಧ್ವಜ

*ಶರಣು ಹುಲ್ಲೂರು

Vijaya Karnataka Web

ಚುನಾವಣೆಯ ಹೊತ್ತಿನಲ್ಲಿ ಪೊಲಿಟಿಕಲ್‌ ಥ್ರಿಲ್ಲರ್‌ ಸಿನಿಮಾವೊಂದು ಕನ್ನಡದಲ್ಲಿ ರಿಲೀಸ್‌ಗೆ ಸಿದ್ಧವಾಗಿದೆ. ಪ್ರಿಯಾಮಣಿ ಮತ್ತು ರವಿ ಮುಖ್ಯ ಭೂಮಿಕೆಯ ಚಿತ್ರ ಇದಾಗಿದ್ದು, ಖ್ಯಾತ ಸಿನಿಮಾಟೋಗ್ರಾಫರ್‌ ಅಶೋಕ್‌ ಕಶ್ಯಪ್‌ ನಿರ್ದೇಶನ ಮಾಡಿದ್ದಾರೆ. ಚಿತ್ರಕ್ಕೆ 'ಧ್ವಜ' ಎಂದು ಹೆಸರಿಡಲಾಗಿದ್ದು, ರಾಜಕೀಯದ ಜತೆ ಲವ್‌ ಸ್ಟೋರಿ ಕೂಡ ಕಥೆಯಲ್ಲಿದೆ.

ಸಿನಿಮಾದ ಕಥೆಯೇ ವಿಭಿನ್ನವಾಗಿದೆ. ಪಕ್ಷ ವೊಂದರ ಕಾರ್ಯಕರ್ತನ ಕೊಲೆಯ ಸುತ್ತ ಹೆಣೆದಿರುವ ಕಥೆಯಲ್ಲಿ ಈಗಿನ ರಾಜಕೀಯ ಪಟ್ಟುಗಳು ಮತ್ತು ಪ್ರೇಮಿಗಳಿಬ್ಬರ ಕಥೆಯನ್ನು ಹೇಳಿದ್ದಾರಂತೆ ನಿರ್ದೇಶಕರು. ಹಾಗಾಗಿ ಚಿತ್ರದ ಸ್ಟೋರಿಯೇ ಪ್ರೇಕ್ಷಕರಿಗೆ ಥ್ರಿಲ್‌ ನೀಡಲಿದೆ ಎಂಬುದು ಅವರ ನಂಬಿಕೆಯಾಗಿದೆ.

ಈ ಚಿತ್ರದ ಮೂಲಕ ರವಿ ಸಿನಿಮಾ ರಂಗ ಪ್ರವೇಶ ಮಾಡುತ್ತಿದ್ದಾರೆ. ಈವರೆಗೂ ಉಪೇಂದ್ರ ಬಳಿ ಕೆಲಸ ಮಾಡಿದ್ದರು ಇವರು. ಮೊದಲ ಬಾರಿಗೆ ಹೀರೋ ಆಗಿ ತೆರೆಯ ಮೇಲೆ ದ್ವಿಪಾತ್ರದಲ್ಲಿ ಕಾಣಿಸಿಕೊಳ್ಳುತ್ತಿದ್ದಾರೆ. ಒಂದು ಟಫ್‌ ಆಗಿರುವ ಪಾತ್ರವಾದರೆ, ಮತ್ತೊಂದು ಕಾಲೇಜು ಉಪನ್ಯಾಸಕನದ್ದು. ಇವರೊಂದಿಗೆ ಪ್ರಿಯಾಮಣಿ ನಾಯಕಿ. ರಮ್ಯಾ ಎಂಬ ಹೆಸರಿನ ಪಾತ್ರ ಮಾಡಿದ್ದಾರೆ ಅವರು.

'ನಟನಾಗಿ ಸಿನಿಮಾ ರಂಗಕ್ಕೆ ನಾನು ಹೊಸಬ. ನನ್ನಂಥ ಹೊಸಬನ ಜತೆ ಪ್ರಿಯಾಮಣಿ ಒಪ್ಪಿಕೊಂಡು ಚಿತ್ರ ಮಾಡಿದ್ದಾರೆ. ಹಾಗಾಗಿ ನಾನು ಅವರಿಗೆ ಕೃತಜ್ಞತೆ ಹೇಳುತ್ತೇನೆ. ಇದೊಂದು ಪೊಲಿಟಿಕಲ್‌ ಥ್ರಿಲ್ಲರ್‌ ಚಿತ್ರವಾಗಿದ್ದರೂ, ನಮ್ಮ ಸುತ್ತಲಿನ ಅನೇಕ ಘಟನೆಗಳು ನಮಗೆ ಕಾಣುತ್ತವೆ. ಸದ್ಯ ನಾವೆಲ್ಲರೂ ಚುನಾವಣೆಯನ್ನು ಎದುರುಗೊಂಡಿದ್ದೇವೆ. ವಾಸ್ತವದಲ್ಲಿ ಏನೆಲ್ಲ ಘಟನೆಗಳು ನಡೆಯುತ್ತಿವೆಯೋ ಸಿನಿಮಾದಲ್ಲಿ ಅವೆಲ್ಲವೂ ಇವೆ. ಆದಷ್ಟು ನೈಜ ಎನ್ನುವಂತೆ ನಿರ್ದೇಶಕರು ದೃಶ್ಯಗಳನ್ನು ಹೆಣೆದಿದ್ದಾರೆ' ಅಂತಾರೆ ರವಿ.