ಸ್ಯಾಂಡಲ್‌ವುಡ್‌ನಲ್ಲಿ ಮಿ ಟೂ ಸಿನಿಮಾ ಮತ್ತು ವೆಬ್‌ ಸಿರೀಸ್‌

ಕನ್ನಡ ಸಿನಿಮಾ ರಂಗವನ್ನು ಬೆಚ್ಚಿಬೀಳಿಸಿರುವ ಮೀಟೂ ಕುರಿತಾದ ಸಿನಿಮಾ ಮಾಡಲು ಹೊರಟಿರುವ ಸ್ಯಾಂಡಲ್‌ವುಡ್‌ನಲ್ಲಿ ಮತ್ತೊಂದು ಸುತ್ತಿನ ಕಾವು ಸೃಷ್ಟಿಯಾಗಿದೆ. ಆರ್‌ಜೆ ಪ್ರದೀಪ್‌ ಮಿ ಟೂ ಕಥೆ ಇಟ್ಟುಕೊಂಡು ವೆಬ್‌ ಸೀರಿಸ್‌ ಮಾಡಲು ಮುಂದಾಗಿದ್ದರೆ, ನಿರ್ದೇಶಕ ಗುರುಪ್ರಸಾದ್‌ ಸಿನಿಮಾ ನಿರ್ಮಾಣ ಮಾಡಲಿದ್ದಾರೆ.

'ಮಿ ಟೂ ಕುರಿತು ನನ್ನದೇ ಆದ ನಿಲುವು ಇದೆ. ಯಾರು, ಯಾಕೆ ಆರೋಪ ಮಾಡುತ್ತಿದ್ದಾರೆ ಎನ್ನುವುದು ಚರ್ಚೆಯ ವಿಷಯವಾಗಿದೆ. ಈ ವಿಷಯ ತುಂಬಾ ಸೂಕ್ಷ್ಮವಾದದ್ದು. ಅದರ ಪರಿಣಾಮ ಕೂಡ ಅಷ್ಟೇ ಗಂಭೀರವಾಗಿದೆ. ಹೀಗಾಗಿ ಈ ಕುರಿತು ಸಿನಿಮಾ ಮಾಡಲು ತಯಾರಿ ನಡೆಸಿದ್ದೇನೆ. ಮಿ ಟೂ ಸತ್ಯಾಸತ್ಯತೆಯನ್ನು ಈ ಸಿನಿಮಾದಲ್ಲಿ ಬಿಚ್ಚಿಡಲಿದ್ದೇನೆ' ಎಂದು ನಿರ್ದೇಶಕ ಗುರುಪ್ರಸಾದ್‌ ತಿಳಿಸಿದ್ದಾರೆ.

ಈಗಾಗಲೇ ಕಥೆಯನ್ನೂ ರೆಡಿ ಮಾಡಿಕೊಂಡಿದ್ದೇನೆ ಎನ್ನುವ ಗುರುಪ್ರಸಾದ್‌, ಈ ಸಿನಿಮಾದಲ್ಲಿ ತಾವೇ ನಟಿಸಲಿರುವುದಾಗಿ ತಿಳಿಸಿದ್ದಾರೆ. ಆದರೆ, ಯಾವ ವ್ಯಕ್ತಿಗಳನ್ನು ಉದ್ದೇಶಿಸಿ ಈ ಸಿನಿಮಾ ಮಾಡಲಿದ್ದಾರೆ ಎಂಬ ಕುತೂಹಲ ಹಾಗೆಯೇ ಉಳಿದುಕೊಂಡಿದೆ. ಅತೀ ಶೀಘ್ರವೇ ಈ ಚಿತ್ರಕ್ಕೆ ಸಂಬಂಧಿಸಿದ ಪೂರ್ಣ ಮಾಹಿತಿ ತಿಳಿಸುತ್ತೇನೆ ಎಂದಿದ್ದಾರೆ ಅವರು.

ಆರ್‌ಜೆ ಪ್ರದೀಪ್‌ ತಮ್ಮ ಸಖತ್‌ ಸ್ಟುಡಿಯೋ ಬ್ಯಾನರ್‌ ಅಡಿಯಲ್ಲಿ 'ಮಿ ಟೂ' ಹೆಸರಿನಲ್ಲೇ ವೆಬ್‌ ಸೀರಿಸ್‌ ಮಾಡುತ್ತಿದ್ದಾರೆ. ನಾಲ್ಕು ಸರಣಿಯಲ್ಲಿ ಇದು ತಯಾರಾಗುತ್ತಿದ್ದರೂ, ಬೇರೆ ಬೇರೆ ವಿಷಯಗಳನ್ನು ಅದು ಹೊಂದಿದೆ ಎಂದು ಗೊತ್ತಾಗಿದೆ.

'ಮಿ ಟೂ ಗಂಭೀರ ವಿಷಯ. ಅಲ್ಲದೇ ಸದ್ಯಕ್ಕೆ ಹಾಟ್‌ ಟಾಪಿಕ್‌. ಹಾಗಾಗಿ ಅದೇ ಹೆಸರಿನಲ್ಲಿ ವೆಬ್‌ ಸೀರಿಸ್‌ ಮಾಡಲು ಹೊರಟಿದ್ದೇವೆ. ಪೊಲಿಟಿಕಲ್‌ ಥ್ರಿಲ್ಲರ್‌, ರೋಮ್ಯಾಂಟಿಕ್‌ ಕಾಮಿಡಿ ಜತೆಗೆ ಮಿ ಟೂ ಕುರಿತಾಗಿಯೂ ಹೇಳಲು ಹೊರಟಿದ್ದೇವೆ. ಆದರೆ, ಯಾವುದೇ ವ್ಯಕ್ತಿಯ ವಿರುದ್ಧ ಆರೋಪ ಇರುವುದಿಲ್ಲ. ನೇರವಾಗಿ ಮಿ ಟೂ ಸಂಗತಿಗಳನ್ನೇ ಪ್ರಧಾನವಾಗಿ ಇಟ್ಟುಕೊಂಡು ಕಥೆ ಮಾಡಿಲ್ಲ. ಎಲ್ಲರೂ ಒಪ್ಪುವಂಥ ಅಂಶಗಳು ವೆಬ್‌ ಸೀರಿಸ್‌ನಲ್ಲಿ ಇರಲಿವೆ' ಎಂದಿದ್ದಾರೆ ಪ್ರದೀಪ್‌.

ಕನ್ನಡ ಸಿನಿಮಾ ರಂಗದಲ್ಲಿ ಎರಡ್ಮೂರು ತಿಂಗಳಿಂದ ಮೀಟೂ ಸಖತ್‌ ಸದ್ದು ಮಾಡುತ್ತಿದೆ. ಕೆಲವರು ಕೋರ್ಟ್‌ ಮೆಟ್ಟಿಲು ಕೂಡ ಏರಿದ್ದಾರೆ. ಹೆಸರಾಂತ ಕಲಾವಿದರು, ನಿರ್ದೇಶಕರ ಮೇಲೂ ಆರೋಪ ಕೇಳಿ ಬಂದಿದೆ. ಈ ವಿಷಯದ ಮೇಲೆ ಸಿನಿಮಾ ಆಗಲಿವೆ ಎಂಬ ಮಾತು ಹಲವು ದಿನಗಳಿಂದ ಕನ್ನಡ ಸಿನಿಮಾ ರಂಗದಲ್ಲಿ ಹರಿದಾಡುತ್ತಿತ್ತು. ಈಗ ಅದು ನಿಜವಾಗುತ್ತಿದೆ.

ಮಿ ಟೂ ಕುರಿತಾಗಿ ಸಿನಿಮಾ ಮಾಡುತ್ತಿದ್ದೇನೆ. ಕಥೆ ಕೂಡ ರೆಡಿಯಾಗಿದೆ. ಕಥೆ ಯಾರ ಮೇಲೆ ಇರಲಿದೆ ಎನ್ನುವುದನ್ನು ಈಗಲೇ ಹೇಳಲಾರೆ. ಮುಂದಿನ ದಿನಗಳಲ್ಲಿ ಎಲ್ಲವನ್ನೂ ಹೇಳಿಕೊಳ್ಳುತ್ತೇನೆ- ಗುರುಪ್ರಸಾದ್‌, ನಿರ್ದೇಶಕ.

ನೇರವಾಗಿ ಮಿ ಟೂ ಕುರಿತಾಗಿಯೇ ವೆಬ್‌ ಸೀರಿಸ್‌ ಮಾಡುತ್ತಿಲ್ಲ. ಮೀಟೂ ಹೆಸರಿನಲ್ಲಿ ನಾಲ್ಕು ಸರಣಿಯಲ್ಲಿ ಬರಲಿ ವೆಬ್‌ ಸೀರಿಸ್‌ನಲ್ಲಿ ಪೊಲಿಟಿಕಲ್‌ ಥ್ರಿಲ್ಲರ್‌ ಮತ್ತು ರೊಮಾಂಟಿಕ್‌ ಕಾಮಿಡಿ ಕಥೆ ಕೂಡ ಇರಲಿದೆ- ಪ್ರದೀಪ್‌, ನಿರ್ಮಾಪಕ