Amar Teaser: ಪ್ರೀತಿ 'ಅಮರ' ಎಂದ ಸುಮಲತಾ ಅಂಬರೀಶ್

ಇಂದು ಪ್ರೇಮಿಗಳ ದಿನಾಚರಣೆ. ಈ ಸಂದರ್ಭದಲ್ಲಿ ಅಭಿಷೇಕ್ ಅಂಬರೀಶ್ ಅಭಿನಯದ 'ಅಮರ್' ಚಿತ್ರದ ಟೀಸರ್ ಬಿಡುಗಡೆಯಾಗಿದೆ. ಟೀಸರ್‌ಗೆ ಎಲ್ಲೆಡೆಯಿಂದ ಮೆಚ್ಚುಗೆ ಮಹಾಪೂರ ಹರಿದು ಬರುತ್ತಿದೆ. ಇದೇ ಸಂದರ್ಭದಲ್ಲಿ ಸುಮಲತಾ ಅಂಬರೀಶ್ ವ್ಯಾಲೆಂಟೇನ್ಸ್ ಡೇಗೆ ಶುಭಾಶಯ ತಿಳಿಸಿದ್ದಾರೆ. ಜತೆಗೆ ಅಂಬಿಯನ್ನೂ ನೆನೆದಿದ್ದಾರೆ.

ಈ ಪ್ರೀತಿ ಎಂಬುದು ಅಮರ. ನನ್ನ ಪ್ರೀತಿ (ಅಂಬಿ).. ನೋಡುತ್ತಲೇ ಇರುತ್ತದೆ ಮತ್ತು ನನ್ನ ಮತ್ತು ಅಭಿಯನ್ನು ಜೀವನ ಪರ್ಯಂತ ಎಂದೆಂದಿಗೂ ಕಾಪಾಡುತ್ತದೆ. ಇಂದು ಅಮರ್ ಚಿತ್ರದ ಟೀಸರ್ ಬಿಡುಗಡೆಯಾಗಿದೆ. ನನ್ನ ಪುತ್ರ ಅಭಿಷೇಕ್ ಅಂಬರೀಶ್‌ರನ್ನು ಹರಸಿ. ಪ್ರೀತಿ ಏನು ಎಂಬುದು ಗೊತ್ತಿರುವ ಎಲ್ಲರಿಗೂ ವ್ಯಾಲೆಂಟೇನ್ಸ್ ಡೇ ಶುಭಾಶಯಗಳು ಎಂದಿದ್ದಾರೆ. [ಅಭಿಷೇಕ್ ಅಂಬರೀಶ್ ಅಭಿನಯದ 'ಅಮರ್' ಅಧಿಕೃತ ಟೀಸರ್]

ಇದರ ಜತೆಗೆ ಅಂಬರೀಶ್‌ಗೆ ಗುಲಾಬಿ ನೀಡುತ್ತಿರುವ ಫೋಟೋಗಳನ್ನು ಹಂಚಿಕೊಂಡಿದ್ದಾರೆ. ಒಟ್ಟಾರೆ ಭಾವನಾತ್ಮಕವಾಗಿರುವ ಸುಮಲತಾ ಅಂಬರೀಶ್ ಟ್ವೀಟ್‌ಗೆ ಅಭಿಮಾನಿಗಳು ಫಿದಾ ಆಗಿದ್ದಾರೆ.

ಇನ್ನೊಂದು ಕಡೆ ಅಮರ್‌ ಚಿತ್ರತಂಡ ಮಲೇಶಿಯಾ ತಲುಪಿದೆ. ಫೆ.14ರಂದು ಈ ಸಿನಿಮಾದ ಟೀಸರ್‌ ರಿಲೀಸ್‌ ಆಗುತ್ತಿದ್ದರೆ, ಅತ್ತ ಸಿನಿಮಾ ತಂಡ ಭರ್ಜರಿಯಾಗಿ ಶೂಟಿಂಗ್‌ನಲ್ಲಿ ತೊಡಗಿದೆ. ಅಲ್ಲಿಂದಲೇ ಟೀಸರ್‌ ರಿಲೀಸ್‌ ಮಾಡಲಾಗಿದೆ. ಅಂಬರೀಶ್‌ ಪುತ್ರ ಅಭಿಷೇಕ್‌, ನಾಯಕಿ ತಾನ್ಯ ಹೋಪ್‌ ಸೇರಿದಂತೆ ಹಲವು ಕಲಾವಿದರು ಕೂಡ ವಿದೇಶಕ್ಕೆ ಹಾರಿರುವುದು ವಿಶೇಷ. ಮಗನ ಸಿನಿಮಾದ ಶೂಟಿಂಗ್‌ಗಾಗಿ ನಟಿ ಸುಮಲತಾ ಅಂಬರೀಶ್‌ ಕೂಡ ಜತೆಯಾಗಿದ್ದಾರೆ.

ಒಟ್ಟು ಏಳು ದಿನಗಳ ಕಾಲ ಶೂಟಿಂಗ್‌ಗೆ ಪ್ಲ್ಯಾನ್‌ ಮಾಡಲಾಗಿದೆ. ಮಲೇಶಿಯಾ ನೌಕೆ ಸೇರಿದಂತೆ ಹಲವು ಸ್ಥಳಗಳಲ್ಲಿ ಹಾಡಿನ ಶೂಟಿಂಗ್‌ ಮಾಡುತ್ತಿದ್ದಾರೆ ನಿರ್ದೇಶಕ ನಾಗಶೇಖರ್‌. ಫೆ.18ರವರೆಗೂ ಹಾಡಿನ ಚಿತ್ರೀಕರಣ ನಡೆಯಲಿದ್ದು, ಲಂಗ್ವಾಕಿ, ಕೌಲಲಾಂಪುರ ಮತ್ತಿತರ ರಮಣೀಯ ಸ್ಥಳಗಳನ್ನು ಶೂಟಿಂಗ್‌ಗಾಗಿ ಆಯ್ಕೆ ಮಾಡಿಕೊಳ್ಳಲಾಗಿದೆ.