ಮೈಸೂರು ಲಲಿತ ಮಹಲ್ ಪ್ಯಾಲೇಸ್‌ನಲ್ಲಿ ಕೆಜಿಎಫ್ 2 ಚಿತ್ರೀಕರಣ

ರಾಕಿಂಗ್ ಸ್ಟಾರ್ ಯಶ್ ನಾಯಕನಟನಾಗಿರುವ 'ಕೆಜಿಎಫ್: ಚಾಪ್ಟರ್ 2' ಚಿತ್ರದ ಶೂಟಿಂಗ್ ಮೈಸೂರಿನಲ್ಲಿ ಆರಂಭವಾಗಲಿದೆ. ಕೆಜಿಎಫ್ 2ಗೆ ಸಂಬಂಧಿಸಿದ ಕೆಲವು ಸನ್ನಿವೇಶಗಳನ್ನು ಮೈಸೂರಿನ ಲಲಿತ ಮಹಲ್ ಪ್ಯಾಲೇಸ್‌ನಲ್ಲಿ ಚಿತ್ರೀಕರಿಸಲು ಚಿತ್ರತಂಡ ಮುಂದಾಗಿದೆ.

ಈ ಹಿಂದೆ ಕೆಜಿಎಫ್ ಚಾಪ್ಟರ್ 1 ಚಿತ್ರದ ಕೆಲವು ಸನ್ನಿವೇಶಗಳನ್ನು ಲಲಿತ ಮಹಲ್ ಪ್ಯಾಲೇಸ್‌ನಲ್ಲಿ ಚಿತ್ರೀಕರಿಸಲಾಗಿತ್ತು. ಜೂನ್ 4ರಿಂದ ಚಿತ್ರೀಕರಣ ಆರಂಭವಾಗಲಿದ್ದು ಯಶ್‌ಗೆ ಸಂಬಂಧಿಸಿದ ಸನ್ನಿವೇಶಗಳನ್ನು ಜೂನ್ 6ರಿಂದ ಚಿತ್ರೀಕರಿಸಿಕೊಳ್ಳಲಾಗುತ್ತೆ ಎಂದಿವೆ ಮೂಲಗಳು.

ಕೆಜಿಎಫ್ 1ರಲ್ಲಿ ಎಂಬತ್ತರ ದಶಕದ ಬೆಂಗಳೂರಿನ ಸೆಟ್ಟನ್ನು ಮೈಸೂರಿನಲ್ಲಿ ಸೃಷ್ಟಿಸಲಾಗಿತ್ತು. ಚಿತ್ರದ ನಾಯಕಿ ರೀನಾರನ್ನು (ಶ್ರೀನಿಧಿ ಶೆಟ್ಟಿ) ಭೇಟಿಯಾಗುವ ದೃಶ್ಯವನ್ನು ಮಾನಸಗಂಗೋತ್ರಿ ಕ್ಲಾಕ್ ಟವರ್ ಬಳಿ ಚಿತ್ರೀಕರಿಸಲಾಗಿತ್ತು.

ಮೈಸೂರಿನ ಲಲಿತ ಮಹಲ್ ಪ್ಯಾಲೇಸನ್ನು ಗರುಡನ ಭವ್ಯ ಭಂಗಲೆಯಾಗಿ ಚಿತ್ರದಲ್ಲಿ ತೋರಿಸಲಾಗಿದೆ. ಗರುಡನನ್ನು ಕೊಲ್ಲಲು ಮಾಡುವ ಮೊದಲ ಪ್ರಯತ್ನವನ್ನು ಜಯಲಕ್ಷ್ಮಿ ವಿಲಾಸ್ ಪ್ಯಾಲೇಸ್‍ನಲ್ಲಿ ಚಿತ್ರೀಕರಿಸಲಾಗಿತ್ತು. ಇದೀಗ ಮತ್ತೊಮ್ಮೆ ಲಲಿತ ಮಹಲ್ ಪ್ಯಾಲೇಸ್‌ ಬಳಸಿಕೊಳ್ಳಲಾಗುತ್ತಿದೆ.

ಚಿತ್ರದಲ್ಲಿ ಹಲವಾರು ಬಾಲಿವುಡ್ ತಾರೆಗಳು ಇದ್ದೂ, ಇಂದಿರಾ ಗಾಂಧಿಯಾಗಿ ರವೀನಾ ಟಂಡನ್ ಕಾಣಿಸುತ್ತಿದ್ದಾರೆ. ಸಂಜಯ್ ದತ್ ಸಹ ಚಿತ್ರದ ಪಾತ್ರವರ್ಗದಲ್ಲಿದ್ದಾರೆ. ಹಾಗಾಗಿ ಕೆಜಿಎಫ್ 1ಕ್ಕಿಂತ ಕೆಜಿಎಫ್ 2 ಚಿತ್ರದ ಬಗ್ಗೆ ಬಹಳಷ್ಟು ನಿರೀಕ್ಷೆಗಳಿವೆ.