ಮರಾಠಿ ಸಿನಿಮಾಗೆ ಮಾನ್ವಿತಾ

ಟಗರು ಸಿನಿಮಾದ ನಂತರ ಮಾನ್ವಿತಾಗೆ ಪರಭಾಷಾ ಚಿತ್ರರಂಗದಿಂದಲೂ ಆಫರ್‌ಗಳು ಬರುತ್ತಿವೆ. ಈಗಾಗಲೆ ರಾಮ್‌ ಗೋಪಾಲ್‌ ವರ್ಮಾ ನಿರ್ದೇಶನದಲ್ಲಿ ಮಾನ್ವಿತಾ ನಟಿಸಲಿರುವ ಸುದ್ದಿ ಬಂದಿದೆ. ಈಗ ಮರಾಠಿ ಚಿತ್ರರಂಗಕ್ಕೆ ಕಾಲಿಡುತ್ತಿದ್ದಾರೆ. ಬೆಂಗಳೂರು ಮೂಲದ ನಂದಿತಾ ಯಾದವ್‌ ತಮ್ಮ ಹೊಸ ಚಿತ್ರಕ್ಕೆ ಮಾನ್ವಿತಾರನ್ನು ಆಯ್ಕೆ ಮಾಡಿಕೊಂಡಿದ್ದಾರೆ.

ಜನಪ್ರಿಯ ಮರಾಠಿ ಚಿತ್ರ 'ಲೇ ಭಾರಿ' ನಿರ್ದೇಶನ ಮಾಡಿದ್ದ ನಂದಿತಾ ಯಾದವ್‌ ತಮ್ಮ ಮುಂದಿನ ಚಿತ್ರಕ್ಕೆ ಮಾನ್ವಿತಾರನ್ನು ನಾಯಕಿ ಮಾಡಿದ್ದಾರೆ. ಮಾನ್ವಿತಾ ನಟಿಸಿರುವ ಎಲ್ಲಾ ಸಿನಿಮಾಗಳನ್ನು ಅವರು ನೋಡಿದ್ದಾರಂತೆ. 'ಎಲ್ಲಾ ಸಿನಿಮಾ ನೋಡಿದ್ದಾರೆ. ಟಗರು ಚಿತ್ರದ ನನ್ನ ನಟನೆ ಅವರಿಗೆ ಬಹಳ ಇಷ್ಟವಾಗಿದೆ. ಈಗ ಕೆಂಡಸಂಪಿಗೆ ತರಾನೇ ಒಂದು ಸಿನಿಮಾ ಮಾಡಲಿದ್ದಾರೆ. ಹಾಗಾಗಿ ನನಗೆ ಈ ಚಿತ್ರದಲ್ಲಿ ನಟಿಸಲು ಇಷ್ಟವಾಯಿತು. ಚಿತ್ರದಲ್ಲಿ ಟೀನೇಜರ್‌ ಲವ್‌ ಸ್ಟೋರಿ ಇದೆ' ಎಂದಿದ್ದಾರೆ ಮಾನ್ವಿತಾ.

ನವ ನಟ ಸುಮುಖ್‌ ನಾಯಕನಾಗಿ ನಟಿಸಲಿದ್ದು, ಇಶಾನ್‌ ಖಟ್ಟರ್‌ ನಡೆಸಲಿರುವ ಆಕ್ಟಿಂಗ್‌ ವರ್ಕ್‌ಶಾಪ್‌ನಲ್ಲಿ ಮಾನ್ವಿತಾ ಜತೆ ಭಾಗಿಯಾಗಲಿದ್ದಾರೆ. ಚಿತ್ರದಲ್ಲಿ ಇವರಿಬ್ಬರ ರೋಡ್‌ ಟ್ರಿಪ್‌ ರಾಜಸ್ತಾನದಿಂದ ಮುಂಬೈವರೆಗೆ ಸಾಗಲಿದೆ.