ದಿಗಂತ್ ಜತೆ ಕಥೆಯೊಂದು ಶುರುವಾಗಿದೆ

*ಶರಣು ಹುಲ್ಲೂರು

Vijaya Karnataka Web

ಕನ್ನಡದಲ್ಲಿ ಮತ್ತೊಂದು ಹೊಸ ಬಗೆಯ ಸಿನಿಮಾ ತಯಾರಾಗಿದೆ. ದಿಗಂತ್‌ ಸೇರಿದಂತೆ ಆರೇಳು ಪ್ರಮುಖ ಪಾತ್ರವಿರುವ ಸಿನಿಮಾ ಇದಾಗಿದ್ದು, ಮೂರು ವಯೋಮಾನದವರ ಕಥೆಯನ್ನು ಈ ಚಿತ್ರದ ಮೂಲಕ ಹೇಳಲು ಹೊರಟಿದ್ದಾರೆ ನಿರ್ದೇಶಕ ಸೆನ್ನಾ ಹೆಗ್ಡೆ. ಈಗಾಗಲೇ ಮಲೆಯಾಳಂನಲ್ಲೊಂದು ಪ್ರಯೋಗಾತ್ಮಕ ಚಿತ್ರ ಮಾಡಿರುವ ಸೆನ್ನಾ, ಮೊದಲ ಬಾರಿಗೆ ಕನ್ನಡದ ಚಿತ್ರಕ್ಕೆ ಆ್ಯಕ್ಷನ್‌ ಕಟ್‌ ಹೇಳಿದ್ದಾರೆ. ಸಂಬಂಧಗಳ ಮಹತ್ವ ಸಾರುವ ಚಿತ್ರ ಇದಾಗಿದೆ. ಕಥೆಯಷ್ಟೇ ಪಾತ್ರಗಳು ಕೂಡ ಇಲ್ಲಿ ಮಹತ್ವ ಪಡೆದುಕೊಂಡಿವೆ. 20, 30 ಮತ್ತು 60 ಹೀಗೆ ಮೂರು ಹಂತದ ವಯೋಮಾನದವರ ಪಾತ್ರಗಳು ಇಲ್ಲಿವೆ.

20ರ ವಯೋಮಾನದ ಜೋಡಿಯಾಗಿ ಕಿರಿಕ್‌ ಪಾರ್ಟಿಯ ಅಶ್ವಿನ್‌ ರಾವ್‌ ಮತ್ತು ಶ್ರೇಯಾ ಆಂಚನ್‌ ನಟಿಸಿದ್ದರೆ, 30ರ ವಯಸ್ಸಿನ ಜೋಡಿಯಾಗಿ ದಿಗಂತ್‌ ಮತ್ತು ತಮಿಳಿನ ಖ್ಯಾತ ನಟಿ ಪೂಜಾ ದೇವರಿಯಾ ಕಾಣಿಸಿಕೊಂಡಿದ್ದಾರೆ. 60ರ ತಲೆಮಾರಿನವರಾಗಿ ಬಾಬು ಹಿರಣ್ಣಯ್ಯ ಮತ್ತು ಅರುಣಾ ಬಾಲರಾಜ್‌ ಬಣ್ಣ ಹಚ್ಚಿದ್ದಾರೆ. ಹಾಗಾಗಿ ಎಲ್ಲ ವಯೋಮಾನದವರ ಕನಸುಗಳನ್ನು ಹೇಳುವ ಪ್ರಯತ್ನ ಇಲ್ಲಿ ಆಗಿದೆ.

'ಎಲ್ಲದಕ್ಕಿಂತ ದೊಡ್ಡದು ಸಂಬಂಧ. ಆಯಾ ವಯಸ್ಸಿಗೆ ತಕ್ಕಂತೆ ಸಂಬಂಧದ ವ್ಯಾಖ್ಯಾನ ಕೂಡ ಬದಲಾಗುತ್ತದೆ. ಇದೇ ನಮ್ಮ ಸಿನಿಮಾದ ಒನ್‌ಲೈನ್‌ ಸ್ಟೋರಿ. ಅವರ ಆಲೋಚನೆ, ಕನಸು, ಕನವರಿಕೆಗಳನ್ನು ಬೇರೆ ಬೇರೆ ಆಯಾಮದಿಂದ ನೋಡುವ ಪ್ರಯತ್ನ ಸಿನಿಮಾದಲ್ಲಿ ಆಗಿದೆ' ಅಂತಾರೆ ನಿರ್ದೇಶಕರು.

ಸಿನಿಮಾದ ಮತ್ತೊಂದು ವಿಶೇಷತೆ ಅಂದರೆ, ದಿಗಂತ್‌ ಇಲ್ಲಿ ರೇಸಾರ್ಟ್‌ ಮಾಲೀಕನ ಪಾತ್ರ ನಿರ್ವಹಿಸುತ್ತಿದ್ದಾರೆ. ಪೂಜಾ ಬೋಲ್ಡ್‌ ಪಾತ್ರದಲ್ಲಿ ಕಾಣಿಸಿಕೊಂಡಿದ್ದಾರೆ. ಇವರ ಭಾಗದ ಚಿತ್ರೀಕರಣ ಕಡಲ ಕಿನಾರೆಯಲ್ಲಿ ನಡೆದಿದೆ. ಅಂದಹಾಗೆ ಈ ಚಿತ್ರವನ್ನು ರಕ್ಷಿತ್‌ ಶೆಟ್ಟಿ ಮತ್ತು ಪುಷ್ಕರ್‌ ಮಲ್ಲಿಕಾರ್ಜುನ್‌ ಜಂಟಿಯಾಗಿ ಈ ಚಿತ್ರವನ್ನು ನಿರ್ಮಾಣ ಮಾಡಿದ್ದಾರೆ.