ನೆಗೆಟಿವ್‌ ಶೇಡ್‌ ತುಂಬಾ ಕಷ್ಟ

ಖಳಛಾಯೆಯ ಪಾತ್ರದಲ್ಲಿ ನಟಿಸೋದು ತುಂಬಾ ಕಷ್ಟ ಎನ್ನುತ್ತಾರೆ ಸೂರ್ಯ. ಈ ವಾರ ತೆರೆಕಾಣುತ್ತಿರುವ ‘24’ ತಮಿಳು ಚಿತ್ರದಲ್ಲಿ ಇದೇ ಮೊದಲ ಬಾರಿಗೆ ಅವರು ನೆಗೆಟಿವ್‌ ಶೇಡ್‌ನ ಪಾತ್ರದಲ್ಲಿ ಕಾಣಿಸಿಕೊಂಡಿದ್ದಾರೆ. ‘ಚಿತ್ರದಲ್ಲಿನ ನನ್ನ ಅತ್ರೇಯಾ ಪಾತ್ರ ಖಳಛಾಯೆಯದ್ದು. ಮೇಕಪ್‌ ಆರ್ಟಿಸ್ಟ್‌ ಕೈಚಳಕದಿಂದ ನನ್ನ ಪಾತ್ರ ವೀಕ್ಷ ಕರಲ್ಲಿ ಕೊಂಚ ಭೀತಿ ಉಂಟುಮಾಡುವಂತಿದೆ. ಆದರೆ ಬದಲಾದ ದಿನಗಳಲ್ಲಿ ಖಳಪಾತ್ರವೆಂದರೆ ಇದಿಷ್ಟೇ ಸಾಲದು. ನಟನೆಯಲ್ಲಿಯೂ ಅದು ಕನ್ವಿನ್ಸ್‌ ಆಗುವಂತಿರಬೇಕು. ಇಲ್ಲಿವರೆಗೆ ಇಂಥದ್ದೊಂದು ಪಾತ್ರದಲ್ಲಿ ನಟಿಸದ ನಾನು ತುಂಬಾ ಸವಾಲುಗಳನ್ನು ಎದುರಿಸಬೇಕಾಯ್ತು’ ಎನ್ನುತ್ತಾರವರು.

ಸೂರ್ಯರ ‘ಘಜನಿ’, ‘ಸಿಂಗಂ’ ಚಿತ್ರಗಳು ಹಿಂದಿ ಸೇರಿದಂತೆ ದಕ್ಷಿಣದ ಇತರೆ ಭಾಷೆಗಳಲ್ಲಿಯೂ ತಯಾರಾಗಿ ಯಶಸ್ವಿಯಾಗಿವೆ. ಆದರೆ ಹಿಂದಿ ಚಿತ್ರದ ಹೀರೋ ಆಗಿ ನಟಿಸಲು ಸೂರ್ಯ ಹಿಂಜರಿಯುತ್ತಾರೆ. ‘ನನಗೆ ಗೊತ್ತಿಲ್ಲದ ಭಾಷೆಯಲ್ಲಿ ನಟಿಸೋದು ನನಗೆ ಕಷ್ಟವಾಗುತ್ತೆ. ಒತ್ತಾಯಕ್ಕೆ ನಟಿಸಿದಾಗ, ಅದೊಂದು ರೀತಿ ಯಾಂತ್ರಿಕ ಅನಿಸುತ್ತದೆ. ನನ್ನ ತಮಿಳು ಚಿತ್ರಗಳ ರಿಮೇಕ್‌ಗಳ ಮೂಲಕ ಹಿಂದಿಯಲ್ಲಿ ಕನೆಕ್ಟ್ ಆಗಿದ್ದೇನಲ್ಲ, ಅಷ್ಟು ಸಾಕು...’ ಎನ್ನುತ್ತಾರೆ ಸೂರ್ಯ