ನಟಿ ಶ್ರೀದೇವಿ ನಾಲ್ಕು ಭಾಷೆಗಳಲ್ಲಿ ಹೊಸ ಇನ್ನಿಂಗ್ಸ್

ತನ್ನ ರೀ ಎಂಟ್ರಿ ಮೂಲಕ ನಿರೀಕ್ಷಿಸಿದ ಮಟ್ಟದಲ್ಲಿ ಪ್ರೇಕ್ಷಕರನ್ನು ಸೆಳೆಯದ ಬಾಲಿವುಡ್ ನಟಿ ಶ್ರೀದೇವಿ ಇದೀಗ ಹೊಸ ಇನ್ನಿಂಗ್ಸ್‌ಗೆ ರೆಡಿಯಾಗಿದ್ದಾರೆ. ಮತ್ತೊಂದು ಇಂಟರೆಸ್ಟಿಂಗ್ ಸಿನಿಮಾ ಮೂಲಕ ಪ್ರೇಕ್ಷಕರ ಮುಂದೆ ಬರಲು ರೆಡಿಯಾಗುತ್ತಿದ್ದಾರೆ. ಅವರು ಸಿನಿಮಾ ರಂಗಕ್ಕೆ ಬಂದು 50 ವರ್ಷಗಳಾಗುತ್ತಿವೆ.

2012ರಲ್ಲಿ ತೆರೆಕಂಡ 'ಇಂಗ್ಲಿಷ್ ವಿಂಗ್ಲಿಷ್' ಪರ್ವಾಗಿಲ್ಲ ಎನ್ನಿಸಿದರೂ ಬಳಿಕ ದಕ್ಷಿಣದ 'ಪುಲಿ' ಚಿತ್ರ ನಿರಾಸೆಮೂಡಿಸಿತು. ಇದರಿಂದ ಮತ್ತೆ ತೆರೆಮರೆಗೆ ಸರಿದರು ಶ್ರೀದೇವಿ. ಈಗ ಸ್ವಲ್ಪ ಗ್ಯಾಪ್ ಬಳಿಕ 'ಮಾಮ್' ಚಿತ್ರದ ಮೂಲಕ ಮತ್ತೆ ಅಭಿಮಾನಿಗಳನ್ನು ರಂಜಿಸಲು ಬರುತ್ತಿದ್ದಾರೆ.

ಅಂದಹಾಗೆ ಇದೊಂದು ಥ್ರಿಲ್ಲರ್ ಸಿನಿಮಾ ಆಗಿದ್ದು ರವಿ ಉದ್ಯಾವರ್ ಆಕ್ಷನ್ ಕಟ್ ಹೇಳಿದ್ದಾರೆ. ಶ್ರೀದೇವಿ ಪತಿ ಬೋನಿ ಕಪೂರ್ ನಿರ್ಮಾಪಕರು. ಈ ಚಿತ್ರವನ್ನು ದೇಶದಾದ್ಯಂತ ಭರ್ಜರಿಯಾಗಿ ತೆರೆಗೆ ತರಲು ಸಿದ್ಧವಾಗಿದ್ದಾರೆ. ಮುಖ್ಯವಾಗಿ ಸೌತ್‌ನಲ್ಲಿ ಶ್ರೀದೇವಿಗೆ ಫ್ಯಾನ್ ಫಾಲೋಯಿಂಗ್ ಸ್ವಲ್ಪ ಜಾಸ್ತಿ ಇರುವ ಕಾರಣ ಹಿಂದಿ, ತೆಲುಗು, ತಮಿಳು ಹಾಗೂ ಮಲಯಾಳಂ ಭಾಷೆಗಳಲ್ಲಿ ಮಾಮ್ ಸಿನಿಮಾ ತೆರೆಕಾಣುತ್ತಿದೆ.

ನಾಲ್ಕು ಭಾಷೆಗಳಲ್ಲಿ ಜುಲೈ 7ರಂದು ಸಿನಿಮಾ ತೆರೆಗೆ ತರಲು ಪ್ಲಾನ್ ಮಾಡಲಾಗುತ್ತಿದೆ. ಶ್ರೀದೇವಿ ಮುಖ್ಯ ಪಾತ್ರದಲ್ಲಿರುವ ಈ ಸಿನಿಮಾದ ಪಾತ್ರವರ್ಗದಲ್ಲಿ ನವಾಜುದ್ದೀನ್ ಸಿದ್ಧಿಕಿ, ಅಕ್ಷಯ್ ಖನ್ನಾ, ಅಭಿಮನ್ಯು ಸಿಂಗ್ ಪ್ರಮುಖ ಪಾತ್ರಗಳಲ್ಲಿ ಕಾಣಿಸಿದ್ದಾರೆ. ಎ.ಆರ್. ರೆಹಮಾನ್ ಸಂಗೀತ ಚಿತ್ರಕ್ಕಿದೆ.