ಮೇ 12ರಂದು ವಿಜಯ್ ಪ್ರಕಾಶ್‌ ಡೇ: ಅಮೆರಿಕದಲ್ಲಿ ಕನ್ನಡ ಗಾಯಕನಿಗೆ ಶ್ರೇಷ್ಠ ಗೌರವ

ಅಮೆರಿಕಾದ ಕಾನ್ಕಾರ್ಡ್‌ನಲ್ಲಿ ಕನ್ನಡದ ಗಾಯಕ ವಿಯ್ ಪ್ರಕಾಶ್‌ ಎರಡು ತಿಂಗಳ ಹಿಂದೆ ಕಾರ್ಯಕ್ರಮವೊಂದನ್ನು ನೀಡಿದರು. ಅಲ್ಲಿನ ಶಾರ್ಲೆಟ್‌ ಕನ್ನಡ ಸಂಘ ಆಯೋಜನೆ ಮಾಡಿದ್ದ ಕಾರ್ಯಕ್ರಮದಲ್ಲಿ ಹೆಚ್ಚಾಗಿ ಕನ್ನಡದ ಗೀತೆಗಳನ್ನೇ ಹಾಡಿದ್ದರು ವಿಜಯ್‌. ಅವರ ಕಂಚಿನ ಕಂಠಕ್ಕೆ ಫಿದಾ ಆದ ಅಲ್ಲಿನ ಮೇಯರ್‌ ವಿಲಿಯಂ ಸಿ, ವಿಜಯ ಪ್ರಕಾಶ್‌ ಅವರಿಗೆ ಗೌರವ ಸಲ್ಲಿಸಲು 'ಮೇ 12ರಂದು ವಿಜಯ ಪ್ರಕಾಶ್‌ ಡೇ' ಎಂದು ಘೋಷಣೆ ಮಾಡಿದ್ದಾರೆ. ಇದು ಕನ್ನಡಿದ ಗಾಯಕನಿಗೆ ಸಿಕ್ಕ ಮೊದಲ ಗೌರವ ಆಗಿದೆ.

ಈ ಬಗ್ಗೆ ಮಾತನಾಡಿರುವ ವಿಜಯ್ ಪ್ರಕಾಶ್, "ಅಂದು ಮರೆಯಲಾಗದ ದಿನ. ಸಾವಿರಾರು ಸಂಖ್ಯೆಯಲ್ಲಿ ಕನ್ನಡಿಗರು ಹರಿದುಬಂದಿದ್ದರು. ಅಲ್ಲಿದ್ದ ಮಕ್ಕಳಿಗೆ ಹಳೆ ಗೀತೆಗಳಷ್ಟೇ ಅಲ್ಲ ಇತ್ತೀಚೆಗೆ ಬಂದ ಏತಕೇ, ಓಪನ್ ದ ಬಾಟ್ಲ್ ಹಾಡುಗಳೂ ಗೊತ್ತು. ಈ ಕಾರ್ಯಕ್ರಮಕ್ಕೆ ಕಾನ್ಕಾರ್ಡ್‌ನ ಮೇಯರ್ ಸಹ ಆಗಮಿಸಿದ್ದರು. ಶಂಕರ್ ನಾಗ್ ಅವರ ಒಂದೇ ಒಂದು ಆಸೆಯು ಹಾಡನ್ನು ನಾನು ಹಾಡಿದೆ. ಈ ಹಾಡಿಗೆ ಪ್ರತಿಯೊಬ್ಬರೂ ಡ್ಯಾನ್ಸ್ ಮಾಡಿದರು" ಎಂದು ಸ್ಮರಿಸಿದ್ದಾರೆ.

'ಇಂಥದ್ದೊಂದು ಗೌರವ ನನಗೆ ಸಿಕ್ಕಿದ್ದು ತುಂಬಾ ಹೆಮ್ಮೆಯ ಸಂಗತಿ. ಅಲ್ಲಿನ ಕನ್ನಡಿಗರ ಮುಂದೆ ಹಾಡಲು ಅವಕಾಶ ಸಿಕ್ಕಿದ್ದು ಮತ್ತೊಂದು ಸಂಭ್ರಮ. ಈ ಗೌರವವನ್ನು ಸಾರ್ಥಕಗೊಳಿಸಲು ಆ ದಿನದಂದು ಸಂಗೀತ ಕ್ಷೇತ್ರಕ್ಕಾಗಿ ಏನಾದರೂ ಒಂದು ಸೇವೆ ಮಾಡುತ್ತೇನೆ' ಎನ್ನುತ್ತಾರೆ ವಿಜಯ ಪ್ರಕಾಶ್‌.