ನಿತಿನ್ ಜತೆ ರೊಮಾನ್ಸ್‌ಗೆ ಸಜ್ಜಾದ 'ಮಹಾನಟಿ' ಕೀರ್ತಿ ಸುರೇಶ್!

ಟಾಲಿವುಡ್‌ನ ಹೀರೋ ನಿತಿನ್ ಇತ್ತೀಚೆಗೆ ಸಾಕಷ್ಟು ಸಿನಿಮಾಗಳಿಗೆ ಸಹಿ ಹಾಕುತ್ತಿದ್ದಾರೆ. ನಟ ನಿತಿನ್ ತಮ್ಮ ಮುಂಬರುವ ಚಿತ್ರ 'ರಂಗ್ ದೇ' ಬಗ್ಗೆ ಅಧಿಕೃತ ಘೋಷಣೆ ಮಾಡಿದ್ದಾರೆ. ಈಗಾಗಲೇ 'ಥೊಲಿ ಪ್ರೇಮಾ' ಮತ್ತು 'ಮಜ್ನು' ಚಿತ್ರಕ್ಕೆ ಜನಪ್ರಿಯ ನಿರ್ದೇಶಕ ವೆಂಕಿ ಅಟ್ಲೂರಿ ನಿರ್ದಶನವಿದೆ. ವೆಂಕಿ ಅಟ್ಲೂರಿ ನಿರ್ದೇಶನ ಹಾಗೂ ನಿತಿನ್ ನಾಯಕತ್ವದ ಮುಂಬರುವ ಚಿತ್ರಕ್ಕೆ 'ಮಹಾನಟಿ' ಖ್ಯಾತಿಯ ಕೀರ್ತಿ ಸುರೇಶ್ ನಾಯಕಿಯಾಗಿ ಆಯ್ಕೆಯಾಗಿದ್ದಾರೆ.

ಮಹಾನಟಿ ಬಳಿಕ ಕೀರ್ತಿ ಸುರೇಶ್ ಅವರು ಬಹಳಷ್ಟು ಬ್ಯುಸಿಯಾಗಿದ್ದಾರೆ. ಇದೀಗ ಬಾಲಿವುಡ್ ಚಿತ್ರರಂಗಕ್ಕೂ ಕಾಲಿಟ್ಟಿರುವ ಕೀರ್ತಿ ಸುರೇಶ್ ಅವರು ಟಾಲಿವುಡ್ ಅಂಗಳದಲ್ಲಿ ಸಹ ಸಾಲು ಸಾಲು ಚಿತ್ರಗಳಲ್ಲಿ ನಟಿಸುತ್ತಿದ್ದಾರೆ. ಇದೀಗ, ನಿತಿನ್ ಚಿತ್ರಕ್ಕೆ ನಾಯಕಿಯತಾಗಿ ಕೀರ್ತಿ ಸುರೇಶ್ ಸಹಿ ಹಾಕುವ ಮೂಲಕ ಮತ್ತೆ ಟಾಲಿವುಡ್ ಅಂಗಳಕ್ಕೆ ಜಿಗಿದಿರುವ ಕೀರ್ತಿ ಸುರೇಶ್ ಮತ್ತೆ ತೆಲುಗು ಸಿನಿಮಾದಲ್ಲಿ ಕಮಾಲ್ ಮಾಡಲಿದ್ದಾರೆ. ಇದೇ ಮೊದಲ ಬಾರಿಗೆ ಕೀರ್ತಿ ಸುರೇಶ್ ಮತ್ತು ನಿತಿನ್ ಒಟ್ಟಾಗಿ ನಟಿಸುತ್ತಿದ್ದಾರೆ.

ನಿತಿನ್ ಮತ್ತು ಕೀರ್ತಿ ಸುರೇಶ್ ಅಭಿನಯದ 'ರಂಗ್ ದೇ' ಚಿತ್ರಕ್ಕೆ ಸಿತಾರಾ ಎಂಟರ್‌ಟೈನ್‌ ಮೆಂಟ್ಸ್ ಬ್ಯಾನರ್‌ನಲ್ಲಿ ಸೂರ್ಯದೇವರ ನಾಗವಂಶಿ ಬಂಡವಾಳ ಹೂಡುತ್ತಿದ್ದಾರೆ. ಈ ಚಿತ್ರಕ್ಕೆ ಪಿಸಿ ಶ್ರೀರಾಮ್ ಛಾಯಾಗ್ರಹಣವನ್ನು ನಿರ್ವಹಿಸಲಿದ್ದು, ಕೆಲವು ವಿದೇಶಗಳ ಲೊಕೇಶನ್‌ಗಳಲ್ಲಿ ಸಹ ಈ ಚಿತ್ರವನ್ನು ಶೂಟ್ ಮಾಡಲಾಗುವುದಂತೆ. ನಟ ನಿತಿನ್ ಅವರು ನಟಿ ಪ್ರಿಯ ವಾರಿಯರ್ ಜೊತೆ ಇನ್ನೂ ಹೆಸರಿಡದ ಸಿನಿಮಾದಲ್ಲಿ ಸಹ ನಟಿಸಲಿದ್ದಾರೆ ಎನ್ನಲಾಗಿದೆ. ಅಷ್ಟೇ ಅಲ್ಲ, 'ಭೀಷ್ಮ' ಚಿತ್ರದ ಶೂಟಿಂಗ್‌ನಲ್ಲಿ ಸದ್ಯಕ್ಕೆ ನಟ ನಿತಿನ್ ತೊಡಗಿಸಿಕೊಂಡಿದ್ದು, ಈ ಚಿತ್ರಕ್ಕೆ ನಟಿ ರಶ್ಮಿಕಾ ಮಂದಣ್ಣ ಜೋಡಿಯಾಗಿದ್ದಾರೆ.