#MeToo ಅಭಿಯಾನ: ದಕ್ಷಿಣ ಚಿತ್ರೋದ್ಯಮ ಖಡಕ್ ನಿರ್ಧಾರ

ಬಾಲಿವುಡ್‌ನಲ್ಲಿ ದೊಡ್ಡ ಮಟ್ಟದಲ್ಲಿ ಸದ್ದು ಮಾಡಿದ #MeToo ಅಭಿಯಾನ ಈಗ ದಕ್ಷಿಣ ಚಿತ್ರರಂಗದಲ್ಲೂ ತನ್ನ ಕರಾಳ ಪ್ರಭಾವ ತೋರಿಸುತ್ತಿದೆ. ಅರ್ಜುನ್ ಸರ್ಜಾ ಮತ್ತು ವೈರಮುತ್ತು ಅವರಂತಹ ಖ್ಯಾತನಾಮರ ವಿರುದ್ಧವೂ ಲೈಂಗಿಕ ಕಿರುಕುಳ ಆರೋಪಗಳು ಕೇಳಿಬಂದಿವೆ. ಈ ಹಿನ್ನೆಲೆಯಲ್ಲಿ ಈ ರೀತಿಯ ಪ್ರಕರಣಗಳಿಗೆ ಬ್ರೇಕ್ ಹಾಕಲು ದಕ್ಷಿಣ ಭಾರತ ಕಲಾವಿದರ ಸಂಘ ಹೊಸ ದೃಢ ನಿರ್ಧಾರಕ್ಕೆ ಬಂದಿದೆ.

ಚಿತ್ರೋದ್ಯಮದಲ್ಲಿ ವಿಶಾಖಾ ಮಾರ್ಗಸೂಚಿಗಳನ್ನು ಅಳವಡಿಸಿಕೊಳ್ಳಲು ದಕ್ಷಿಣ ಭಾರತ ಕಲಾವಿದರ ಸಂಘ (ಎಸ್‍ಐಎಎ) ಮುಂದಾಗಿದೆ. ಸಮಿತಿಯೊಂದನ್ನು ರಚಿಸಿ ವಿಶಾಖಾ ಮಾರ್ಗಸೂಚಿಗಳನ್ನು ಚಿತ್ರರಂಗಕ್ಕೆ ತರಲು ಮುಂದಾಗಿದೆ.

ಇತ್ತೀಚೆಗಷ್ಟೇ ಎಸ್‍ಐಎಎ ಈ ಬಗ್ಗೆ ಅಧಿಕೃದ ಹೇಳಿಕೆಯನ್ನೂ ನೀಡಿದೆ. ಕಾರ್ಯಸ್ಥಳದಲ್ಲಿ ಮಹಿಳೆಯರ ಮೇಲಿನ ಲೈಂಗಿಕ ಕಿರುಕುಳ ತಡೆಯಲು ಸುಪ್ರೀಂಕೋರ್ಟ್ 1997ರಲ್ಲಿ ವಿಶಾಖಾ ಮಾರ್ಗಸೂಚಿಗಳು ಘೋಷಿಸಿತ್ತು. ಇದೀಗ ಈ ಮಾರ್ಗಸೂಚಿಗಳನ್ನು ಚಿತ್ರರಂಗಕ್ಕೂ ಅಳವಡಿಸಿಕೊಳ್ಳಲು ಎಸ್‍ಐಎಎ ಮುಂದಾಗಿದೆ.

ಸ್ಯಾಂಡಲ್‌ವುಡ್‌ನಲ್ಲಿ ಲೈಂಗಿಕ ದೌರ್ಜನ್ಯ ಆರೋಪಗಳು ಹೆಚ್ಚಾಗಿ ಕೇಳಿಬರುತ್ತಿರುವ ಹಿನ್ನೆಲೆಯಲ್ಲಿ ಇನ್‌ಟಿಮೇಸಿ ಕೋ-ಆರ್ಡಿನೇಟರ್ ನೇಮಿಸಿಕೊಳ್ಳಲು ಚಿತ್ರರಂಗ ಮುಂದಾಗಿದೆ. ರೊಮ್ಯಾಂಟಿಕ್ ಸನ್ನಿವೇಶಗಳನ್ನು ಸೆರೆ ಹಿಡಿಯುವಾಗ ಕಾನೂನು ತಿಳಿವಳಿಕೆ ಹೊಂದಿರುವ ಇವರು ಶೂಟಿಂಗ್‌ ಸ್ಪಾಟ್‌ನಲ್ಲಿಯೇ ಇರಲಿದ್ದಾರೆ. ಪ್ರಣಯ ಅಥವಾ ಅದಕ್ಕೂ ಮೀರಿದ ಶೃಂಗಾರ ದೃಶ್ಯಗಳು ಯಾವುದೇ ಕಲಾವಿದರಿಗೆ ತೊಂದರೆ ಆಗದಂತೆ ಇವರು ಮಾರ್ಗದರ್ಶನ ಮಾಡುತ್ತಾರೆ. ಆದರೆ ಈ ಬಗ್ಗೆ ಚಿತ್ರೋದ್ಯಮದಲ್ಲಿ ಮಿಶ್ರ ಪ್ರತಿಕ್ರಿಯೆ ಕೇಳಿಬಂದಿದೆ.

ಈಗಾಗಲೇ ತಮಿಳು ಮತ್ತು ಮಲೆಯಾಳಂ ಚಿತ್ರೋದ್ಯಮ ಲೈಂಗಿಕ ಕಿರುಕುಳ ತಡೆಗಟ್ಟುವ ಸಂಬಂಧ ಕಮಿಟಿಯೊಂದನ್ನು ಮಾಡಿಕೊಂಡಿವೆ. ಸ್ಯಾಂಡಲ್‌ವುಡ್‌ನಲ್ಲೂ ಸಮಿತಿಯೊಂದನ್ನು ರಚಿಸುವ ಚಿಂತನೆ ನಡೆದಿದೆ. [ಪರಿಷ್ಕೃತ: #MeToo ಸುದ್ದಿ ಕವರೇಜ್ ಬಗ್ಗೆ ವಿಕ ನೀತಿ]