*ಶರಣು ಹುಲ್ಲೂರು
ಡಬ್ಬಿಂಗ್‌ ವಿವಾದ ನ್ಯಾಯಾಲಯದಲ್ಲಿ ಇರುವಾಗಲೇ ಮತ್ತೊಂದು ಡಬ್ಬಿಂಗ್‌ ಸಿನಿಮಾ ಬಿಡುಗಡೆಯಾಗಲು ಸಿದ್ಧವಾಗಿದೆ. ಹಾಲಿವುಡ್‌ನ ಯಶಸ್ವಿ ಚಿತ್ರ 'ಮಿಷನ್‌ ಇಂಪಾಸಿಬಲ್‌-1' ಕನ್ನಡಕ್ಕೆ ಬರುತ್ತಿದ್ದು, ವ್ಯಾಪಕ ವಾದ ವಿವಾದಕ್ಕೆ ಕಾರಣವಾಗಿದೆ.
ಈಗಾಗಲೇ ಸಿನಿಮಾದ ಟ್ರೇಲರ್‌ ರಿಲೀಸ್‌ ಆಗಿದ್ದು, ಸಾಮಾಜಿಕ ಜಾಲತಾಣಗಳಲ್ಲಿ ಡಬ್ಬಿಂಗ್‌ ಪರ ಮತ್ತು ವಿರೋಧಿಗಳು ಹ್ಯಾಶ್‌ ಟ್ಯಾಗ್‌ ಬಳಸಿಕೊಂಡು ಗುರುವಾರದಿಂದ ಮತ್ತೊಂದು ಸುತ್ತಿನ ಅಭಿಯಾನಕ್ಕೆ ಮುಂದಾಗಿದ್ದಾರೆ.
ಪರಭಾಷೆಯ ಸಿನಿಮಾಗಳನ್ನು ನಮ್ಮದೇ ಭಾಷೆಯಲ್ಲಿ ನೋಡಬೇಕು ಎನ್ನುವುದು ಡಬ್ಬಿಂಗ್‌ ಪರವಾಗಿದ್ದವರ ವಾದವಾದರೆ, ಡಬ್ಬಿಂಗ್‌ ಸಿನಿಮಾ ಕನ್ನಡ ಭಾಷೆಗೆ ಮಾರಕ ಎಂಬ ಅಭಿಪ್ರಾಯ ವಿರೋಧಿಗಳದ್ದು. ಈ ವಾದ- ವಿವಾದ ಮತ್ತೆ 'ಮಿಷನ್‌ ಇಂಪಾಸಿಬಲ್‌-1' ಸಿನಿಮಾದ ಮೂಲಕ ಮುಂದುವರೆದಿದೆ.
ಬಾಕ್ಸಾಫೀಸ್‌ನಲ್ಲಿ ದಾಖಲೆ ಬರೆದ ಸಿನಿಮಾ ಹಾಲಿವುಡ್‌ನ ಈ ಸಿನಿಮಾ ಇದೀಗ ಕನ್ನಡದಲ್ಲಿ ಕಮಾಲ್‌ ಮಾಡುತ್ತಾ ಎಂಬುದನ್ನು ಕಾದು ನೋಡಬೇಕಿದೆ. ಹಾಲಿವುಡ್‌ನ ಖ್ಯಾತ ನಟ ಟಾಮ್‌ ಕ್ರೂಸ್‌ ನಟನೆಯ ಈ ಸಿನಿಮಾದಲ್ಲಿ ಕ್ರೂಸ್‌ ಭರ್ಜರಿ ಸ್ಟಂಟ್‌ಗಳನ್ನು ಮಾಡಿದ್ದಾರೆ. ಕ್ರಿಸ್ಟೋಫರ್‌ ಮ್ಯಾಕ್ವಾರಿ ನಿರ್ದೇಶನದಲ್ಲಿ ಈ ಸಿನಿಮಾ ಮೂಡಿ ಬಂದಿದೆ. ಈಗಾಗಲೇ ಈ ಸಿನಿಮಾದ ಐದು ಸರಣಿಗಳು ರಿಲೀಸ್‌ ಆಗಿದ್ದು, ಅಷ್ಟೂ ಸೂಪರ್‌ ಚಿತ್ರಗಳು ಹಿಟ್‌ ಆಗಿವೆ. 6ನೇ ಸರಣಿ ಈ ವರ್ಷ ಬಿಡುಗಡೆ ಆಗಬೇಕಿದೆ. ಈ ಎಲ್ಲ ಸರಣಿಗಳನ್ನೂ ಕನ್ನಡಕ್ಕೆ ಡಬ್‌ ಮಾಡುವ ಆಲೋಚನೆ ನಿರ್ಮಾಪಕರದ್ದು. ಮೊದಲ ಪ್ರಯೋಗವಾಗಿ ಒಂದು ಭಾಗವನ್ನು ಡಬ್‌ ಮಾಡಿದ್ದಾರೆ.
ಈಗಾಗಲೇ ಕನ್ನಡದಲ್ಲಿ ಸತ್ಯದೇವ ಐಪಿಎಸ್‌, ನಾನು ನನ್ನ ಪ್ರೀತಿ, ಧೀರ ಹೀಗೆ ನಾಲ್ಕೈದು ಚಿತ್ರಗಳು ಡಬ್‌ ಆಗಿವೆ. ಕೆಲವು ಸಿನಿಮಾಗಳು ಬಿಟ್ಟಿ ಪ್ರಚಾರ ತಗೆದುಕೊಂಡು ರಿಲೀಸ್‌ ಆಗದೇ ಸದ್ದು ಮಾಡಿದವು. ಇನ್ನೂ ಕೆಲವು ಸಿನಿಮಾಗಳು ಬಾಕ್ಸ್‌ ಆಫೀಸ್‌ನಲ್ಲಿ ಮಲಗಿದವು. ಆದರೂ, ಡಬ್‌ ಸಿನಿಮಾಗಳು ರಿಲೀಸ್‌ ಆಗುತ್ತಲೇ ಇವೆ.