ಟೆಕ್ನಿಷಿಯನ್ಸ್‌ಗೆ ಚಾಲೆಂಜಿಂಗ್‌ ಆಗಿದ್ದ ಚಿತ್ರ ವರ್ತಮಾನ

*ಪದ್ಮಾ ಶಿವಮೊಗ್ಗ

ಕನ್ನಡ ಚಿತ್ರರಂಗದಲ್ಲಿಯೇ ಹೊಸ ರೀತಿಯ ಪ್ರಯೋಗಕ್ಕಾಗಿ ವರ್ತಮಾನ ಚಿತ್ರ ಎಲ್ಲರ ಗಮನ ಸೆಳೆದಿದ್ದು, ಕಥೆ ಮತ್ತು ನಿರೂಪಣೆ ವಿಶಿಷ್ಟವಾಗಿದೆ ಎಂದು ನಿರ್ದೇಶಕ ಉಮೇಶ್‌ ಅಂಶಿ ಹೇಳಿದ್ದಾರೆ.

ಅಲ್ಟಿಮೇಟ್‌ ಮೂವೀಸ್‌ ಬ್ಯಾನರ್‌ನಡಿ ಮನು ಬಿಲ್ಲೆ ಮನೆ ಮತ್ತು ಹೇಮಾವತಿ ನಿರ್ಮಾಣ ಮಾಡಿರುವ ಈ ಚಿತ್ರದಲ್ಲಿ ಸಂಚಾರಿ ವಿಜಯ್‌ ಮತ್ತು ಸಂಜನಾ ಪ್ರಕಾಶ್‌ ಹೊರತುಪಡಿಸಿ ಬಹುತೇಕ ಹೊಸ ಕಲಾವಿದರೇ ನಟಿಸಿದ್ದಾರೆ. ವ್ಯಕ್ತಿಯೋರ್ವನ ಸುತ್ತ ಹೆಣೆದ ಕಥೆ ಚಿತ್ರದಲ್ಲಿದೆ. ವಿಚಿತ್ರವಾದ ನಡವಳಿಕೆ, ಕುತೂಹಲ ಕೆರಳಿಸುವ ಪಾತ್ರದಲ್ಲಿ ಸಂಚಾರಿ ವಿಜಯ್‌ ಕಾಣಿಸಿಕೊಂಡಿದ್ದಾರೆ. ಮೊದಲ ಬಾರಿಗೆ ಕಾರ್ಪೊರೇಟ್‌ ಕಂಪನಿ ಉದ್ಯೋಗಿಯಾಗಿ ಡಿಫರೆಂಟ್‌ ಲುಕ್‌ನಲ್ಲಿ ನಟಿಸಿದ್ದಾರೆ ಅವರು. ಚಿತ್ರದಲ್ಲಿ ಛಾಯಾಗ್ರಹಣ, ಸಂಕಲನ ಮತ್ತು ಸಂಗೀತ ಮುಖ್ಯ ಪಾತ್ರವಹಿಸಿದೆ ಎಂದು ಉಮೇಶ್‌ ಹೇಳಿದ್ದಾರೆ.

ಚಿತ್ರಕ್ಕೆ ಸಂಗೀತ ಸಂಯೋಜನೆ ಮಾಡುವುದು ಸವಾಲಿನದ್ದಾಗಿತ್ತು ಎಂದಿದ್ದಾರೆ ಶರವಣ. 'ಪ್ರತಿಯೊಂದು ದೃಶ್ಯವೂ ಸುಂದರವಾಗಿತ್ತು, ಭಿನ್ನವಾಗಿತ್ತು. ಒಂದು ದೃಶ್ಯದಿಂದ ಇನ್ನೊಂದು ದೃಶ್ಯಕ್ಕೆ ಮೂಡ್‌ನಲ್ಲಿ ಅಜಗಜಾಂತರ ವ್ಯತ್ಯಾಸ ಇರುತ್ತಿತ್ತು. ಇದನ್ನು ಕನೆಕ್ಟ್ ಮಾಡುವುದು ಅಷ್ಟು ಸುಲಭದ ಮಾತಲ್ಲ. ಎರಡು ವರ್ಷ ಬೇರೆ ಯಾವ ಕೆಲಸವನ್ನೂ ಒಪ್ಪಿಕೊಳ್ಳದೆ ಇದನ್ನು ತಪಸ್ಸಿನಂತೆ ಧ್ಯಾನಿಸಿ ಮಾಡಿದ್ದೇನೆ. ಅಂತಿಮವಾಗಿ ಚಿತ್ರ ಪೂರ್ಣಗೊಂಡ ನಂತರ ನೋಡಿದಾಗ ಟೆಕ್ನಿಕಲಿ ವ್ಹಾವ್‌ ಎನ್ನುವಂತೆ ಇತ್ತು' ಎಂದಿದ್ದಾರೆ ಅವರು.

'ಇದೊಂದು ಮರ್ಡರ್‌ ಮತ್ತು ಥ್ರಿಲ್ಲರ್‌ ಚಿತ್ರ. ಡೈಲಾಗ್‌, ನಿರೂಪಣೆ ಪ್ಲಸ್‌ ಪಾಯಿಂಟ್‌. ನಿಗೂಢವಾಗಿ ಹೇಳಿರೋದನ್ನು ಪ್ರೇಕ್ಷಕ ಹೇಗೆ ಅರ್ಥ ಮಾಡಿಕೊಳ್ಳುತ್ತಾನೆ ಎಂಬ ಕುತೂಹಲ ನನಗೂ ಇದೆ. ಸಸ್ಪೆನ್ಸ್‌ ಇದೆ. ಹೊಸತನ ಇದೆ. ಪ್ರತಿಯೊಂದು ಫ್ರೇಮ್‌ ಕೂಡಾ ಫ್ರೆಶ್‌ ಆಗಿರಬೇಕು ಎಂದು ಹೊಸ ರೀತಿಯಲ್ಲಿ ಛಾಯಾಗ್ರಹಣ ಮಾಡಲಾಗಿದೆ. ಟೆಕ್ನಿಷಿಯನ್ಸ್‌ಗೆ ಚಾಲೆಂಜಿಂಗ್‌ ಆಗಿದ್ದ ಚಿತ್ರ ಇದು. ಅಂತಿಮವಾಗಿ ಚಿತ್ರ ನನಗೆ ತೃಪ್ತಿ ನೀಡಿದೆ' ಎಂದಿದ್ದಾರೆ ಉಮೇಶ್‌ ಅಂಶಿ.

ಚಿತ್ರದಲ್ಲಿ ಪಾತ್ರಗಳೆಲ್ಲವೂ ಹೊಸ ರೀತಿಯಲ್ಲಿವೆ. ಮೇಕಿಂಗ್‌ ಕೂಡಾ ಮಾಮೂಲಿ ಕಮರ್ಷಿಯಲ್‌ ಸಿನಿಮಾ ತರ ಇಲ್ಲ. ಖಂಡಿತ ಹೊಸ ಅನುಭವ ನೀಡಲಿದೆ.

ಉಮೇಶ್‌ ಅಂಶಿ, ನಿರ್ದೇಶಕ