*ನಂದಿನಿ ಕೆ.ಎಲ್‌
ಐಂದ್ರಿತಾ ರೇ, ಪ್ರಿಯಾಂಕಾ ಉಪೇಂದ್ರ ಸೇರಿ ಹಲವು ನಟಿಯರು ಸ್ಯಾಂಡಲ್‌ವುಡ್‌ಗೆ ಬಂದು ಸೆಟ್ಲ್‌ ಆಗಿರುವ ಬೆನ್ನಲ್ಲಿಯೇ ಬೆಂಗಾಲಿಯ ಇನ್ನೊಬ್ಬ ನಟಿ, ಉಪೇಂದ್ರ ಚಿತ್ರದ ಮೂಲಕ ಕನ್ನಡ ಚಿತ್ರರಂಗಕ್ಕೆ ಎಂಟ್ರಿ ಕೊಡುತ್ತಿದ್ದಾರೆ.
2015ರ 'ಮಿಸ್‌ ಕೋಲ್ಕತಾ' ಕಿರೀಟ ಮುಡಿಗೇರಿಸಿಕೊಂಡಿದ್ದ ಗ್ಲಾಮರಸ್‌ ಚೆಲುವೆ ತಾನ್ಯಾ ಹೋಪ್‌, ಈಗ ಉಪೇಂದ್ರ ಜತೆ 'ಹೋಂ ಮಿನಿಸ್ಟರ್‌' ಚಿತ್ರದಲ್ಲಿ ನಾಯಕಿಯಾಗಿ ನಟಿಸಲಿದ್ದಾರೆ. ಸುರೇಶ್‌ ಎಂಬ ಹೊಸ ಪ್ರತಿಭೆ ಈ ಚಿತ್ರವನ್ನು ನಿರ್ದೇಶಿಸುತ್ತಿದ್ದಾರೆ. ಚಿತ್ರವು ಪೊಲಿಟಿಕಲ್‌, ಥ್ರಿಲ್ಲರ್‌ ಹಾಗೂ ಸಸ್ಪೆನ್ಸ್‌ ಕಥೆ ಹೊಂದಿದೆ ಎಂದು ಗೊತ್ತಾಗಿದೆ.
ಹೊಸ ರಾಜಕೀಯ ಪಕ್ಷ ಸ್ಥಾಪಿಸಿ ಮುಂಬರುವ ವಿಧಾನಸಭೆ ಚುನಾವಣೆಗೆ ಸಿದ್ಧವಾಗುತ್ತಿರುವ ಉಪೇಂದ್ರ, ಚುನಾವಣೆ ಘೋಷಣೆಯಾಗುವ ಹೊತ್ತಿಗೆ ಈ ಚಿತ್ರವನ್ನು ಪೂರ್ಣಗೊಳಿಸುವ ಯೋಜನೆ ಹಾಕಿಕೊಂಡಿದ್ದಾರೆ.
'ಮೊದಲ ಬಾರಿಗೆ ಕನ್ನಡ ಸ್ಟಾರ್‌ವೊಬ್ಬರ ಜತೆ ಅಭಿನಯಿಸುತ್ತಿದ್ದೇನೆ. ಈ ಚಿತ್ರದಲ್ಲಿ ಬಬ್ಲಿ ಹಾಗೂ ಗ್ಲಾಮರಸ್‌ ಆಗಿ ಕಾಣಿಸಿಕೊಳ್ಳುತ್ತಿದ್ದೇನೆ. ಕಥೆಯೂ ಚೆನ್ನಾಗಿರುವುದರಿಂದ ಚಿತ್ರದಲ್ಲಿ ಅಭಿನಯಿಸಲು ಒಪ್ಪಿಕೊಂಡೆ. ಕನ್ನಡ ಭಾಷೆ ನನಗೆ ಬರಲ್ಲ. ಆದರೆ ಸ್ವಲ್ಪಮಟ್ಟಿಗೆ ಕನ್ನಡ ಪದಗಳನ್ನು ಕಲಿತಿದ್ದೇನೆ. ಇಲ್ಲಿನ ಪರಿಸರ, ತಂಪಾದ ವಾತಾವರಣ, ಲೈಫ್‌ಸ್ಟೈಲ್‌ ನನಗೆ ತುಂಬಾ ಇಷ್ಟ' ಎಂದು ತಾನ್ಯಾ ಲವಲವಿಕೆ ಜತೆ ಮಾತನಾಡುತ್ತಾ ತಿಳಿಸಿದ್ದಾರೆ.
'ಉಪೇಂದ್ರ ತುಂಬಾ ಫ್ರೆಂಡ್ಲಿ. ಚೆನ್ನಾಗಿ ಗೈಡ್‌ ಮಾಡುತ್ತಾರೆ. ಅವರ ಸರಳತೆ ಇಷ್ಟವಾಯಿತು. ಮುಂದೆ ಅವಕಾಶಗಳು ಸಿಕ್ಕರೆ ಕನ್ನಡವನ್ನು ಚೆನ್ನಾಗಿ ಕಲಿತು ಅಭಿನಯಿಸುತ್ತೇನೆ. ಕೆಲ ಪದಗಳು ಸುಲಭವಾಗಿ ಅರ್ಥವಾಗುತ್ತವೆ. ಕಷ್ಟಕರ ಪದಗಳನ್ನು ಕನ್ನಡಿಗರ ನೆರವು ಪಡೆದು ಅರ್ಥ ತಿಳಿದುಕೊಂಡು ಮಾತನಾಡಲು ಯತ್ನಿಸ್ತುತಿದ್ದೇನೆ. ಆದಷ್ಟು ಬೇಗ ನಾನು ಫ್ಲೂಯೆಂಟಾಗಿ ಕನ್ನಡದಲ್ಲಿ ಮಾತನಾಡುತ್ತೇನೆ.' ಎಂದಿದ್ದಾರೆ ತಾನ್ಯಾ.
------
'ಕನ್ನಡ ಒಂದು ಸುಂದರ ಭಾಷೆ. ಕಲಿಯಲು ಪ್ರಯತ್ನ ಮಾಡುತ್ತಿದ್ದೇನೆ. ಬೆಂಗಳೂರಿನ ನನ್ನ ಗೆಳೆಯರು, ಸಿನಿಮಾ ತಂಡದವರ ಸಹಾಯದಿಂದ ಭಾಷೆಯನ್ನು ಕಲಿಯುತ್ತಿದ್ದೇನೆ. ಆದಷ್ಟು ಬೇಗ ಕಲಿತು ಸರಾಗವಾಗಿ ಮಾತನಾಡುತ್ತೇನೆ.'
-ತಾನ್ಯ ಹೋಪ್‌, ನಟಿ