ಸುಂದರ ಬದುಕಿನ ಕಥೆ ಹೇಳುವ ಲೈಫ್ ಜತೆ ಸೆಲ್ಫಿ

* ಶರಣು ಹುಲ್ಲೂರು

Vijaya Karnataka Web

ಚೌಕ ಸಿನಿಮಾದ ನಂತರ ಪ್ರೇಮ್‌ ಮತ್ತು ಪ್ರಜ್ವಲ್‌ ದೇವರಾಜ್‌ ಒಂದಾಗಿ ನಟಿಸಿರುವ ಸಿನಿಮಾ 'ಲೈಪ್‌ ಜತೆ ಒಂದ್‌ ಸೆಲ್ಫಿ'. ದರ್ಶನ್‌ ಸಹೋದರ ದಿನಕರ್‌ ತೂಗುದೀಪ ನಿರ್ದೇಶನ ಮತ್ತು ಹರಿಪ್ರಿಯಾ ನಾಯಕಿಯಾಗಿ ನಟಿಸಿರುವ ಈ ಸಿನಿಮಾದಲ್ಲಿ ಸಾಕಷ್ಟು ಹೊಸ ವಿಷಯಗಳನ್ನು ಹೇಳಲಾಗಿದೆಯಂತೆ. ಕಲರ್‌ಫುಲ್‌ ಆಗಿರುವ ಈ ಚಿತ್ರದ ಕುರಿತು ಮಾತನಾಡಲು ಲವಲವಿಕೆ ಕಚೇರಿಗೆ ಆಗಮಿಸಿತ್ತು ಸಿನಿಮಾ ತಂಡ. ಅವರೊಂದಿಗೆ ನಡೆದ ಮಾತುಕತೆ ಇಲ್ಲಿದೆ.

ತಾನು ಮರೆಯಲಾಗದ ಘಟನೆ ಅಥವಾ ಸಂಗತಿಯ ಸಂಭ್ರಮವನ್ನು ಪ್ರತಿಯೊಬ್ಬರು ಸೆಲ್ಫಿಯಲ್ಲಿ ಸೆರೆ ಹಿಡಿಯಲು ಬಯಸುತ್ತಾರೆ. ಇಂತಹ ಸೆಲ್ಫಿಯ ಹಿಂದೆ ರೋಚಕ ಕಥೆ ಅಡಗಿರುತ್ತದೆ. ಅಂಥದ್ದೇ ಒಂದು ಕಥೆಯನ್ನು ಸಿನಿಮಾ ಮಾಡಿದ್ದಾರಂತೆ ನಿರ್ದೇಶಕರು. ಮೂವರು ವಿಭಿನ್ನ ವ್ಯಕ್ತಿತ್ವದ ಇಬ್ಬರು ಹುಡುಗರು, ಓರ್ವ ಹುಡುಗಿ ಗೋವಾದಲ್ಲಿ ಭೇಟಿ ಆಗುತ್ತಾರೆ. ತಮ್ಮ ನೋವುಗಳನ್ನು ಹಂಚಿಕೊಳ್ಳುತ್ತಾರೆ. ಆ ನೋವುಗಳಿಗೆ ಒಬ್ಬರಿಗೊಬ್ಬರು ಹೇಗೆ ಸ್ಪಂದಿಸುತ್ತಾರೆ ಎನ್ನುವುದೇ ಸಿನಿಮಾ ಎಂದು ಹೇಳಿದ್ದಾರೆ ದಿನಕರ್‌.

ಹರಿಪ್ರಿಯಾ ಬೋಲ್ಡ್‌ ಪಾತ್ರದಲ್ಲಿ ಕಾಣಿಸಿಕೊಂಡಿದ್ದರೆ, ಎಂಜಿನಿಯರಿಂಗ್‌ ಓದಿಕೊಂಡಿದ್ದರೂ ನಿರ್ದೇಶಕನಾಗಲು ಕನಸು ಕಾಣುವ ಪಾತ್ರದಲ್ಲಿ ಪ್ರೇಮ್‌ ನಟಿಸಿದ್ದಾರೆ. ಶ್ರೀಮಂತ ಹುಡುಗನ ಪಾತ್ರಕ್ಕೆ ಪ್ರಜ್ವಲ್‌ ದೇವರಾಜ್‌ ಕಾಣಿಸಿಕೊಂಡಿದ್ದಾರೆ.


'ಪ್ರತಿಯೊಬ್ಬರ ಜೀವನದಲ್ಲೂ ಒಂದಿಲ್ಲೊಂದು ಸಮಸ್ಯೆಗಳು ಎದುರಾಗುತ್ತಲೇ ಇರುತ್ತವೆ. ಆ ಸಮಸ್ಯೆಗೆ ನಾವು ಹೇಗೆ ಸ್ಪಂದಿಸುತ್ತೇವೆ ಅನ್ನುವುದರ ಮೇಲೆ ಅದಕ್ಕೆ ಪರಿಹಾರ ನಿಂತಿರುತ್ತದೆ. ಆದರೆ, ಈ ಹೊತ್ತಿನ ಯುವಕರು ತಮ್ಮ ಕಷ್ಟಕ್ಕೆ ಸ್ಪಂದಿಸುವ ರೀತಿಯೇ ಬೇರೆಯದ್ದಾಗಿದೆ. ಹಾಗಾಗಿ ಚಿಕ್ಕ ಕಷ್ಟವೂ ಅವರಿಗೆ ಬೆಟ್ಟದಂತೆ ಕಾಣುತ್ತದೆ. ಇದಕ್ಕೊಂದು ಪರಿಹಾರ ಈ ಸಿನಿಮಾದಲ್ಲಿ ಸಿಗಲಿದೆ' ಅಂತಾರೆ ನಿರ್ದೇಶಕ ದಿನಕರ್‌.

ಅಂದಹಾಗೆ ಈ ಚಿತ್ರಕ್ಕೆ ಕಥೆ ಬರೆದದ್ದು ನಿರ್ದೇಶಕ ದಿನಕರ್‌ ಪತ್ನಿ ಮಾನಸಾ. ಸಂಗೀತ ನೀಡಿದ್ದು ವಿ.ಹರಿಕೃಷ್ಣ. ಸಮೃದ್ಧಿ ಮಂಜುನಾಥ್‌ ನಿರ್ಮಾಣವಿದ್ದು, ಗೋವಾ ಸೇರಿ ಹಲವು ಸುಂದರ ತಾಣಗಳಲ್ಲಿ ಸಿನಿಮಾ ಶೂಟ್‌ ಆಗಿದೆ. ಇದೇ ಶುಕ್ರವಾರ ರಾಜ್ಯಾದ್ಯಂತ ಸಿನಿಮಾ ರಿಲೀಸ್‌ ಆಗಲಿದೆ.