ಬೆಂಗಳೂರು ನನ್ನ ಎರಡನೇ ಮನೆ ಇದ್ದಂತೆ: ಕವಿತಾ ರಾಧೇಶ್ಯಾಮ್

ಬಾಲಿವುಡ್‌ನಲ್ಲಿ ಬೊಲ್ಡ್‌ ಮತ್ತು ಹಾಟ್‌ ನಟಿ ಎನ್ನಿಸಿಕೊಂಡಿರುವ ಕವಿತಾ ರಾಧೇಶ್ಯಾಮ್‌ ತಮ್ಮ ಸ್ಟೇಟ್‌ಮೆಂಟ್‌ನಿಂದ ಬೆಚ್ಚಿಬೀಳಿಸುತ್ತಾ ಬಂದಿದ್ದಾರೆ. ಈ ಬಹುಭಾಷಾ ನಟಿ ಈಗ ಫುಲ್‌ ಬಿಝಿ. ವಿವಿಧ ಭಾಷೆಗಳಲ್ಲಿ ಒಟ್ಟಿಗೆ 6 ಚಿತ್ರಗಳಲ್ಲಿ ನಟಿಸುತ್ತಿದ್ದಾರೆ. ಕನ್ನಡದಲ್ಲಿ ರಾಗಿಣಿ ಐಪಿಎಸ್‌ ಮತ್ತು ಕನ್ನಡದಲ್ಲಿ ನಿಖಿಲ್‌ ಕುಮಾರ್‌ ನಟನೆಯ ಮೊದಲ ಚಿತ್ರ ಜಾಗ್ವಾರ್‌ನಲ್ಲೂ ನಟಿಸಿದ್ದರು. ಈ ಬಾಲಿವುಡ್‌ ನಟಿ ದಕ್ಷಿಣ ಭಾರತದ ಚಿತ್ರಗಳಲ್ಲಿ ಈಗಾಗಲೇ ನಟಿಸಿದ್ದಾರೆ.

ಈಗ ಮತ್ತೆ ತಮಿಳು, ತೆಲುಗು, ಹಿಂದಿ, ಕನ್ನಡ ಚಿತ್ರಗಳ ಶೂಟಿಂಗ್‌ನಲ್ಲಿ ಬಿಝಿಯಾಗಿದ್ದಾರೆ. ಬೆಂಗಳೂರಿನಲ್ಲಿ ಅವರ ನಟನೆಯ 2 ಚಿತ್ರಗಳ ಶೂಟಿಂಗ್‌ ನಡೆದಿದ್ದು, ಬೆಂಗಳೂರು ನನಗೆ 2ನೇ ಮನೆ ಇದ್ದ ಹಾಗೆ ಎಂದಿದ್ದಾರೆ. ಸಾಮಾಜಿಕ ಜಾಲತಾಣದಲ್ಲಿ ಬೆಂಗಳೂರಿನ ಬಗ್ಗೆ ಮೆಚ್ಚುಗೆಯ ಮಾತುಗಳನ್ನಾಡಿದ್ದಾರೆ. 'ಬೆಂಗಳೂರು ನನಗೆ ಬೇರೆ ಊರು ಎನ್ನಿಸುವುದಿಲ್ಲ. ಮುಂಬೈನಂತೆಯೇ ಇದೂ ಕೂಡಾ ನನ್ನದೇ ಊರು ಎನ್ನಿಸುತ್ತದೆ. ಇಲ್ಲಿಯ ಜನ ತೋರಿಸುವ ಪ್ರೀತಿ ದೊಡ್ಡದು' ಎಂದಿದ್ದಾರೆ.

ಪೊಲೀಸ್‌ ಆಫೀಸರ್‌ ಆಗಿ ಹೆಚ್ಚು ಚಿತ್ರಗಳಲ್ಲಿ ನಟಿಸುತ್ತಿದ್ದಾರೆ ಕವಿತಾ. ಕಾಸುರ ಎಂಬ ಬೈಲಿಂಗ್ವಲ್‌ ಚಿತ್ರವೊಂದರಲ್ಲಿ ಸಿಬಿಐ ಆಫೀಸರ್‌ ಅಗಿ ಕಾಣಿಸಿಕೊಂಡಿದ್ದಾರೆ. ಇದು ತಮಿಳು ಮತ್ತು ಕನ್ನಡದಲ್ಲಿ ತೆರೆಕಾಣಲಿದೆ. ತಮಿಳಿನಲ್ಲಿ ಕಾಸುರನ್‌ ಎಂದು ಹೆಸರಿಡಲಾಗಿದೆ. ಈ ಚಿತ್ರ ಪೂರ್ಣಗೊಂಡಿದ್ದು ತೆರೆ ಕಾಣಬೇಕಿದೆ.

ಅದೇ ರೀತಿ ಗಡಿ ಎಂಬ ಇನ್ನೊಂದು ಕನ್ನಡ ಚಿತ್ರದಲ್ಲಿ ಸ್ಪೆಷಲ್‌ ಪೊಲೀಸ್‌ ಆಫೀಸರ್‌ ಆಗಿ ನಟಿಸಿದ್ದಾರೆ.ಇದು ತಮಿಳಿನಲ್ಲೂ ನಿರ್ಮಾಣವಾಗುತ್ತಿದೆ. ಸಾಲಗಾರ ಸಹಕಾರ ಸಂಘ ಚಿತ್ರ ತೆಲುಗು ಮತ್ತು ಕನ್ನಡದಲ್ಲಿ ನಿರ್ಮಣವಾಗುತ್ತಿದೆ. ಇದಲ್ಲದೆ, ಕೊಮಲಿ ಎಂಬ ಇನ್ನೊಂದು ತಮಿಳು ಚಿತ್ರದಲ್ಲೂ ನಟಿಸಿದ್ದಾರೆ.