ಮೈಸೂರು ಕಾಲೇಜ್‌ನಲ್ಲಿ ನಡೆದ ನೈಜ ಕಥೆಯೇ ಎಂಎಂಸಿಎಚ್‌ ಚಿತ್ರ

*ಶರಣು ಹುಲ್ಲೂರು

Vijaya Karnataka Web

ಮೈಸೂರಿನ ಪ್ರತಿಷ್ಠಿತ ಕಾಲೇಜ್‌ವೊಂದರಲ್ಲಿ ನಡೆದ ನೈಜ ಘಟನೆಯನ್ನೇ ಸಿನಿಮಾ ಮಾಡಿರುವ ನಿರ್ದೇಶಕ ಮುಸ್ಸಂಜೆ ಮಹೇಶ್‌, ಈ ಮೂಲಕ ಕನ್ನಡದಲ್ಲಿ ಮತ್ತೊಂದು ಮಹಿಳಾ ಪ್ರಧಾನ ಸಿನಿಮಾ ತೆರೆಗೆ ಬರುತ್ತಿದೆ. ಎಂಎಂಸಿಎಚ್‌ ಹೆಸರಿನಲ್ಲಿ ಈ ಚಿತ್ರ ಬರುತ್ತಿದೆ.

ನಾನು ಓದುತ್ತಿದ್ದ ವೇಳೆಯಲ್ಲಿಯೇ ಈ ಘಟನೆ ನಡೆದಿತ್ತು. ಪೊಲೀಸ್‌ ಅಧಿಕಾರಿಗಳು ಈ ಸುದ್ದಿಯನ್ನು ಆಚೆ ಬರದಂತೆ ತಡೆದಿದ್ದರು. ಈಗ ಅದನ್ನು ಜಗತ್ತಿಗೆ ತೋರಿಸುವ ಪ್ರಯತ್ನ ಈ ಸಿನಿಮಾದಲ್ಲಿ ಆಗಿದೆ ಎನ್ನುತ್ತಾರೆ ಮಹೇಶ್‌.

'ನಾನು ಹೇಳಲು ಹೊರಟಿರುವ ವಿಷಯ ಈವರೆಗೂ ಯಾರಿಗೂ ಗೊತ್ತಿಲ್ಲ. ಆದರೆ, ಇದನ್ನು ಹೇಳಲೇಬೇಕು ಎಂಬ ತುಡಿತ ನನ್ನಲ್ಲಿತ್ತು. ಈಗ ಅದು ಸಾಧ್ಯವಾಗಿದೆ. ಕಾಲೇಜು ಮೆಟ್ಟಿಲು ಹತ್ತುವ ಹುಡುಗಿಯರ ತಲ್ಲಣಕ್ಕೆ ಸಿನಿಮಾ ಸಾಕ್ಷಿಯಾಗಲಿದೆ' ಎಂದು ಅವರು ತಿಳಿಸಿದ್ದಾರೆ.

ವಿನಯಾ ಪ್ರಸಾದ್‌ ಪುತ್ರಿ ಪ್ರಥಮಾ, ಪ್ರಮೀಳಾ ಜೋಷಾಯ್‌ ಪುತ್ರಿ ಮೇಘನಾ ರಾಜ್‌, ಸುಧಾ ಬೆಳವಾಡಿ ಪುತ್ರಿ ಸಂಯುಕ್ತಾ ಹೊರನಾಡು ಹಾಗೂ ಹಿರಿಯ ನಟಿ ಸುಮಿತ್ರಾ ಅವರ ಮಗಳು ದೀಪ್ತಿ (ನಕ್ಷ ತ್ರ) ನಾಯಕಿಯರಾಗಿ ನಟಿಸಿದ್ದಾರೆ. ರಾಗಿಣಿ ಪೊಲೀಸ್‌ ಅಧಿಕಾರಿಯಾಗಿ ಕಾಣಿಸಿಕೊಂಡಿದ್ದಾರೆ. ಯುವರಾಜ್‌ ಮತ್ತು ರಘು ಭಟ್‌ ನಾಯಕರು.

ಮುಸ್ಸಂಜೆ ಮಾತು ಸೇರಿ ಹಲವು ಸಿನಿಮಾಗಳ ಮೂಲಕ ಹಿಟ್‌ ಹಾಡುಗಳನ್ನು ನೀಡಿರುವ ಶ್ರೀಧರ್‌ ವಿ. ಸಂಭ್ರಮ್‌ ಸಂಗೀತ ನೀಡಿದ್ದಾರೆ. ಭಾರತಿಯ ರೈಲ್ವೆ ಇಲಾಖೆಯಲ್ಲಿ ಜಿಜಿಎಂ ಆಗಿ ಕಾರ್ಯ ನಿರ್ವಹಿಸುತ್ತಿರುವ ಅನೂಪ್‌ ದಯಾನಂದ, ಹೆಸರಾಂತ ಗಾಯಕಿ ಶ್ರೇಯಾ ಘೊಷಾಲ್‌, ಗಾಯಕ ವಿಜಯ ಪ್ರಕಾಶ್‌ ಹಾಡಿದ್ದಾರೆ.

ಜಾನಿ ಚಿತ್ರದ ಮೂಲಕ ನಿರ್ಮಾಪಕರಾಗಿ ಸಿನಿಮಾ ರಂಗ ಪ್ರವೇಶ ಮಾಡಿದ ಎಸ್‌. ಪುರುಷೊತ್ತಮ್‌, ಜಾನಕಿ ರಾಮ್‌ ಹಾಗೂ ಅರವಿಂದ್‌ ಬಂಡವಾಳ ಈ ಚಿತ್ರಕ್ಕೆ ಬಂಡವಾಳ ಹೂಡಿದ್ದಾರೆ. ಸೋಮವಾರ ಹಾಡುಗಳು ರಿಲೀಸ್‌ ಆಗಿವೆ.