ಪ್ರಜ್ವಲ್‌ ದೇವರಾಜ್‌ ಮತ್ತು ಶ್ರುತಿ ಹರಿಹರನ್‌ ಮುಖ್ಯಭೂಮಿಕೆಯ ಫನ್ನಿ ಹಾಡೊಂದು ಸಾಮಾಜಿಕ ಜಾಲತಾಣದಲ್ಲಿ ವೈರಲ್‌ ಆಗಿದೆ. ಮನೋಮೂರ್ತಿ ಸಂಗೀತ ನಿರ್ದೇಶನದಲ್ಲಿ ಮೂಡಿ ಬಂದ ಹಾಡಿಗೆ ಶಂಕರ್‌ ಮಹದೇವನ್‌ ಕಂಠಸಿರಿಯಲ್ಲಿ ಈ ಹಾಡು ಮೂಡಿ ಬಂದಿದೆ.
ಇದೇ ಮೊದಲ ಬಾರಿಗೆ ಪ್ರಜ್ವಲ್‌ ದೇವರಾಜ್‌ ಮತ್ತು ಶ್ರುತಿ ಹರಿಹರನ್‌ ಜತೆಯಾಗಿ ಮಾದ ಮತ್ತು ಮಾನಸಿ ಚಿತ್ರದಲ್ಲಿ ನಟಿಸಿದ್ದಾರೆ. ಈ ಸಿನಿಮಾದ 'ಒಮ್ಮೆ ನನ್ನ ನೋಡು ಚಿನ್ನು.. ನೀನೆ ನನ್ನ ಖಾರ ಬನ್ನು' ಹಾಡು ಸಾಮಾಜಿಕ ಜಾಲತಾಣದಲ್ಲಿ ವೈರಲ್‌ ಆಗಿದೆ. ಇದೊಂದು ಫನ್ನಿ ಸಾಂಗ್‌ ಆಗಿದ್ದು, ಇದು ಸಖತ್‌ ಮಜಾ ಕೊಡುವ ಹಾಡಾಗಿದೆ. ಮೇಕಿಂಗ್‌ ಕೂಡ ಸ್ಪೆಷಲ್‌ ಆಗಿ ಮೂಡಿ ಬಂದಿದೆ. ಮುಂಗಾರು ಮಳೆ ಚಿತ್ರ ಖ್ಯಾತಿಯ ಮನೋಮೂರ್ತಿ ಸಂಗೀತ ನಿರ್ದೇಶನದಲ್ಲಿ ಈ ಹಾಡು ಮೂಡಿ ಬಂದಿದ್ದು ಶಂಕರ್‌ ಮಹದೇವನ್‌ ಹಾಡಿದ್ದಾರೆ. ಸತೀಶ್‌ ಪ್ರಧಾನ್‌ ಚಿತ್ರಕ್ಕೆ ಆ್ಯಕ್ಷನ್‌ ಕಟ್‌ ಹೇಳಿದ್ದಾರೆ.
ಟೈಟಲ್ಲೇ ಹೇಳುವಂತೆ ಇದೊಂದು ಪ್ಯೂರ್‌ ಲವ್‌ಸ್ಟೋರಿ ಚಿತ್ರ. ಮಾದ ಮತ್ತು ಮಾನಸಿಯ ಲವ್‌ ಸ್ಟೋರಿಯನ್ನು ವಿಭಿನ್ನವಾಗಿಯೇ ಹೇಳಿದ್ದಾರಂತೆ ನಿರ್ದೇಶಕರು. ಅಲ್ಲದೇ ಹಾಡು ಮತ್ತು ಸಿನಿಮಾ ಕತೆಗೂ ಸಂಬಂಧವಿರುವ ಕಾರಣ, ಕತೆಯಂತೆಯೇ ಎಲ್ಲಾ ಹಾಡುಗಳೂ ಭಾಸವಾಗುತ್ತವೆಯಂತೆ.
'ಮನೋಮೂರ್ತಿ ಹಾಡುಗಳು ಅಂದರೆ ಅಲ್ಲೊಂದು ಮೆಲೊಡಿ ಇರುತ್ತದೆ. ಪ್ರೇಮಿಗಳಿಗಂತೂ ಹೇಳಿ ಮಾಡಿಸಿದ ಸಾಲುಗಳು ಅಲ್ಲಿರುತ್ತವೆ. ಈ ಸಿನಿಮಾದಲ್ಲೂ ಅದೆಲ್ಲವೂ ಇದೆ. ಇಡೀ ಚಿತ್ರವನ್ನು ಕಲರ್‌ಫುಲ್‌ ಆಗಿ ಕಟ್ಟಿಕೊಟ್ಟಿದ್ದೇನೆ' ಅಂತಾರೆ ನಿರ್ದೇಶಕರು.