ಚಿತ್ರರಂಗದ ಬದುಕಿನಲ್ಲಿ ಎರಡನೇ ಚಿತ್ರದಲ್ಲೇ ಶಿವರಾಜ್‌ ಕುಮಾರ್‌ಗೆ ನಾಯಕಿಯಾಗಿ ನಟಿಸುವ ಅವಕಾಶ ಪಡೆದ ನಟಿ ಮಾನ್ವಿತಾ ಈಗ ಇನ್ನೂ ಎರಡು ಚಿತ್ರಗಳಲ್ಲಿ ನಟಿಸುತ್ತಿದ್ದಾರೆ. ರಿಲ್ಯಾಕ್ಸ್‌ ಸತ್ಯ ಮತ್ತು ಕನಕ ಚಿತ್ರಗಳಲ್ಲಿ ನಾಯಕಿ. ಪ್ರಭು ನಾಯಕನಾಗಿ ನಟಿಸಿರುವ ರಿಲ್ಯಾಕ್ಸ್‌ ಸತ್ಯ ಚಿತ್ರದಲ್ಲಿ ಮಾಯಾ ಎಂಬ ಹೆಸರಿನ ಹುಡುಗಿಯಾಗಿ ಅವರು ನಟಿಸಿದ್ದಾರೆ. 'ನನ್ನ ಎಲ್ಲಾ ಚಿತ್ರಗಳಲ್ಲೂ ಬೇರೆ ಬೇರೆ ಲುಕ್‌ನಲ್ಲಿ ಕಾಣಿಸಿಕೊಳ್ಳುತ್ತಿದ್ದೇನೆ. ಇದು ಖುಷಿಯ ವಿಚಾರ. ಪ್ರೇಕ್ಷಕರು ನನ್ನ ಪಾತ್ರದಿಂದಲೇ ನನ್ನನ್ನು ಗುರುತಿಸಬೇಕು ಅನ್ನೋ ಆಸೆ ನನ್ನದು' ಎನ್ನುತ್ತಾರೆ ಮಾನ್ವಿತಾ.
ಕ್ರೈಂ ಮತ್ತು ಕಾಮಿಡಿ ಜಾನರ್‌ನ ಚಿತ್ರ ಇದಾಗಿದ್ದು, ನವೀನ್‌ ರೆಡ್ಡಿ ನಿರ್ದೇಶನ ಮಾಡಿದ್ದಾರೆ. ಇದು ಇವರ ನಿರ್ದೇಶನದ ಎರಡನೇ ಚಿತ್ರ. 'ಚಿತ್ರದಲ್ಲಿ ನನ್ನದು ಏಂಜೆಲ್‌ ರೀತಿಯ ಕ್ಯಾರೆಕ್ಟರ್‌. ಪಾತ್ರದ ಹೆಸರೂ ಮಾಯಾ. ಹಾಗಾಗಿ ಅದೇ ರೀತಿಯ ಗೆಟಪ್‌ ಕೊಟ್ಟಿದ್ದಾರೆ. ನನ್ನ ಉದ್ದ ಕೂದಲನ್ನು ಕರ್ಲ್‌ ಮಾಡಿಕೊಂಡಿದ್ದೇನೆ. ಕಣ್ಣಿಗೆ ತಿಳಿ ನೀಲಿ ಬಣ್ಣದ ಲೆನ್ಸ್‌ ಹಾಕಿದ್ದೇನೆ. ತುಂಬಾ ಡಿಫರೆಂಟ್‌ ಆಗಿ ಕಾಣಿಸುತ್ತಿರೋದು ಲವ್ಲೀ ಎನಿಸಿದೆ' ಎಂದಿದ್ದಾರೆ ಮಾನ್ವಿತಾ.
ಕ್ರೈ ಸ್ಟೋರಿ ಇದ್ದರೂ ಕಾಮಿಡಿ ಜತೆ ಹ್ಯೂಮರಸ್‌ ಆಗಿ ಚಿತ್ರ ಮಾಡಿರುವುದಾಗಿ ನಿರ್ದೇಶಕ ನವೀನ್‌ ರೆಡ್ಡಿ ಹೇಳಿದ್ದಾರೆ. ಬಹುತೇಕ ಚಿತ್ರೀಕರಣ ಪೂರ್ಣಗೊಂಡಿದ್ದು, ಹಾಡುಗಳ ಚಿತ್ರೀಕರಣ ಮಾತ್ರ ಬಾಕಿ ಉಳಿಸಿಕೊಂಡಿದ್ದಾರೆ. ಕೆಂಡಸಂಪಿಗೆಯಂತೆÜಯೇ ಈ ಚಿತ್ರವೂ ಒಳ್ಳೆಯ ಅನುಭವ ನೀಡಿತು ಎಂದಿದ್ದಾರೆ ಮಾನ್ವಿತಾ. 'ಕೆಂಡಸಂಪಿಗೆಯಂತೆಯೇ ಕಡಿಮೆ ಬಜೆಟ್‌ನ ಸಿನಿಮಾ, ಕಡಿಮೆ ಜನ ಸೆಟ್‌ನಲ್ಲಿ ಇದ್ದ ಚಿತ್ರ. ಮೇಕಿಂಗ್‌ ಫ್ರೆಶ್‌ ಫೀಲಿಂಗ್‌ ಕೊಟ್ಟಿದೆ. ಜನರನ್ನು ಈ ಚಿತ್ರ ನಗಿಸುತ್ತೆ ಅನ್ನೋ ನಂಬಿಕೆ ಇದೆ' ಎನ್ನುತ್ತಾರೆ ಅವರು.