ಮೂರು ದಶಕಗಳ ಬಳಿಕ ಮತ್ತೆ ಮೂಕಿ ಚಿತ್ರ

ಪುಷ್ಪಕ ವಿಮಾನದ ನಂತರ ಮತ್ತೊಂದು ಮೂಕಿ ಸಿನಿಮಾ ಭಾರತದಲ್ಲಿ ತಯಾರಾಗಿದೆ. ಮರ್ಕ್ಯುರಿ ಹೆಸರಿನಲ್ಲಿ ಮೂಡಿ ಬಂದಿರುವ ಚಿತ್ರಕ್ಕೆ ಪ್ರಭುದೇವ್‌ ನಾಯಕ. ಕಮಲ್‌ ಹಾಸನ್‌ ಅವರ ಪುಷ್ಪಕ ವಿಮಾನಕ್ಕೂ ಈ ಚಿತ್ರಕ್ಕೂ ಸಾಕಷ್ಟು ವ್ಯತ್ಯಾಸವಿದ್ದರೂ, ತನ್ನದೇ ಆದ ಕಾರಣಗಳಿಂದಾಗಿ ಮಕ್ರ್ಯುರಿ ನಿರೀಕ್ಷೆ ಮೂಡಿಸಿದೆ.

ಪುಷ್ಪಕ ವಿಮಾನ ಸಿನಿಮಾದಲ್ಲಿ ಸೂಕ್ಷ್ಮ ವಿಷಯಕ್ಕೆ ಕಾಮಿಡಿ ಟಚ್‌ ನೀಡಲಾಗಿತ್ತು. ಅಲ್ಲದೇ, ಚಿತ್ರಕಥೆ ನಿಧಾನಗತಿಯಿಂದ ಕೂಡಿತ್ತು. ಮರ್ಕ್ಯುರಿ ಹಾಗಿಲ್ಲ. ಇದೊಂದು ಥ್ರಿಲ್ಲರ್‌ ಸಿನಿಮಾ. ದೃಶ್ಯದಿಂದ ದೃಶ್ಯಕ್ಕೆ ರೋಚಕಥೆ ಹೆಚ್ಚುತ್ತಲೇ ಸಾಗುತ್ತದೆ. ಜಗತ್ತಿನಾದ್ಯಂತ ನಾನಾ ಭಾಷೆಯಲ್ಲಿ ಬಿಡುಗಡೆ ಆಗುತ್ತಿರುವ ಈ ಸಿನಿಮಾವನ್ನು ಕನ್ನಡಕ್ಕೆ ರಿಲೀಸ್‌ ಮಾಡುತ್ತಿದ್ದಾರೆ ನಿರ್ಮಾಪಕ ಪುಷ್ಕರ್‌ ಮಲ್ಲಿಕಾರ್ಜುನ್‌ ಮತ್ತು ನಟ ರಕ್ಷಿತ್‌ ಶೆಟ್ಟಿ. ಈ ಚಿತ್ರದ ಕುರಿತು ಮಲ್ಲಿಕಾರ್ಜುನ್‌ ಹೇಳುವುದು ಹೀಗೆ, 'ಸಿನಿಮಾ ನೋಡುವುದಕ್ಕೆ ವಿಶೇಷವಾಗಿದೆ. ಒಂದೇ ಒಂದು ಡೈಲಾಗ್‌ ಇರದೇ ಇದ್ದರೂ, ಕುರ್ಚಿ ತುದಿಯ ಮೇಲೆ ಕೂರಿಸಿಕೊಂಡು ನೋಡಿಸಿಕೊಳ್ಳುವಂಥ ಚಿತ್ರ ಇದಾಗಿದೆ. ಪ್ರತಿ ಪಾತ್ರಧಾರಿಗಳು ತಮ್ಮ ಪಾತ್ರಕ್ಕೆ ಜೀವ ತುಂಬಿದ್ದರಿಂದ, ನಾವೂ ಕೂಡ ಸಿನಿಮಾದ ಒಂದು ಭಾಗವಾಗಿ ಬಿಡುತ್ತೇವೆ. ಆ ರೀತಿಯಲ್ಲಿ ಫೀಲ್‌ ಕೊಡುವಂಥ ಚಿತ್ರವಿದು' ಅಂತಾರೆ.

ತಮಿಳಿನ ಖ್ಯಾತ ನಿರ್ದೇಶಕ ಕಾರ್ತಿಕ್‌ ಸುಬ್ಬರಾಜ್‌ ನಿರ್ದೇಶನದಲ್ಲಿ ಮೂಡಿ ಬಂದಿರುವ ಚಿತ್ರದಲ್ಲಿ ಸನಂತ್‌ ರೆಡ್ಡಿ, ದೀಪಕ್‌ ರಮೇಶ್‌, ಶಶಾಂಕ್‌, ರಮ್ಯಾ ನಂಬೀಸನ್‌ ಮೊದಲಾದವರು ಇದ್ದಾರೆ. ಇದೇ ವಾರ ಸಿನಿಮಾ ಜಗತ್ತಿನಾದ್ಯಂತ ರಿಲೀಸ್‌ ಆಗುತ್ತಿದೆ.