ಮಲ್ಟಿಸ್ಟಾರ್‌ ಸಿನಿಮಾ: ಗೆರೆ ಎಳೆದುಕೊಂಡ ಸುದೀಪ್‌

* ಶರಣು ಹುಲ್ಲೂರು

Vijaya Karnataka Web

ಯಾವತ್ತೂ ನಾನು ಮಲ್ಟಿಸ್ಟಾರ್‌ ಚಿತ್ರಗಳಲ್ಲಿ ನಟಿಸುವುದಿಲ್ಲ ಎಂದು ಹೇಳಿಕೆ ನೀಡಿರುವ ಕಿಚ್ಚ ಸುದೀಪ್‌, ಇದೀಗ ತಮ್ಮ ಬ್ಯಾನರ್‌ನಲ್ಲಿ ಅಂತಹ ಚಿತ್ರಗಳನ್ನು ಮಾಡುವುದಾಗಿ ಹೇಳಿದ್ದಾರೆ. ಜತೆಗೆ, ತಮ್ಮ ಸ್ವಂತ ಬ್ಯಾನರ್‌ನಲ್ಲಿ ಬರುವ ಮಲ್ಟಿಸ್ಟಾರ್‌ ಚಿತ್ರಗಳಲ್ಲೂ ನಟಿಸುವ ಪ್ರಶ್ನೆಯೇ ಇಲ್ಲ ಎಂದು ಅವರು ಸ್ಪಷ್ಟಪಡಿಸಿದ್ದಾರೆ.

'ಮಲ್ಟಿಸ್ಟಾರ್‌ ಸಿನಿಮಾಗಳನ್ನು ಮಾಡಿದಾಗ ಆಯಾ ಕಲಾವಿದರಿಗೆ ಸರಿಯಾದ ನ್ಯಾಯ ಸಿಗುವುದಿಲ್ಲ ಎಂಬ ಮಾತುಗಳನ್ನು ಕೇಳಿದ್ದೇನೆ. ದಿ ವಿಲನ್‌ ಸಿನಿಮಾ ಮಾಡಿದಾಗಲೂ ಅಂತಹ ಮಾತುಗಳನ್ನು ಕೇಳಿದ್ದೇನೆ. ಹಾಗಾಗಿ ನಾನು ಮಲ್ಟಿಸ್ಟಾರ್‌ ಚಿತ್ರಗಳಲ್ಲಿ ನಟಿಸುವುದಿಲ್ಲ ಎಂದು ಹೇಳಿಕೆ ಕೊಟ್ಟಿದ್ದೆ. ನನ್ನ ಬ್ಯಾನರ್‌ನಲ್ಲಿ ಯಾರಾದರೂ ಇಂತಹ ಸಿನಿಮಾಗಳನ್ನು ಮಾಡಲು ಮುಂದೆ ಬಂದರೆ ನಿರ್ಮಾಣ ಮಾಡುತ್ತೇನೆ. ನಟಿಸುವುದು ಬಿಡುವುದು ಆಯಾ ಕಲಾವಿದರಿಗೆ ಬಿಟ್ಟ ವಿಷಯ' ಎಂದಿದ್ದಾರೆ ಸುದೀಪ್‌. [ಯಾವುದೇ ಹೀರೋಗೆ ನಾನು 'ಪ್ರತಿಸ್ಪರ್ಧಿ' ಅಲ್ಲವೇ ಅಲ್ಲ: ಕಿಚ್ಚ ಸುದೀಪ್]

ದಿ ವಿಲನ್‌ ಸಿನಿಮಾ ರಿಲೀಸ್‌ ಆದಾಗ ತಮ್ಮ ನೆಚ್ಚಿನ ನಟರಿಗೆ ಸರಿಯಾದ ಪಾತ್ರ ಮತ್ತು ದೃಶ್ಯಗಳು ಸಿಕ್ಕಿಲ್ಲವೆಂದು ಸುದೀಪ್‌ ಮತ್ತು ಶಿವರಾಜ್‌ ಕುಮಾರ್‌ ಅಭಿಮಾನಿಗಳು ಸೋಷಿಯಲ್‌ ಮೀಡಿಯಾದಲ್ಲಿ ತಗಾದೆ ತಗೆದಿದ್ದರು. ಅಲ್ಲದೇ, ನೇರವಾಗಿಯೂ ಆಯಾ ನಟರಿಗೂ ಅಭಿಮಾನಿಗಳು ಹೇಳಿದ್ದರು. ಅಭಿಮಾನಿಗಳ ಅಭಿಮಾನಕ್ಕೆ ಕಿಚ್ಚ ಸೋತಿದ್ದಾರೆ. ಹಾಗಾಗಿ ಅವರು ಮಲ್ಟಿಸ್ಟಾರ್‌ ಚಿತ್ರಗಳಲ್ಲಿ ನಟಿಸುವುದಿಲ್ಲ ಎಂಬ ಹೇಳಿಕೆ ನೀಡಿದ್ದಾರೆ.