ಬೋಲ್ಡ್‌ ಪಾತ್ರದಲ್ಲಿ ಮೋಕ್ಷಾ ಕುಶಾಲ್

ಆದಿ ಪುರಾಣ ಸಿನಿಮಾದ ಮೂಲಕ ಸಿನಿಮಾ ರಂಗಕ್ಕೆ ಕಾಲಿಡುತ್ತಿದ್ದಾರೆ ಮೋಕ್ಷಾ ಕುಶಾಲ್‌. ಈ ಸಿನಿಮಾದಲ್ಲಿ ಇವರು ದಿಶಾ ಎಂಬ ಪಾತ್ರವನ್ನು ನಿರ್ವಹಿಸುತ್ತಿದ್ದು, ಅದೊಂದು ಬೋಲ್ಡ್‌ ರೀತಿಯ ಪಾತ್ರವಂತೆ. ಸುಲಭವಾಗಿ ಪ್ರೀತಿಯನ್ನು ಒಪ್ಪಿಕೊಳ್ಳದ ಹುಡುಗಿಯು, ಆಕಸ್ಮಿಕವಾಗಿ ಪ್ರೀತಿಯ ಬಲೆಗೆ ಬೀಳುತ್ತಾಳೆ. ಅಲ್ಲಿಂದ ಅವಳ ಲೈಫ್‌ ಎತ್ತ ಸಾಗುತ್ತದೆ ಎನ್ನುವುದೇ ಪಾತ್ರದ ಹಿನ್ನೆಲೆಯಂತೆ.

'ಇದು ನನ್ನ ಮೊದಲ ಸಿನಿಮಾ. ಮೊದಲ ಸಿನಿಮಾದಲ್ಲಿಯೇ ಬೋಲ್ಡ್‌ ಪಾತ್ರ ಸಿಕ್ಕಿದೆ. ಸಿಕ್ಕಿರುವ ಅವಕಾಶವನ್ನು ಸರಿಯಾದ ರೀತಿಯಲ್ಲಿ ಬಳಸಿಕೊಂಡಿದ್ದೇನೆ. ನಿರ್ದೇಶಕ ಮೋಹನ್‌ ಕಾಮಾಕ್ಷಿ ಅವರು ಪಾತ್ರವನ್ನು ತುಂಬಾ ಚೆನ್ನಾಗಿ ಹೆಣೆದಿದ್ದಾರೆ' ಅಂತಾರೆ ಮೋಕ್ಷ.

ಇಂಜಿನಿಯರಿಂಗ್‌ ಓದಿಕೊಂಡಿರುವ ಇವರು, ಮೊದಲು ಬಂದಿದ್ದು ಮಾಡೆಲಿಂಗ್‌ ಜಗತ್ತಿಗೆ. ಅಲ್ಲಿಂದ ಸಿನಿಮಾ ರಂಗದತ್ತ ಮುಖ ಮಾಡಿದ್ದಾರೆ. ಆದಿ ಪುರಾಣ ಸಿನಿಮಾದ ನಂತರ ಇವರು ಸದ್ಯ ನವರತ್ನ ಎಂಬ ಮತ್ತೊಂದು ಚಿತ್ರ ಒಪ್ಪಿಕೊಂಡಿದ್ದಾರೆ. ಇದೊಂದು ಮಹಿಳಾ ಪ್ರಧಾನ ಸಿನಿಮಾ ಎನ್ನುವುದು ವಿಶೇಷ.

ಅಂದಹಾಗೆ ಆದಿ ಪುರಾಣ ಸಿನಿಮಾದ ಕಥೆಯೇ ವಿಶೇಷವಾಗಿದೆ. ತಾರುಣ್ಯ ಮತ್ತು ಮದುವೆಯ ನಂತರ ಜೀವನದಲ್ಲಿ ಹಲವು ರಸವತ್ತಾದ ಘಟನೆಗಳು ನಡೆಯುತ್ತವೆ. ಅವುಗಳನ್ನು ಸಿನಿಮಾ ರೂಪದಲ್ಲಿ ತಂದಿದ್ದಾರಂತೆ ನಿರ್ದೇಶಕರು. ಶಶಾಂಕ್‌ ಈ ಸಿನಿಮಾದ ಮೂಲಕ ಸ್ಯಾಂಡಲ್‌ವುಡ್‌ಗೆ ಎಂಟ್ರಿ ಕೊಟ್ಟಿದ್ದಾರೆ. ಸಹೋದರನ ಸಿನಿಮಾಗೆ ಶಮಂತ್‌ ಹಣ ಹೂಡಿದ್ದಾರೆ.